Rústicu

Rústicu [ˈrʊ^ht^hiku] (en latín Quintus Iunius Rusticus, [ˈkwɪntʊs ˈjuːnɪʊs ˈrʊstɪkʊs]) hue un políticu i filósofu romanu. Nació pa primerus el sigru II, quiziá nietu Arulenu Rústicu i iju dotru Quintu Júniu Rústicu. Acupó emportantis puestus ena aristocracia emperial, huendu consúli pol dos vezis, la primera nel 133 comu sufetu i nel 162 comu ordináriu. Tamién trebajó en prefetura la ciá i holmó parti el Conseju Emperial. Pero polo que mas hue conociu Rústicu hue pola nombreria comu filósofu estoicu, toa una eminéncia nel sigru II. La corti lo precuró comu endirgaol el jovin Cesa Marcu Uréliu i hue pol mé de quien el huturu emperaol abraçó la filosofia estoica. Enos Revacaerus I 7 qu’escrebió el emperaol en estuviendu en campaña, mienta al filósofu comu ejempru moral i l’agraeci el beli desapartau de las artis retólicas i puéticas i beli envereau ena filosofia conos escritus Epitetu.