1976年夏季奧林匹克運動會

1976年夏季奧林匹克運動會係第21屆現代奧林匹克運動會，1976年7月17號到8月1號喺加拿大滿地可搞。

賽事焦點

• 為咗抗議曾經率領十五人欖球國家隊訪問種族主義南非共和國嘅紐西蘭代表團參加呢屆奧運會，剛果人民共和國嘅體育官員Jean-Claude Ganga率領30個非洲國家聯合杯葛呢屆夏季奧運會，包括阿爾及利亞、貝寧人民共和國、喀麥隆、中非共和國、乍得、剛果人民共和國、埃及、埃塞俄比亞、加蓬、岡比亞、加納、肯尼亞、萊索托、利比亞、馬達加斯加、馬拉維、馬里、摩洛哥、尼日爾、尼日利亞、索馬里、蘇丹共和國、斯威士蘭、坦桑尼亞、多哥、突尼西亞、烏干達、上伏塔、扎伊爾同埋贊比亞（但係，埃及、喀麥隆、摩洛哥、突尼西亞嘅代表團退出奧運會之前，有部分選手參加咗7月18號到7月20號嘅部分比賽），反而塞內加爾、象牙海岸就冇參與杯葛行動，照樣派代表團參加。
• 時任加拿大總理皮耶·杜魯多要求中華民國代表團以「台灣」隊名義參賽，畀中華民國政府（當時嘅中華民國總統嚴家淦、行政院院長蔣經國）拒絕咗，响溝通無效之後，中華民國代表團响7月16號宣佈退出呢屆夏季奧運會。
• 除咗非洲30國同埋中華民國之外，另外亦有9個國家缺席呢屆夏季奧運會，包括阿爾巴尼亞、阿富汗、緬甸、柬埔寨、敘利亞、伊拉克、斯里蘭卡、圭亞那同埋薩爾瓦多。
• 喺1972年嘅慕尼黑慘案後，呢屆奧運會嘅警衛高度加強。
• 游水比賽嘅成績出色，响26個項目中，一共刷新咗25個奧運會紀錄同埋21項世界紀錄。
• 年僅14歲嘅羅馬尼亞體操選手歌曼妮芝响體操比賽中，合共攞到7個滿分10分，重贏得3個金牌。
• 德國西洋劍手湯馬士巴哈有份代表聯邦德國攞到男子花劍團體冠軍，之後响2013年當選國際奧委會主席。
• 籃球、手球同埋扒艇嘅女子項目進入奧運會。
• 為咗保護運動員嘅身體健康，推舉唔再成為奧運舉重項目。
• 奧運聖火以人造衛星由希臘雅典「傳送」到加拿大首都渥太華，再由渥太華以接力跑形式去到呢屆奧運會主辦城市滿地可，响開幕禮當日抵達滿地可奧林匹克體育場，呢種以現代科技傳遞聖火嘅方式引起爭議，由1980莫斯科奧運開始，又回復番傳統嘅奧運聖火接力跑活動。
• 呢屆奧運聖火曾經响開幕禮後幾日（當日係7月27號）嘅一場暴雨中被雨水淋熄咗，一位工作人員以打火機重新點燃火種。後來大會撲熄呢團火種，並以聖火嘅備份火種重新點燃聖火。
• 加拿大作為呢屆奧運會嘅東道主，最終只係獲得5個銀牌同埋6個銅牌嘅成績，成為夏季奧運會有史以嚟唯一一個攞唔到金牌嘅東道主。
• 因奧運場館使得太多錢起，所以加拿大政府出現經費短缺而向市民收取「奧運稅」。