Protozoa
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
De protozoa zint 'n neet-lenger erkandje resgroep van eincellige, eukaryotische micro-organisme, die neet behuère tót de plantje, sjummele, dere en Chromista (mit ónger anger de broenwiere en diatomeeje).
De protozoa woorte in veer gruup verdeildj nao de waeg worop ze zich veurtbewaege:
- Flagellata of zweepdere: dees bezitte zweepdräöj womit ze zich kónne veurtbewaege en veuje;
- Ciliophora of trilhaordere: dees höbbe klein trilhäörkes euver de ganse cel. Mit dees trilhäörkes kónne ze zich veurtbewaege en veuje, wie pantoeffeldere;
- Amoebozoa: dees höbbe gein vaste vorm en höbbe sjienveutjes. Mit dees sjienveutjes kónne ze zich veurtbewaege en veuje, wie amoebe;
- Apicomplexa of späördere: dit zint ingewikkeldje eincellige eukaryoate die veural es parasiete laeve, wie plasmodium, de veroarzaker van malaria.
De protozoa waere allewiel nao häör fylogenetische aafstamming verdeildj euver de versjillendje supergruup.