Friisk Foriining
Jü Friisk Foriining as en nordfriisk kultuurforiining ma än for da Frasche önj Nordfraschlönj. Müülj as dåt stipen foon e nordfrasch spräke än identiteet. Jü foriining as 1923 grünläin wörden än heet diling amänbai 600 lasmoote. Ouerdåt da friiske en äinen spräke än en äin kultuur hääwe, betråchtet e Friisk Foriining e friiske följkefloose as en äin följk än en autochthon manerhäid önj Tjüschlönj, sü as da sorbe önj e Lausitz. Et wichtist müülj for e Foriining as et bewååren foon än e stipe for e friiske spräke än kultuur.
Histoori
[Bewerke | Kweltekst bewerke]E Friisk Foriining wörd 1923 uner e noome „Friesisch-Schleswigscher Verein“ grünläid. E Friisk Foriining Foriining betråchtet foon önjfång önj e friiske spräke än e friisk kultuur as en äin än likberuchtid grutelse önjt tjüsch-dånsch gränslönj. Et hoodmüülj foon e Foriining as et årbe fort bewååren än ütbagen foon e friiske spräke än en friisk identitäät.E Friisk Foriining, wat bit 1933 ma en äin “Liste Friesland” bai woole apastald häi, heet eefter 1945 et tuhuupeårbe ma e dånsch manerhäid intensiwiird. 1948 wörd e Söödslaswiksche Wäälerferbånd (www.ssw.de) foon dånsche än friiske grünläid, am sü gemiinsoom da politische inträse tu fertreesen. Tu tids as üüs stjörlasmoot Lars Harms ån foon fjouer SSW-fertreesere önj e slaswik-holstiinsche loondäi.Di feriinsnoome wörd 1948 tu Foriining for nationale Frashe, än 1975 tu Foriining for nationale Friiske amnååmd. Sunt 2003 håt di feriin Friisk Foriining.
Apgoowe
[Bewerke | Kweltekst bewerke]E Friisk Foriining årbet diling for ålem for e stipe foon e Nordfrasche spräke än kultuur. Di feriin stipet et apstalen foon twärspräklike toorpsschilde, än e ütbaig foon e Fraschunerrrucht aw dånsche än tjüsche schoule önj e kris Nordfraschlönj. Önj e berik schoule årbet e Foriining ma e dånsche schöljferiin tuhuupe, wat önj möre schoule friisk önjbüt än ma Risem Schölj (www.risumskole.de) et iinjsist schölj bedraft, weer e friiske spräke tubai dånsch än tjüsch uk unerruchtsspräke as. Önj tuhuupeårbe ma e jöögedferbånd Rökefloose wårde aktiwitääte önj e fritids- än jöögedberik önjbin, weer for ålem friisk snååked wårt.
E Friisk Foriining organisiirt uk räise tu oudere spräkemanerhäide önj Europa än büt arks iir en sü nåmd friisk harfsthuuchschölj önj ma ünlike kreatiiwe kurse for biise wåksene än bjarne.
Foon moundis bit fraidis wårde arken däi tisinge for en webraadio produtsiird, wat tu arks tid uner www.friiske.de önjhiird wårde koone.