Vught

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Vught is e versteidelek dörp en 'n gemeinte in de Nederlandse provincie Noord-Braobant, ten zuie vaan De Bos, mèt 'n oppervlak vaan 34,46 km² (daovaan 0,51 km² water) en 'n bevolking vaan 26.014 op 1 april 2016. Binne de gemeinte Vught ligke ouch 't dörp Cromvoirt en 't gehöchter Bergenshuizen en Loveren.

Gemeinteleke functies

Vught is 'n forenzeplaots, in hoeg maote veur welgestelde lui, die es veurstad vaan De Bos functioneert. Binne de gemeintegrenze ligk de bes beveilegde gevaangenis vaan Nederland, de Penitentiaire Inriechting Vught. De stad heet 'n spoorweegstatie aon de lien De Bos-Eindhove. Door Vught lup ouch de N65 vaan De Bos nao Tilburg.

Dörpsaonziech

Vught heet väöl nuibouw, meh de dörpskern is redelek bewoerd gebleve. De kèrk steit in originele Kempese gotiek. 't Raodhoes woort in 1901 es villa gebouwd en woort in de jaore daarteg door de gemeinte oonteigend. In de umgeving ligk 't Renaissancekestiel Maurick. Väöl vaan 't gemeinteoppervlak is bebos; in dit bosgebeed ligke e groet aontal villa's. Op de fusilladeplaots vaan 't aw concentratiekamp steit allewijl 'n oorlogsmonumint.

Historie

Vught is 'ne nevevörm vaan "vocht"; de bojem is hei vaanaajds vochtig in verglieking mèt de druug Pieël. In de Roemeinsen tied moot Vught ouch mie es 'n doorsnei nederzètting zien gewees, wie bliek oet 'n vons vaan aw Roemeinse munte in 1961. In de vreug Middeliewe waor de plaots vaan groet regionaol belaank: in 1028 kraog ze muntrech, in 1050 tolrech.

In 1933 woort de gemeinte Cromvoirt aon Vught touwgevoog. In d'n Twiede Wereldoorlog laog in Vught e concentratiekamp; dit woort later es woenplaots veur Molukkers gebruuk. Vught stoont ouch bekind um de villa de Zionsburg, die op 7 december 2003 gans aofbrande. Heibij kaom de kestielhier dee 't pand bewoende, Ewald Marggraff, um 't leve. Allewijl stoon allein nog de mör euvereind.