香港地理
| 香港地理數字一覽表[1] （2005年12月數據）  | |
| 洲： | 亞洲 |
| 區域： | 東亞大陸 |
| 位置： |
北緯22°08′至35′ 東經113°49′至114°31′ |
| 陸地面積： | 1104.04km² |
| 水域面積： | 1650.99km² |
| 總面積： | 2755.03km² |
| 水域率： | 59.93% |
| 海岸線： | 約1180km [2] |
| 陸地邊界： | 35km（連接中國大陸）[3] |
| 最高點： | 大帽山（海拔958m） |
| 最低點： |
南中國海 蒲台島北邊 螺洲門海床 （海平面下66m）[4] |
| 島嶼數目： | 263個 |
| 最大島嶼： | 大嶼山（146.5 km²） |
| 最長河流： | 深圳河（37 km）[5] |
| 最大湖泊： | 船灣淡水湖（24 km²）[6] |
香港喺中國南部沿岸，北靠廣東省、西背珠江口、南向南中國海，介乎北緯22°08′至35′、東經113°49′至114°31′之間[7]，所處嘅時區比協調世界時快8個鐘頭（即UTC+8）。香港北部同廣東省深圳市僅隔住一條深圳河，南部海域連接珠海市萬山群島海域。截至2005年12月，香港境內陸地面積有1104.04km²，連同水域總面積有2755.03km²[1]。香港一般會細分為香港島、九龍同新界三個區域；但係由於新界面積比前面兩個大好多，所以當中所包含嘅二百幾個離島一般會睇作另一個區域。
九龍半島同香港島之間嘅維多利亞港係又闊又深嘅天然良港[8]。而且香港位處東亞中心，所以英國人喺19世紀中葉鴉片戰爭後由滿清政府割走香港，開通港口、發展航海貿易。時至今日，香港嘅地理位置仍然令到本地經濟透過轉口貿易同中轉旅客而得益[9] [10] [11]。
由於佔據境內大部分範圍嘅新界山多平地少，香港本身無乜可以發展嘅土地。香港開埠早期，新界同市郊大部分範圍都係由林地、灌木、以及務農嘅鄉鎮村落所組成，並未有大規模發展。政府後嚟喺1976年將部份未開發地區劃做郊野公園，保護綠化環境。而接近維多利亞港嘅市區，則因為經濟發展而令到土地供不應求，高密度樓宇向高空發展，寸金尺土。政府自1960年代起規劃多個衛星城市，發展新市鎮，分散人口。為咗方便市民跨區工作、增加各區人口流動，政府亦都大力發展交通運輸網絡，縮短市區同郊區之間嘅旅程時間，陸路、鐵路和地鐵網絡至今仍然不斷擴張。人口增加，市區擴展，幾近700萬人唔平均咁分散喺嗰1,100多平方公里嘅土地度，除咗造成人口密度極高之外，亦都產生環境污染等城市問題。
行政地理
[編輯]
一般嚟講，香港會根據成為英國殖民地嘅階段而劃分做幾個主要大區——原先割讓畀英國嘅香港島同九龍，以及原本租借畀英國嘅新界，所以香港全境又有「港九新界」嘅別稱。1937年，政府將部份獅子山以南嘅新界地區劃為「新九龍」用嚟發展[12]。不過隨住時代發展，「新九龍」地區現已經當成係九龍一部份。時至今日，有時甚至將西貢市當作「九龍」一部分[13]，同殖民地時期嘅九龍地區相差都幾遠。
今日香港特別行政區嘅邊界，係香港同廣東省兩地政府喺1997年6月19日簽署嘅《粵港邊界管理範圍線諒解備忘錄》所界定嘅[14][15]，並由國務院令第221號公佈[16]。同年7月1日起，香港根據《中英聯合聲明》同《香港基本法》，成為中華人民共和國首個特別行政區。主權移交之後，保留原有行政、立法、司法架構，因此行政區劃繼續同中國大陸地區嘅唔同。
政府喺1982年實施「地方行政計劃」，全港分成18區，方便政府協調同埋管理地區層面嘅服務同設施，並且鼓勵市民參與地區事務[17]。政策繼續沿用至今，而18區多年來劃分大致相同，而家劃分為：
| 香港島 | 九龍西 | 九龍東 | 新界東 | 新界西 |
|---|---|---|---|---|
