Johann Jakob Kaup

Johann Jakob Kaup

Biografía
Nacemento	20 de abril de 1803 Darmstadt, Alemaña
Morte	4 de xullo de 1873 (70 anos) Darmstadt, Alemaña
Educación	Universidade de Gotinga Universidade de Heidelberg
Actividade
Campo de traballo	Zooloxía
Ocupación	paleontólogo, naturalista, ictiólogo, ornitólogo, zoólogo, profesor universitario
Membro de	Accademia delle Scienze di Torino (1846–) Leopoldina
Obra
Abreviatura do autor en zooloxía	Kaup
Descrito pola fonte	Nordisk familjebok Allgemeine Deutsche Biographie (pt) Dicionario Enciclopédico Brockhaus e Efron

Johann Jakob Kaup, nado o 10 de abril de 1803 en Darmstadt, capital do Landgraviato de Hessen-Darmstadt, Sacro Imperio Romano-Xermánico (hoxe no Land de Hessen), e finado o 4 de xullo de 1873 na mesma cidade, foi un paleontólogo e naturalista alemán.

Traxectoria

Pentagrama de Kaup que representa a estrutura da familia dos córvidos.

Estudou en Gotinga, en Heidelberg e, durante dous anos. en Leiden, cidade na que comezou a dedicarlle a súa atención aos anfibios a aos peixes. Logo regresou á súa cidade natal para traballar como asistente nun museo, onde, en 1840, sería o seu inspector.

En 1829 publicou Skizze zur Entwickelungsgeschichte der europäischen Thierwelt ("Bosquexo da historia do desenvolvemento da fauna europea"), obra na que describiu o mundo animal como unha entidade desenvolvida en escala de menor a maior, desde os anfibios, pasando polas aves até as aves de rapina. Pero posteriormente renegou a súa propia obra, considerándoa unha indiscreción propia da súa xuventude. Porén, tamén manifestouse en desacordo coas ideas expresadas por Charles Darwin na súa obra cumio, A orixe das especies.

Os grandes depósitos de fósiles que se encontraban nos arredores de Darmstadt déronlle a oportunidade para realizar estudos paleontolóxicos, cos que acadou unha considerábel reputación grazas á publicación da súa obra Beiträge zur näheren Kenntniss der urweltlichen Säugethiere (1855–1862). Tamén escribiu Classification der Säugethiere und Vögel (1844) e, xunto a Heinrich Georg Bronn, Die Gavial-artigen Reste aus dem Lias (1842–1844).

Faleceu na súa cidade natal, Darmstadt, o 4 de xullo de 1873.

Importancia na paleontoloxía

Un incidente particularmente importante na historia da paleontoloxía involucra a Kaup. En 1854 comprou o mastodonte americano encontrado en 1799 no condado de Orange, estado de Nova York. Este foi o mastodonte que sería inmortalizado na pintura de Charles Willson Peale que representa a escavación de 1801 (a pintura foi realizada entre 1806 e 1808). Este animal estivo en exposición durante varios anos no Museo de Peale, e actualmente pode apreciarse en Darmstadt. Este mastodonte é o primeiro exemplar completo que se encontroo nos Estados Unidos, e é o segundo animal fósil que se exhibiu en toda a historia.

Algunhas publicacións

• 1829 - Skizze zur Entwickelungsgeschichte der europäischen Thierwelt.
• 1832 - Neuen Jahrbuch für Mineralogie, Geognosie und Petrefaktenkunde.
• 1842-1844 - Die Gavial-artigen Reste aus dem Lias. (En colaboración con Heinrich Georg Bronn)
• 1844 - Classification der Säugethiere und Vögel.
• 1855-1862 - Beiträge zur näheren Kenntniss der urweltlichen Säugethiere.

Abreviatura

A abreviatura Kaup emprégase para indicar a Johann Jakob Kaup como autoridade na descrición e taxonomía en zooloxía.

Véxase tamén

Bibliografía

• Este artigo é unha obra derivada da edición de 1911 da Encyclopædia Britannica, dispoñíbel sen restricións coñecidas de dereito de autor. Esta obra derivada encóntrase dispoñíbel baixo as licenzas GNU Free Documentation License e Creative Commons Atribución-CompartirIgual 3.0 Unported.

Ligazóns externas

• Georg Heldmann Kaup, Johann Jakob. En: Neue Deutsche Biographie (NDB). Vol. 11, Duncker & Humblot, Berlin 1977, pp. 369 f.