Ford Genri
Genri Ford (angl.: Henry Ford; sünd. 30. heinku 1863 läz Detroitad, Mičigan, AÜV — kol. 07. sulaku 1947 Dirbornas, Mičigan, AÜV) oli amerikaine tegimištonmez', inžener-melestegii, avtotegimiden pidai kaiked mail'madme.
Fordan lozungan oli «avto kaikiden täht» — hänen tegim pästli kaikiš odvambid avtoid. Fordan «Ford Motor Company»-kompanii radab nügüd'-ki.
Genri Ford zavodi ezmäižen kävutada konvejerad. Konvejer oli kävutadud edel-ki Fordad, no vaiše hänen tegimiš se radaškanzi kommertižidenke satusidenke. Fordan «Minun elo i minun satused»-kirj om klassine säduz radon tedoorganizacijas.
Biografii
[vajehta | vajehtada lähtetekst]Tuleban aigan edheotai oli sündnu emigrantoiden Irlandijaspäi kanzha, Uil'jam Ford i Mari Ford oliba hänen kazvatajad. Pereh eli fermal läz Detroitad. Kuz'toštkümnevozne Genri läksi kodišpäi radamha Detroitas. Vll 1891−1899 mez' radnikoiči inženeran-mehanikan i päinženeran «Edisonan elektrižes kompanijas» (Edison Illuminating Company).
Vl 1893 Ford konstruirui ičeze ezmäšt avtod joudal. Vll 1899−1902 mez' pidi «Detroitan avtoiden kompanijad» toižidenke valdoičijoidenke. Oli erižmelid heidenke, i vl 1903 melestegii pani ičeze kompanijan alust (Ford Motor Company). Edheotandan ezmäine model' oli Ford A. Kompanii sai tetabut Ford T-modelin pästandanke. Konvejeran kävutand oli ezmäine suriden kaluiden tehmižen sferas, se laski lüheta avton ühthekeradamižen aigad kahthe kerdha.