現時各區都設有區議會，部份成員係地區直選議員，議會職能主要係屬諮詢性質，亦都可以喺政府度獲得撥款，安排地區活動。各區亦都設有由政府部門組成嘅地區管理委員會，以及隸屬民政事務總署、負責統籌地區事務嘅民政事務處。
地形
[編輯]
香港境內山多平地少，係一座受到海水淹沒嘅多山地體。境內山陵可以同華南丘陵視為一體，地貌構造體系同內陸嘅廣東省一樣。山脈走向係東北——西南，其中以新界中部嘅大帽山（958m）為第一高峰，向多方面伸延。西南面大嶼山島上嘅鳳凰山（934m）同埋大東山（869m）就係另一條主要山脈。[18]
香港共有263個島[19]。咁多個島以大嶼山面積最大，之後係香港島，而香港島以南嘅鴨脷洲則係全球人口最密嘅島[20]，同時亦有唔少面積較細嘅島冇任何常住居民。
自然形成嘅較大型平地主要集中喺最接近珠江口嘅新界西北部，當中元朗、粉嶺等，都係由河流自然形成嘅沖積平原。呢啲天然平原土地肥沃，適合耕種。但係由於地勢低漥，一旦落起暴雨嚟，冇妥善處理過坑渠嘅地區就會形同澤國[21]。但係其他地區嘅高地，並唔係話等於免受大雨嘅衝擊。遇上豪雨，遍佈香港各地嘅斜坡可能出現山泥傾瀉，威脅市民人生安全。所以，政府整治山坡、處理排水等工作係好重要嘅。境內其餘僅有嘅平地位於九龍半島同埋香港島北部嘅維多利亞港沿岸，呢啲土地就係香港最初發展成市區嘅地方，至今仍然係香港都市命脈所在[22]。同時，政府亦不斷透過填海工程，逐漸向外擴張可供發展土地。
板塊
[編輯]就地殼板塊位置而言，香港喺歐亞板塊入面，遠離板塊邊緣600公里，所以發生強烈地震嘅機會好微[23]。香港境內極偶然會感覺到地殼震動，但係唔會造成任何傷亡或者損毀。1918年位於香港東北偏東約300公里嘅汕頭，曾經發生過黎克特制7.3級地震，但係破壞程度好輕。最近一次有感地震係發生喺2010年11月19日香港時間14:42，深圳后海灣一帶發生黎克特制2.8級地震，香港天文台接獲超過100名市民報告。[24]
地質史
[編輯]
相對於45億歲嘅地球，香港嘅岩石年紀好輕，可以追溯度4億年前嘅泥盆紀。當時香港由一大片河谷平原覆蓋，河水流向東南面，而河水氾濫帶嚟嘅軟泥有利原始植物生長，海岸地區亦都將海洋生物嘅殘骸沉積到沿岸海洋軟泥度。呢啲沖積物逐漸形成新界東北部船灣、黃竹角咀同赤門北岸一帶嘅岩石。到3億5000萬年前嘅石炭紀早期，熱帶淺海淹沒香港，水位下降後嘅沿岸沼澤地區出現植物，軟泥地面就有枯萎嘅植物。呢啲物質經過掩埋、遇熱同擠壓，分別成為埋喺地表下嘅大理岩，以及含有石墨嘅片岩，分佈喺香港西北部。2億9000萬年前嘅二疊紀時期，香港再次被淺海所淹，沉積物混入砂礫、海洋動物同珊瑚殘骸，經過沉埋、壓迫，岩石被巨大嘅地殼力量扭曲變形，形成摺曲、拱起或者斷層嘅狀態。這類岩石分佈喺吐露港嘅馬屎洲和丫洲。
1億6400萬至1億4000萬年前嘅侏儸紀時期，香港發生過多次火山爆炸，噴出大量熔岩同火山灰。香港嘅岩石約有一半由火山岩所形成，噴到火山口邊嘅火山灰冷卻後，成為切面呈六邊形嘅石柱，可以喺果洲群島同埋今日萬宜水庫度見到。未有噴出嘅熔岩就喺地底深處慢慢冷卻凝固，形成藏有粗大礦物粒嘅花崗岩。1億年前白堊紀嘅香港就係一片乾燥荒蕪，中國大陸嘅洪流偶然會將砂石同軟泥沖到香港，形成紅色嘅岩石層，喺東北部嘅赤州和烏蛟騰可以見到。考古學家發現呢個時期嘅岩石並冇生物痕跡，但係隔籬廣東省發現嘅白堊紀恐龍化石就反映鄰近地區可能有恐龍出沒。
直至8000萬至5000萬年前嘅白堊紀晚期同第三紀早期，氣候變得潮濕，香港逐漸形成遼闊嘅淺湖。雨季同旱季循環交替，為湖底嘅軟泥舖上一層又一層嘅鹽分凝固物，形成東坪洲所見嘅粉砂岩薄層。湖泊周邊嘅植物昆蟲形成化石。到咗5000萬年前嘅第三紀，氣候同依家一樣溫暖潮濕，陸地拱起，風化侵蝕形成今日嘅地理景觀。200萬年前第四紀嘅冰河時期，大片冰原由南北極推進，全球水平面下降；到咗1萬8000年前嘅最後一次冰期，海面比現時低130米，香港陸地面積會喺南邊多120公里。至6000年前，氣候回暖，海平面回升，淹沒山谷形成彎彎曲曲嘅海岸線，以及兩百幾個島。[25] [26]
