Nipin
Manawan/Wemotaci
Nikotwaso tatino e estakoki nahwe tca peikw e nipik ka icinikatcikatek enko nahwe niapitc ko e mawotci kicitek. E nipik, kinec ko kicikaw patak e pipok. Nictana acitc peikw otehimin pisimw kitciprin nac nictana acitc nicw kakone pisimw ickwapirin. Ekoni kaie ni apitc kirowe ka micta mireritakok e pamatisinaniwok notcimik. E nipik ko kaie ickwa pitakewokw awacak e kiskinohamasotcik kiskinohamatokamakokw. We tci tca itoniwok nipin, aci e nokok nipi askik.
E aititoskaniwok
E nipik micta mitceno kekocica keki totcikatek. Mitowi e nta pakitohaniwok e nta arakaniwitc arapi nipik. Notcinaniwon matci kirika nta kipecinaniwon. E nta mowisonaniwok patoc ko otatakon pisimw matci aci nte osekwaniwon anihe minic. Picicikw tepirak names mowakiniwiw e mekwa nipik, aska kaie tepirak minic mitcinaniwon kekotc kotakihik wominanik ka nitawokitcik notcimik. Tawok kirika atita ka mita kanowerimatcik awesisa e apiciciritci tepirak e awoketcik. Kotakihi ititoskewina. Pakitahwaniwon, pamatahonaniwon, pokwane manikwasaniwon, ponapaniwon, tikinakanikaniwon, kitikaniwon, kisisawaniwon minic, masko atoskaniwon, matceatohonaniwon, manin otapaniwon, cowerimawsowin, mos atoskaniwon, mowisonaniwon, nta notcinaniwon, natarapaniwon, notcirewaniwon wakinaskwaniwon, wepahapaniwon, wecitorinaniwon, wikwamotekaniwon, akotcorakanikaniwon, askoswekamonaniwon, asekaniwon, actorinaniwon, arapikaniwon, ickipitatanatikokaniwon, osekwaniwon, onikamikaniwon. (Gilles Ottawa ka ki masinahamokoponen ni apitc 19 mikomini pisimw 2005)
E itatisokaniwok
E nipik, mocak ko copectew nipi. Ekote ke kaie e ici pe otciprik anihe ka icinikatcikatek nipin. Takon kaie atisokan ka arimomakniwitc Nipinatcac kaie Kiwetinisiw. Nictam ka nikickotatomakak anihe estakok e icinakok Nipinitcac wir tipirowe motatam estakonik mina kewir kiwetinisiw motatam anihe ka icinikatek e icinakok itewin kiwetin ite e ici actek kiwetinok nikotc e icinakok ka ici matcaniwok.