Nicolaus Turczaninow

Nicolaus Stephani filius Turczaninow (Russice Никола́й Степа́нович Турчани́нов), anno 1796 in vico Nicetinano^[1] natus et 26 Decembris anno 1863^[2] Charcoviae mortuus, fuit botanista Russicus. Circa 150 genera et plus quam mille species plantarum primo descripsit.

Vita et opera

In familia nobili natus, herbaria a prima iuventute colligebat; in gymnasiis Voronegiae et Charcoviae et in Universitate Charcoviensi (1811—1814) educatus, Petropolim migravit, ubi in Ministerio Iustitiae officio fungebatur. Botanicae ut amator, sed strenuissime operam dabat, Carolo Trinio^(ru) et Fridericο Fischer^(ru) familiaris; Turczaninowii opus primum, index florae Petropolitanae Russice compositus (1825), 646 species includit et Gregorii Sobolewski Floram Petropolitanam praevaluit.

Ab anno 1828 Ircutiae laborabat et anno 1830 socius Academiae Scientiarum electus est, ut expeditiones per Cisbaicaliam, Transbaicaliam et Dauriam faceret. Anno 1833 expeditio Turczaninowii per Schilcam ad confluentiam cum Arguno et per Amurem ad Albasinum navigavit; altera a Nertschia ad Kiachtam ivit. Alia itinera ad Alpes Sochondenses Turczaninow fecit, bis per Saianes Orientales in Mongoliam, trans iugum Baicalense et ad fontes Bargusini; Angarae ripas imvestigans, per tractυm Iacuticum circa 100 chm pedestris progressus est. Circa 60 000 foliorum herbarii tunc Turczaninow collegit et librum suum nobilem, Floram Baicalensi-Dahuricam composuit. Augustino et Alphonso de Candolle tunc centurias foliorum misit ad Prodromum systematis naturalis regni vegetabilis componendum.

Herbarium et postea augebat et multas collectiones adiunxit; e.g., Porphyrius Kirilow Occae et Ircuti valles exploravit et exempla Turczaninowio collegit. Universitati Charcoviensi id reliquit; nunc Kioviae in Instituto Botanices servatur.

Genus Turczaninoviella et permultae species nomine Turczaninowii appellantur.

*Pulsatilla turczaninovii* nomine Nicolai Turczaninow nuncupata

Opera Latina

Decades tres plantarum novarum Chinae boreali et Mongoliae chinensi incolarum // Bulletin de la Société Impériale des Naturalistes de Moscou, 1832. — № 5. — P. 180—206.
Enumeratio plantarum quas in China boreali collegit et mecum benevole communicavit cl. medicus missionis Rossicae Porphyrius Kirilow // Bulletin de la Société Impériale des Naturalistes de Moscou, 1837. — 10, № 7. — С. 148—158.
Catalogus plantarum in regionibus Baicalensibus et in Dahuria sponte crescentium // Bulletin de la Société Impériale des Naturalistes de Moscou,1840. — 11, № 1. — С. 85—107.
Flora Baicalensi-Dahurica, seu, Descriptio plantarum in regionibus Cis- et Transbaicalensibus atque in Dahuria sponte nascentium. — Mosquae 1842—1856.
Animadversiones in partem herbarii Turczaninowiani nunc Univers. С. Charkow : ad II partem — Mosquae 1854—1858.

Notae

↑ Nikitovka nunc in regione Leucopolitana.
↑ Calendario Iuliano, scilicet 7 Ianuarii 1864 Gregoriano.

Nexus externi

Lexica biographica: • Deutsche Biographie • • IPNI

De Nicolao Turczaninow in Lexico encyclopaedico Brockhaus et Efron (Russice)

Siglum eius nominibus botanicis subscriptum est "Turcz." (apud IPNI reperiendum)

[1] Nikitovka nunc in regione Leucopolitana.

[2] Calendario Iuliano, scilicet 7 Ianuarii 1864 Gregoriano.

[1]

[2]