礦物
[編輯]香港嘅礦物資源極少，礦物蘊藏量並冇大規模開採嘅經濟價值。馬鞍山嘅磁鐵礦過去產量都幾高吓，多數會運去日本提煉。1957至1968年係鐵礦全盛期，平均年產量有成98,000噸，直至1976年停產。[27]沙田針山同埋大嶼山沙螺灣有幾處規模好細嘅鎢礦，而打鼓嶺蓮麻坑就有鉛同鋅礦，當中可能含有銅同埋銀。呢啲礦藏經過細規模開採，都已經停產。[18]
非金屬礦藏方面，香港現時有4個石礦場，分別係觀塘嘅安達臣道石礦場、大嶼山嘅石澳石礦場、南丫島石礦場，以及屯門嘅藍地石礦場。這些石礦為建築業生產石料製品，每年平均生產碎石600至900萬公噸，佔全港約50%需求，其餘則由中國大陸輸入。[28]
水文
[編輯]
彎曲嘅海岸線係香港地貌嘅特徵之一。當中只有西面以及通過填海得嚟嘅土地海岸線較為平直。向東嘅海岸就因為曾經下沉，彎曲嘅山坡成為今日嘅海岸線。[29]彎曲嘅海岸線形成大小海灣及海灘，成為愛好水上運動人士嘅好去處。
香港另一地形特徵就係分隔九龍和香港島嘅維多利亞港。維港被四周嘅島、九龍嘅獅子山、同埋港島嘅太平山等高山包圍，港內船隻唔會受到強風侵襲。相對於鄰近海域嘅澳門等珠三角一帶，維多利亞港深而闊，再加上冇珠江所帶嚟嘅泥沙淤塞，令到維港適宜海運發展[30]，素來有世界天然良港嘅美譽。抵港後啲貨船可以透過陸路將貨物送去中國內地，或者經空運、船運將貨物送到亞洲其他地區。
相對於華南其他地區，香港境內河流規模較細，且河谷淺窄，反映丘陵受河水侵蝕時間有限。[30]香港位處珠江河口，珠江流量已經較少，因此即使係香港境內較大嘅深圳河、林村河等所帶動嘅水土流動，並未能侵蝕境內丘陵。山貝河同深圳河將大量泥沙積埋喺香港西北部，形成後海灣一帶紅樹林等景緻[31]。
香港缺少大型河流及湖泊，堅硬嘅花崗岩地質亦都令到地下水難以鑽取。開埠以來，淡水供應已經係政府必須面對嘅問題。政府早年依賴興建水塘供水，全港至今共有17個水塘，總面積達5.86億立方米；另一方面就由1960年代開始同廣東省簽訂協議，供應省內東江水到港[32]。
自然生態
[編輯]- 内文：香港生態
受到地形所礙，香港有約75%土地屬郊區，未曾開發成市鎮[33]。由於受香港城市擴張嘅影響，郊區同城市嘅距離十分近，市民及旅客可在短時間內前往郊區。2005年，前往郊野公園嘅遊人達1,200萬人次，進行遠足、燒烤、露營等活動。[33]郊區內嘅自然生態盎然，有多種香港稀有、獨有品種棲息，同密集嘅市區發展形成強烈嘅對比。呢啲潛在嘅自然生態旅遊資源，獲得政府近年進行評估發展[34]。
政府喺郊區開闢咗23個郊野公園同17個特別地區，共佔地416.44km²，即全港土地約38%。呢啲地域受到法例保護，交由漁農自然護理署（漁護署）管理。郊野公園主要係為市民提供郊野康樂設施，而特別地區則主要為保護自然生態環境。除咗郊野公園，香港亦設有4個海岸公園同1個海岸保護區，同樣受到法例保護。海岸公園同保護區面積有24.30km²，供市民欣賞珊瑚等海洋景觀及生物，亦可以進行潛水、獨木舟、風帆及海底攝影等活動。[33]
政府指定嘅郊野地區受到法例保護，並有漁護署管理，自然生態環境得以維護發展。截至2006年6月，境內維管植物超過3,100個物種或變種，當中2,100個係本土植物，油杉（Keteleeria fortunei）、紅皮糙果茶（又稱克氏茶，Camellia crapnelliana）以及大苞山茶（又稱葛量洪茶）等稀有植物已經由漁護署成功繁殖。陸棲哺乳動物則有56種，當中以赤麂、馬騮、赤腹松鼠、臭鼩以及各種蝙蝠最常見。[33]
