Aditi

Miturut layang Mahabharata, Dewi Aditi (Sanskerta: अदिती; Aditī) iku putrane Sang Hyang Daksa, utawa wayahe Bathara Brahma. Kagarwa Maharesi Kasyapa (Maharesi ing kaswargan), peputra 12 (dwadasyaditya = Aditya 12).

Wondene asmane para Aditya 12 (dwadasyaditya), yaiku: (1)Hyang Datri, (2)Hyang Mitra, (3)Hyang Sakra (Indra), (4)Hyang Bharuna, (5)Hyang Angsa, (6)Hyang Waga, (7)Hyang Wiwaswat (Bathara Surya), (8)Hyang Pusa, (9)Hyang Sawitri, (10)Hyang Ariyaman, (11)Hyang Twastri, (12)Hyang Wisnu.

Tembung Aditya tegese putrane Aditi, tedhake Aditi. Salaras karo tegese Pandhawa (putrane Pandhu), Yadawa turune Yadu, Ditya turune Dewi Diti, Denawa trahe Dewi Danu, lan sakpanunggale.

Miturut crita pedhalangan, Sang Hyang Sakra (Bathara Indra) lan Sang Hyang Wisnu iku putrane Bathara Guru lan Dewi Uma (Umayi). Dene, Hyang Wiwaswat (Bathara Surya) putrane Sanghyang Ismaya lan Dewi Senggani.

Sarasilahe para dewa kang kasebut ing buku-buku pedhalangan, akeh-akehe mirip karo kang kasebut ing layang Paramayoga.