Belorečensk

Belorečensk
Белореченск

Lidnanznam	Flag
Valdkund	Venäma
Eläjiden lugu (2022)	51,086 ristitud
Pind	38,48 km²
Pämez'	Aleksandr Abramov (viluku 2019—)
Telefonkod	+7−86 155-xx-xxx
Avtokod	23, 93, 123
Aigvö	UTC+3 (MSK+0)

Belorečensk (ven.: Белоре́ченск, armen.: Բելորեչենսկ Belorečensk) om Venäman lidn da lidnankund Krasnodaran randan keskuzpalan suves. Se om Belorečenskan rajonan administrativine keskuz, mülüb rajonha.

Istorii

Čerkesalaižiden Šithal-eländpunkt (adig.: Шытхьалэ) oli olmas Belorečenskan sijas edel 19. voz'sadan kahtent palad.

Nügüdläižen eländpunktan aluz om pandud Kubanin kozakoil kuti maine lidnuz i Belorečenskai-stanic (ven.: станица Белореченская) vl 1862. Vl 1910 «Armavir — Tuapse»-raudtejono läbiti stanicad, i se šingotaškanzihe teravas. Stanic sai lidnan statusad vn 1958 28. päiväl semendkud nügüdläiženke nimenke. Vozil 1979−2005 lidn alištui agjan tobmudele oikti.

Belorečenskan ižandusen päsarakod oma himine (mineraližheretusiden tegim), sömtegimišt (südäiveded, konditerine fabrik, voitegim, kombisötken tegim, leibtegim), sauvondmaterialad (raudbetontegesed), raudtetransportan edheotandad i meblin tehmine.

Geografijan andmused

Lidn sijadase Vaugedjogen oiktal randal (adig.: Шъхьагуащэ, Kubanin hurapol'ne bassein), 120 m ü.m.t. keskmäižel korktusel. Matkad Adigejan Tazovaldkundan röunhasai om kuz' kilometrad päivlaskmha i nell' kilometrad suvhe, Krasnodarhasai om 75 km päivlaskmha orhal vai 100 km avtotedme. Lähembaine lidn om Maikop (Adigejan pälidn) 20 km suvipäivnouzmha orhal, raudtedme vai avtotedme.

Belorečensk om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 53 892 ristitud. Vl 2018 lidnan ristitišt oli 52 082 eläjad. Kaikiš suremb ristitišt oli 60 tuhad eläjid vl 1996.

Rahvahad (enamba 1% vl 2010): venälaižed — 84,1%, armenijalaižed — 9,9%, ukrainalaižed — 1,4%, toižed rahvahad — 4,1%, rahvahuden ozutandata — 0,5%.

Ortodoksižen hristanuskondan viž pühäpertid oma saudud: kaks' jumalanpertid i koume časounäd. Armenižen jumalankodikundan pühäpert' om avaitud lidnas.

Professionaližen opendusen aluzkundad: industrialiž-tehnologine tehnikum (valdkundaline), kooperativine tehnikum (privatine), biznesan da oiktusen tehnikum (privatine), medicinine kolledž (valdkundaline).

Edeline lidnankundan pämez' (lidnan Administracijan pämez') om Aleksandr Šapovalov (keväz'ku 2017 — viluku 2019).

Galerei

• 
  Keskuztorg (2010)
• 
  Jumalanmaman Emäganpäivän jumalanpert', vn 2016 nägu
• 
  Mineraližheretusiden tegim vl 2017
• 
  Raudteradnikoiden kul'turkeskuz (vn 2015 olend)
• 
  Belorečenskai-päraudtestancijan sauvuz vl 2011

Irdkosketused

• Lidnankundan tobmuden aluzkundoiden oficialine sait (gorodbelorechensk.ru). (ven.)