鳥類方面，喺香港本地繁殖嘅鳥類約有120種。由於香港位處亞洲候鳥遷飛路線上嘅中途站，因此濕地、草原等成為多種野生鳥類嘅棲息地。瀕危品種黑臉琵鷺亦會喺香港過境。位於新界西北部嘅米埔沼澤區最多候鳥棲息，所屬嘅后海灣濕地由1995年起根據《拉姆薩爾公約》列為國際重要濕地。鄰近約61公頃土地喺2000年劃為濕地公園，畀遊客觀賞自然生態。[33]
兩棲類同爬行類動物就合共有超過100種，其中蛇佔50多種，蜥蜴佔20多種，另外有大概24種兩棲類同埋大概10種龜鱉類動物。香港特有種包括鮑氏雙足蜥（Dibamus bogadeki）同埋盧文氏樹蛙，連同其他動物受到《野生動物保護條例》保護。喺南丫島深灣繁殖嘅綠海龜，就係唯一喺香港繁殖嘅海龜。香港境內昆蟲亦種類繁多，包括超過230種蝴蝶、110種蜻蜓，當中亦有香港獨有嘅品種。[33]
至於水生動物方面，由於香港地理位置關係，主要品種都係熱帶嘅，但海流同埋季候風亦會帶嚟啲溫帶品種。香港水域最常見嘅魚類係鯡魚類（Clupeidae）、黃花魚（Sciaenidae）同埋鯛魚（Abramis）等。另外，東部水域由於唔會受到以西北嘅珠江水流影響，珊瑚同埋甲殼類物種亦都較多，全港水域共有84個石珊瑚（Scleractinia）品種。[33]海洋哺乳類動物就以定居於香港嘅中華白海豚同埋江豚最為知名，一年四季都可以喺香港水域見到佢哋嘅蹤影。據漁護署統計，香港同埋珠江口水域至少有1500條白海豚。[35]
氣候
[編輯]
香港嘅地理位置造成海洋性副熱帶季風氣候。喺季候風嘅支配下，四季分明，但氣候大致溫和。北半球冬季嘅時候，亞洲北部大陸聚集嘅冷空氣令氣壓上升，形成吹向海洋嘅乾燥冬季季候風。香港位處大陸南部沿岸，風向所以會係偏北嘅；而季候風吹過大陸，所以帶嚟嘅雨量亦都偏低。至於夏季，南半球正值冬季，當地氣壓上升會令空氣吹過太平洋。所以，香港嘅夏季季候風大致偏南，同時帶嚟大量雨水。[36]
就四季而言，春天大致為3至4月，潮濕、有霧、微雨係常見嘅天氣現象。5月至8月係夏季，太陽高度角大，造成氣溫高企。正如先前所講，東南面嘅太平洋季候風會帶嚟充沛嘅雨量以及熱帶氣旋活動。熱帶氣旋中心移近香港，香港風力會增強，廣泛地區可能會有持續幾日嘅大雨，並且發生山泥傾瀉同水浸。秋季則係9至10月，大部份時間風和日麗、秋高氣爽，啱晒去行山郊遊。冬季就由11月去到第二年2月，歐亞大陸嘅冷源造成氣壓偏高，間中會有冷鋒過境，吹乾燥偏北風。[37]
香港降雨嘅特別之處，就係雨量往往會同地形分佈吻合，咁樣叫做地形性降雨。[38]雖然香港受到季候風嘅影響而會出現季節性風向，但睇勻全年數據，東風都仍然係盛行風向。[39]香港嘅山脈就以東北－－西南排列，山地同盛行風向以直角相交，尤其係向東嘅山地。所以整體而言，地勢同雨量會成正比；而東面雨量亦都會比西面多。呢種情況會叫香港嘅西面做雨影區。[40]
另外，香港市區人口同建築密度高，對城市嘅微氣候亦有所影響。搵石屎冚過嘅土地失去天然散熱功能，市區高樓密佈亦都整到條街好難散熱，令到香港市區出現熱島現象。[40]以2006年10月30為例，當日係農曆九月初九重陽節，本應係秋高氣爽嘅日子，但天文台錄得當日最高氣溫達29.4℃，而全個10月嘅平均溫度亦都有成26.4℃。天文台話咁係同熱島現象有關，而2006年10月就可能成為香港有史以來最熱嘅10月份。[41]香港大學地理系有研究話，喺大廈天台進行綠化有助城市降溫，植物冚住嘅天台同石屎相比較，溫度相差可以有成26℃。港大學者繼而批評政府對天台綠化唔夠積極。[42]
密集嘅市區建設阻擋陽光照射，亦都會令空氣流動減少，汽車廢氣等污染物亦都容易積埋積埋，加深空氣污染。除咗市區嘅商業大廈之外，向海嘅住宅樓宇亦都可能係熱島現象嘅「元兇」。例如，新界嘅元朗站、大圍站、大圍車廠和南昌站上蓋嘅物業發展項目，就被環保組織批評起得高得滯、密得滯，減少空氣流通、阻礙散熱，形成「屏風效應」。[43]
土地利用
[編輯]
