Сылу Бәйрәмова

Сылу Бәйрәмова
	Сылу Бәйрәмова
Туганда бирелгән исеме:	Бәйрәмова Сылу Рәхип кызы
Туу датасы:	10 декабрь 1965 (58 яшь)
Туу җире:	СССР, РСФСР, Татарстан АССР, Буа районы, Черки-Килдураз
Һөнәре:	драма актрисасы
Гражданлыгы:	ССРБ→; РФ
Активлык еллары:	2007 — х. в.

Википедиядә Бәйрәмова фамилияле башка кешеләр турында мәкаләләр дә бар.

Сылу Бәйрәмова, Бәйрәмова Сылу Рәхип кызы (1965 елның 10 декабре, СССР, РСФСР, ТАССР, Буа районы, Черки-Килдураз) — драма актрисасы, Әтнә татар дәүләт драма театры артисты (2007 елдан).^[1]

Тәрҗемәи хәле

Сылу Бәйрәмова классташлар очрашуында (38 елдан соң)

1965 елның 10 декабрендә Татарстанның Буа районы, Черки-Килдураз авылында туа. 1980 елда мәктәпне тәмамлагач, Габдулла Тукай исемендәге Әтнә авыл хуҗалыгы техникумына укырга керә. Аны тәмамлый һәм тиздән кияүгә чыга. Ире белән өч бала үстерәләр: Таңсылу, Айсылу һәм Ландыш. Үзе Сылу бу вакытта беркайда да эшләми, балаларны тәрбияләү белән шөгыльләнә. 1990-еллар азагында Себер якларына күченеп китәләр. 2007 елда Татарстанга кайталар, Әтнәдә төпләнәләр. 14 елын кызларына багышлаган Сылу җаны теләгән эшне эзли башлый. Шул чагында күзенә район газетасында чыккан бер белдерү чалына: театрда “Күк капусы ачылса” әсәрендәге Шәмсия роленә кастингка чакыру була бу.^[2] Тиздән Сылу кастингны уҗышлы рәвештә үтә һәм театрда үз эшчәнлеген башлый. Шул ук вакытта Алабуга мәдәният һәм сәнгать көллиятенә укырга керә.

Хәзерге вакытта 5 онык әбисе (4 кыз һәм бер ир бала).^[2] Кызлары укытучы булып эшлиләр: Айсылу - информатика, Таңсылу - музыка, Ландыш - инглиз теле фәннәрен укыталар. Үзе Сылу театрдан тыш балык тоту белән мавыга.^[3]

Театр

2007 елда Әтнә татар дәүләт драма театрының коллективына кушыла.^[1] Аның көчле ягы - комедия. Сылу кешегә яшәргә комачаулаган сыйфатларны сәхнәдә бик оста күрсәтә белә. Мәсәлән, кимчелекләре күп булган хатын-кызны көлкегә калдырып, фаш итәргә кирәк булса, арттырып та уйнарга бик оста. Хай Вахит әсәре буенча куелган «Күк капусы ачылса» спектаклендәге Шәмсия роле әнә шундыйлардан була.

Ул үз-үзен сәхнәдә җиңел табигый итеп тота. Барысын да тәэсирле итеп сөйли белә. Аның сөйләм теле төгәл, яңгыравыклы һәм ачык. Тамаша вакытында тамашачыларны чын күңелдән көлүе белән мавыктыра. Сәхнәне бик яхшы сизә, ул иҗат иткән образлар чынбарлыкка тәгөл рәвештә тәңгәл килә.

Тамашачыларга күбрәк Туфан Миңнуллинның әсәре буенча куелган “Җен алыштырган” спектаклендә Җенбикә, “Күбәләкләр утка оча”дагы Зөһрә, Хай Вахитның “Ике килен – килендәш”тәге Камилә рольләре буенча таныш.

Репертуар

Репертуарында 25кә якын роле бар.

Ана - «Гүзәлем Әсәл» - Чыңгыз Айтматов;
Хатын - «Югалган көн» - Аяз Гыйләҗев;
Миссис Маймыл - «Урман-Club» - Илгиз Зәйниев;
Васюта - «Провинция мәзәкләре» - Александр Вампилов;
Кыз - «Кияүләр» - Хәй Вахит;
Зәгыйфә - «Адашкан күңел» - Мирхәйдәр Фәйзи;
II уйнаучы, Мужик – "Безнең шәһәрнең серләре" – Галиәсгар Камал;
Онга баткан хатын – "Фронтовичка" – Анна Батурина;
Ана – "Күз нурларым" – Айгөл Әхмәтгалиева
Мәймүнә - «Миңлекамал» - Мирсәй Әмир;
Разия - «Американ» - Кәрим Тинчурин;
Дахирә - «Шимбә көн кич белән» - Георгий Хугаев;
Хупҗамал - «Яшел эшләпә» - Гамир Насрый;
Нурдидә - «Язын бозлар акканда» - Зөлфәт Хәким;
Ания - «Ай булмаса, йолдыз бар» - Туфан Миңнуллин;
Камилә - «Ике килен-килендәш» - Хәй Вахит;
Шәмсия - «Күк капусы ачылса» - Хәй Вахит;
Җенбикә - «Җен алыштырган» - Туфан Миңнуллин;
Зөһрә - «Күбәләкләр утка оча» - Равил Сабыр;
Маляр - «Җырым табар сине» - Хәй Вахит;
Мөслимә - «Мулла» - Туфан Миңнуллин;
Сабира - «Туган туфрак» - Сәет Шәкүров;
Зөләйха - «Әниемнең ак күлмәге» - Шәриф Хөсәенов;
Тылсымчы - "Бәхет кошы" - Морис Метерлинк һ.б.^[1]

Фильмография

Халидә - Гади вакыйга (2010, Россия).^[4]

Шулай ук карагыз

Сылтамалар

Чыганаклар

Әтнә татар дәүләт драма театры сайты
МЕДИА: Әтнә таңы // 10.12.2020(үле сылтама)
Простая история (Россия, 2010) – Афиша-Кино
"Сәхнә" журналы // 16.02.2017(үле сылтама)

Искәрмәләр

[a0-1] 1,0 ^1,1 ^1,2 Бәйрәмова Сылу Рәхип кызы

[a1-2] 2,0 ^2,1 Казан арты могҗизасы

[a4-3] Сылу Байрамова

[a2-4] "Гади вакыйга" фильм

[1]

[2]

[3]

[4]