作為一個面積得嗰1,100平方公里嘅城市，加上山多平地少，點樣有效利用土地對香港嚟講一直都係個挑戰。香港嘅都市用地可以向三個方向發展：沿住山坡發展、向周邊平地發展、或者填海。向山坡發展成本高昂，而香港海岸線曲折而多淺灣，所以填咗呢啲海灣拓展土地，係幾方便嘅做法。根據1986年一間公司嘅估計，1982年香港開山費用係每平方米120蚊港紙，但填海成本就只需60蚊，填海後賣出地皮嘅收益更係成本嘅三倍，可見填海嘅吸引力[44]。
香港開埠早期，城市發展主要集中喺香港島北岸嘅中西部，成為維多利亞城。另一方面，西人嘅高尚住宅就沿住太平山向上發展。1851年之前，填海拓展土地係私人行為，香港政府係喺1852年將填海納為政府工程嘅[44]，展開文咸填海計劃[45]。之不過，隨後更大規模嘅寶靈填海計劃就遭到當時嘅香港定例局嘅反對，結果擱置咗超過40年，期間令到城內嘅規劃以東西橫向嘅形式發展。[46]
九龍半島方面，開埠早期都重係以私人發展為主。踏入20世紀初，九龍灣啟德濱填海地[47]同九龍塘[48]分別喺1910年代及1920年代曾經計劃發展大型綜合社區，不過都係以失敗告終。前者最後成為啟德機場嘅一部份，後者就變成純高尚住宅區。另一方面，鑑於界限街以南嘅九龍發展接近飽和，香港政府喺1937年決定將獅子山以南原屬新界嘅平坦土地劃作「新九龍」[12]，以作市區用地發展。
新界由於根據1899年《展拓香港界址專條》，英國只係租借99年，所以政府長期未有發展上述新九龍以外嘅新界土地。1951年，香港政府為阻止中國大陸嘅難民湧入香港，設立咗邊境禁區[49]，令到新界北部嘅發展進一步受到限制。自從中國大陸喺1978年實行改革開放，深圳河兩岸嘅發展逐漸出現差異，而家更形成深圳一邊高樓密佈、香港一邊就係荒蕪土地嘅現象。另一方面，1950年代起因為嬰兒潮而導致人口激增，政府喺1960年代起開始策劃第一代新市鎮，1970年代展開建設荃灣、沙田同屯門新市鎮。到20世紀末，政府共發展咗3期、共9個新市鎮，以沙田新市鎮嘅規模最大[50]。現時新界嘅人口已經超越咗香港島及九龍嘅人口嘅總和，新市鎮嘅發展係最主要嘅原因。
另一方面，香港政府拓展土地近年開始遇到一定阻力。終審法院喺2004年1月9日裁定灣仔北填海計劃必須重新檢討[51]，為將來填海發展更添限制。啟德機場原址嘅東南九龍用地自1993年開始進行發展研究，根據 1998年嘅規劃建議，第一批居民更可於2003年遷入[52]，但因為填海嘅爭議而空置多年，截至2007年重未落實最後規劃方案[53]。
另一方面，香港農業逐漸式微，新界農地嘅荒廢同埋城市蠶食情況亦都好嚴重[54]。元朗平原過去係香港稻米嘅主要供應地[55]。但隨住香港人口急劇增長，唔少農民都將原有農地改做園藝作業，種菜呀、花呀呢啲較高收入嘅經濟產物[56]。而家更有唔少農民將農地填高，改做露天貨櫃場畀貨櫃車停泊，或者任由土地丟空，等發展商收購改建大型建築物。呢種土地利用衝突令到郊區出現交通擠塞，亦都會引起視覺及環境污染。[54]
| 住宅 | 商業 | 工業 | 機構 | 運輸 | 休憩用地 | 空置土地 |
|---|---|---|---|---|---|---|
| 77 km² （7.0%） |
3 km² （0.3%） |
25 km² （2.3%） |
23 km² （2.1%） |
53 km² （4.8%） |
21 km² （1.9%） |
29 km² （2.6%） |
| 其他已建設土地 | 農業用地 | 林地、灌叢及草地 | 濕地 | 荒地 | 水體 | |
| 31 km² （2.8%） |
73 km² （6.6%） |
731 km² （66.0%） |
5 km² （0.5%） |
9 km² （0.8%） |
27 km² （2.4%） |
環境問題
[編輯]
香港環境污染嘅問題大致可以歸為廢物、空氣、污水、噪音及光害五類。有分析認為，香港政府要到1970年代至開始重視有關問題[58]。環保處於1981年成立，至1986年升格為署級部門（即今日環境保護署），負責統籌同執行政府環保政策，並就各項計劃提供科學意見。另外，香港亦都根據《基本法》以「中國香港」身份加入多個國際環保條約、條約，當中包括《聯合國氣候變化框架公約》同議定書、《關於特別是作為水禽棲息地的國際重要濕地公約》等[59]。
2006年，香港每日產生嘅都市固體廢物約1.65萬公噸，只係得四成送去循環再造，其餘就運去堆填區處理[60]，堆填區冇幾多年之內就會爆滿[61]。政府近年開始探討利用新式焚化爐解決廢物問題，但係缺點就係成本好貴[62]。
香港嘅空氣污染問題尤其為人詬病，根據2006年8月號《美國商會月刊》刊登商會調查，超過五成受訪者話識得有專才因為自然環境質素差而拒絕來港[63]。香港92%嘅二氧化硫、49%嘅氮氧化物、51%嘅可吸入懸浮粒子源自兩間本地發電廠——中華電力同埋香港電燈，政府因此喺2005年為電力公司設定排放上限。[64]另一方面，政府喺2006年7月展開「藍天行動」計劃，集中向市民宣傳減低空氣污染策略[65]。香港亦都設有一套空氣污染指數系統，每日通知市民空氣質素。
污水方面，香港每日製造約220萬立方米污水，[66]家居、工商業和農業係污水嘅主要來源。[67]香港目前有五個污水處理廠，當中沙田污水處理廠係香港目前最大規模嘅二級污水處理廠[68]。而於噪音方面，就主要受到建築工程、飛機、道路交通同埋鐵路等影響[69]。
雖然維多利亞港夜景有世界三大夜景之一嘅美譽[70]，但咁亦都反映香港受到光害嘅影響。喺旺角、尖沙嘴等商業區，啲舖頭喺夜晚閂門後都重係長期着住啲廣告牌射燈，造成光害[71]。咁做唔單只嘥電，亦都影響附近居民瞓覺，市區更幾乎再睇唔到星星[72]。民間曾經發起香港熄燈行動，抗議光害問題。
參考
[編輯]連出去
[編輯]
- 香港政府統計處：環境、氣候、地理統計資料
- 香港地政總署測繪處：香港地理資料
- 香港天文台：二零零六年天氣概況
- 香港天文台：香港氣候資料
- 淺談香港氣候
- 香港地方
- 《香港古地圖》 第一
- 《香港古地圖》 第二
- 《香港古地圖》 第三
- ↑ 1.0 1.1 地政總署測繪處：香港地理資料PDF，2006年4月更新；當中面積數據嚟自測繪處2005年12月之1:10000地圖數據庫。
- ↑ 地政總署測繪處數據，供其他部門應用。載環保署廢物及水質科學組監察課（2005年）《香港海水水質2004 互聯網檔案館嘅歸檔，歸檔日期2006年11月29號，.》報告等。
- ↑ 香港政府保安局送立法會保安事務委員會文件：《邊境禁區政策》：〈邊境禁區的範圍〉一段，2002年4月。
- ↑ 香港政府年報：《香港2004》，環境·地形與地質篇。
- ↑ 香港地方：香港河流 互聯網檔案館嘅歸檔，歸檔日期2008年6月9號，.。存取於2007年4月17日。
- ↑ 漁農自然護理署：船灣郊野公園。
- ↑ 坐標值採用WGS84基準，取自香港政府新聞處：〈各類統計 互聯網檔案館嘅歸檔，歸檔日期2007年1月9號，.〉，《香港便覽》系列，2007年1月更新。
- ↑ 香港旅遊發展局（2003年）： 維港海上遊 互聯網檔案館嘅歸檔，歸檔日期2007年3月21號，.旁述（英文DOC），見Victoria Harbour一段，第13頁。
- ↑ 央視國際：〈香港將成為東盟與內地最好的貿易往來中轉站 Archive.is嘅歸檔，歸檔日期2012年7月8號，〉，2004年11月26日。
- ↑ 任志剛：〈內地與香港的資金融通：香港可扮演甚麼角色〉，發表於香港經濟峰會2005，2004年12月13日。
- ↑ 政府新聞處：〈民航 互聯網檔案館嘅歸檔，歸檔日期2006年10月25號，.〉，2006年11月。
- ↑ 12.0 12.1 香港法例第1章《釋義及通則條例》附表5：新九龍的範圍。
- ↑ 例如香港警務署將西貢分區劃為「東九龍」部分，見警務署網頁：〈聯絡我們〉，存取於2007年3月19日。
- ↑ 香港政府：《1997年年報》大事紀要。
- ↑ 郭志標：〈漫談粵港周邊 互聯網檔案館嘅歸檔，歸檔日期2006年5月14號，.〉，載2003年1、2月《獵影遊》通訊。
- ↑ 《中華人民共和國國務院令第221號》，載雙語法例資料系統，存取於2007年3月22日。
- ↑ 香港政府新聞處：〈地方行政 互聯網檔案館嘅歸檔，歸檔日期2007年1月21號，.〉，《香港便覽》系列，2006年11月更新。
- ↑ 18.0 18.1 彭琪瑞、薛鳳旋、蘇澤霖編著（1986年）：《香港與澳門》，第25-45頁，香港：商務印書館。ISBN 962-07-5035-7
- ↑ 全港共263個離島，參考地政總署測繪處：香港地理資料PDF，2006年4月更新。
- ↑ 引述自《健力士世界紀錄大全》，見香港立法會：2005年10月28日會議記錄第381頁（李柱銘議員發言）、2006年1月11日會議記錄第2443頁（馬力議員發言）等。
- ↑ 渠務署網站：水浸問題 互聯網檔案館嘅歸檔，歸檔日期2006年10月7號，.，存取於2007年4月21日。
- ↑ 葉匯、林慧玲（2000年）：〈關於香港人口的分佈與其土地利用問題的意見 互聯網檔案館嘅歸檔，歸檔日期2006年11月8號，.〉，載《京港學術交流》第48期，廣州中山大學地球與環境科學學院。
- ↑ 香港天文台：〈香港會發生大地震嗎？ 互聯網檔案館嘅歸檔，歸檔日期2007年1月2號，.〉，存取於2006年12月21日。
- ↑ 香港天文台：〈1979年以來的本地有感地震 互聯網檔案館嘅歸檔，歸檔日期2007年4月20號，.〉，存取於2010年1月31日。
- ↑ 香港歷史博物館：「香港故事」常設展資料 互聯網檔案館嘅歸檔，歸檔日期2007年3月6號，.（PDF），展區一：自然生態環境，第3至12頁。
- ↑ 香港生態情報 P.24-P.30 ISBN 962-04-2386-0
- ↑ 馬鞍山聖若瑟中學歷史科網站：〈礦業及礦工歷史 互聯網檔案館嘅歸檔，歸檔日期2008年4月11號，.〉，存取於2006年12月21日。
- ↑ 環境運輸及工務局：〈香港的石礦場發展 〉，載《工務專刊》第41期，2000年7月。
- ↑ 譚榮康編製（2002年）：《香港的地理環境》，小學四年級常識科教育電視節目。
- ↑ 30.0 30.1 羅楚鵬、胡鳴高（1967年）：《新編香港地理》，第一章〈香港的地理和地形〉第1至6頁，香港：齡記出版公司。香港中文大學圖書館·香港研究館藏，索書號DS 796 H7 L6 HKS.
- ↑ 香港自然網：地理日記，《2003年盛夏·元朗尖鼻咀 互聯網檔案館嘅歸檔，歸檔日期2007年4月13號，.》。
- ↑ 環保署 水質政策及規劃組（2000年）：〈第二次全國海洋污染基線調查：香港特別行政區海域海洋污染基線調查報告 互聯網檔案館嘅歸檔，歸檔日期2004年5月6號，.〉
- ↑ 33.0 33.1 33.2 33.3 33.4 33.5 33.6 香港政府新聞處：〈郊野公園及自然護理 互聯網檔案館嘅歸檔，歸檔日期2007年1月21號，.〉，《香港便覽》系列，2006年6月更新。
- ↑ 香港政府旅遊事務署：〈新界北部綠色旅遊發展計劃諮詢分析報告〉，2005年3月。
- ↑ 漁農自然護理署：〈在香港水域及珠江口一帶有多少海豚？〉，2007年3月16日更新，存取於2007年3月19日。
- ↑ 羅楚鵬、胡鳴高（1967年）：《新編香港地理》，第二章〈香港的氣候〉第7至13頁，香港：齡記出版公司。香港中文大學圖書館·香港研究館藏，索書號DS 796 H7 L6 HKS.
- ↑ 香港天文台：香港氣候。2003年5月4日更新。
- ↑ 圖新書店：香港的氣候水文 互聯網檔案館嘅歸檔，歸檔日期2007年9月29號，.，載全國文化信息資源共享工程網站。存取於2006年11月28日。
- ↑ 香港天文台：1971-2000 年在天文台及橫瀾島觀測之盛行風向及平均風速 互聯網檔案館嘅歸檔，歸檔日期2007年6月9號，.。2005年5月10日更新。
- ↑ 40.0 40.1 彭琪瑞、薛鳳旋、蘇澤霖編著（1986年）：《香港與澳門》，第46-61頁，香港：商務印書館。ISBN 962-07-5035-7
- ↑ 〈今年10月 或史上最熱 互聯網檔案館嘅歸檔，歸檔日期2009年3月15號，.〉，載香港《明報》，2006年10月31日。
- ↑ 馬耀森：〈天台種植物降溫26℃ 互聯網檔案館嘅歸檔，歸檔日期2006年11月17號，.〉，載香港《明報》，2006年9月25日。
- ↑ 〈元朗站上蓋物業 被轟三文治屏風〉，載香港《明報》，2006年7月24日。
- ↑ 44.0 44.1 彭琪瑞、薛鳳旋、蘇澤霖編著（1986年）：《香港與澳門》，第185-196頁，香港：商務印書館。ISBN 962-07-5035-7
- ↑ 楊淑敏：〈開拓新大陸〉，載香港《明報》，2006年11月30日。
- ↑ 何佩然著：《地換山移─香港海港及土地發展一百六十年》，ISBN 962-07-6335-1
- ↑ 「啟德營業有限公司」喺1914年買落嗰幅地皮嘅。見鄭炳鴻、陳婉嫻：〈啟德規劃貪新忘舊〉，載香港《信報財經新聞》P7版，2006年7月17日。
- ↑ 計劃原本由英商所成立嘅「九龍塘發展有限公司」發展，但因1925年創辦人逝世，且發生省港大罷工而告吹。見鄭寶鴻：〈太子道曾叫「英皇子道」〉，載香港《成報》，2005年4月2日。
- ↑ 規劃署：〈禁區的概況 互聯網檔案館嘅歸檔，歸檔日期2007年2月24號，.〉，載《邊境禁區的土地規劃研究》，存取於2007年3月19日。
- ↑ 香港文化博物館：〈舊貌展新顏 互聯網檔案館嘅歸檔，歸檔日期2006年11月18號，.〉，載《新界文物館教育資源套 互聯網檔案館嘅歸檔，歸檔日期2007年9月27號，.》，存取於2007年3月19日。
- ↑ 〈灣仔填海須重檢中環或可繼續 終審︰填海須有凌駕性需要〉，載香港《明報》，2004年1月10日。
- ↑ 拓展署：《東南九龍發展可行性研究：最後地告(修訂版)行政摘要 互聯網檔案館嘅歸檔，歸檔日期2007年2月7號，.》，1998年11月，第7頁。
- ↑ 規劃署：啟德規劃檢討 互聯網檔案館嘅歸檔，歸檔日期2007年1月15號，.
- ↑ 54.0 54.1 文達出版，《地理議題探索5》：城市蠶食產生的問題P.150-P.153，2003年
- ↑ 地理入門，香港農業 互聯網檔案館嘅歸檔，歸檔日期2007年4月26號，.
- ↑ 漁農自然護理署，香港的農業
- ↑ 規劃署：概括土地用途分布情況 互聯網檔案館嘅歸檔，歸檔日期2006年9月12號，.
- ↑ 莊義遜主編（1994年）：《香港事典》〈香港環境保護〉、〈香港的垃圾及其處理〉、〈香港的空氣污染與治理〉等條目，上海科學普及出版社。ISBN 7-5427-0785-X/Z-23
- ↑ 環保署：《2006年年報》第1.3章資源材料：〈國際環保公約和協議選錄 互聯網檔案館嘅歸檔，歸檔日期2007年12月22號，.〉
- ↑ 〈10年減廢大計 焚化措施最貴〉，載香港《明報》，2007年1月4號。
- ↑ 〈廢物 互聯網檔案館嘅歸檔，歸檔日期2007年5月13號，.〉，載環保署2006年年報。
- ↑ 〈垃圾費或毋須百元〉，載香港《明報》，2007年1月5號。
- ↑ 〈美商會調查顯示有專才考慮離港 空氣污染令外商減少投資〉，載香港《蘋果日報》A4版，2006年8月28日。
- ↑ 〈空氣 互聯網檔案館嘅歸檔，歸檔日期2007年4月16號，.〉，載環保署2006年年報。
- ↑ 〈藍天行動正式展開 互聯網檔案館嘅歸檔，歸檔日期2007年4月27號，.〉新聞稿，環保署：2006年7月25日發佈。
- ↑ 渠務署（2006年）：〈污水收集策略 互聯網檔案館嘅歸檔，歸檔日期2007年4月7號，.〉，存取於2007年2月21號。
- ↑ 環境教育網：〈香港的水質污染 互聯網檔案館嘅歸檔，歸檔日期2007年4月20號，.〉，存取於2007年2月21號。
- ↑ 香港渠務署：2007年沙田污水處理廠開放日展板 互聯網檔案館嘅歸檔，歸檔日期2007年3月14號，.
- ↑ 環境保護署：環境保護香港1999 - 噪音 互聯網檔案館嘅歸檔，歸檔日期2007年12月22號，.
- ↑ 人民網：遊玩寶典：2006香港十大旅遊景點 互聯網檔案館嘅歸檔，歸檔日期2008年4月24號，.，2006年4月13日
- ↑ 《星島日報》：環保觸覺建議立法關招牌燈減光害 互聯網檔案館嘅歸檔，歸檔日期2007年9月26號，.，2007年3月11日
- ↑ 香港《文匯報》：〈浪費電力 破壞生態 引發眼疾 光害嚴重 難見繁星民間 互聯網檔案館嘅歸檔，歸檔日期2007年12月23號，.〉，2007年3月3日