Hugo Chavez

Quel articul chì l'è scrivüü in Lumbard, cun l'urtugrafia insübrica ünificada.

	«Somos Obreros, somos Chavistas y decimos viva la Venezuela Socialista!!!!!! »

Hugo Chávez, 2008

La firma de l'Hugo Chávez

Hugo Rafael Chávez Frías ['uɣo rafa'el 'tʃaβes 'fɾias] (* 28. Lüj 1954 a Sabaneta; † 5. Mars 2013 a Caracas) l'è staa un pulitegh e statista venezuelan. Del 1999 fin a la mort in del Mars del 2013 l'è staa el premier del Venezuela indua l'ha traa inans una mota de refùrm a faùr de la gent cumün, di pòer, di tusànn e di Indios.

A l'è staa anca 'l leader del partii pulitegh ciamaa Muiment Quinta Repübliga del di de la sua fundassiun in del 1997 finn al 2007, quand che l'è vegnüü vün cunt una mota de partii de la senistra venezuelana, e l'ha daa vita al Partii Suzialista Ünii Venezuelan (PSUV), che lü medèm l'ha guidaa finn al di de la sua mort.

Cunt la sua pulitega pragmatega incentrada in sü la figüra del Simón Bolívar e 'n sü l'ideja d'un' Ameriga Latina ünida cuntra l'upressiun statünitensa, l'ha faa cünt de giuntà insèma Cumünism, Suzialism e Fee Cristiana in quèl che l'è staa ciamaa 'l Suzialism del vintünesem secul. Cunt el trà inàns refurm suziaj e pulitegh cumpagn de partezipassiun pulitega slargáda a tücc (el l'ha traa via l'inscii ciamada "tassa de la gabina eluturala", inscí che tücc poden vudà, anch i puarít, e minga dumà i sciurèt), nassiunalizzassiun di ressurs natüraj del paes, che la rendüü pussibel pumpà danee in de l'istrüssiun e la sanidaa püblega, l'è staa bun de utignì giüstizia e standard de vita ben püsee volt in gran toch del paes. Segund i Nassiun Ünii ("ONU"), dürant ij agn de la presidensa del Chávez, la qualidaa de la vita di Venezuelan l'è 'ndada sü d'un bel toch, e 'l nivèl de puertaa l'è 'ndaa sgiò del 48,6 percent in del 2002 al 29,5 percent in del 2011.

Vida de piscininn - Prim agn de vita

Sabaneta, Barinas, indua che'l Chávez l'è nassüü e chersüü.

L' Hugo Chávez l'è nassüü 'l vintòt de Lüj del 1954 in de la cà de la mama del so papà, Rosa Inéz Chávez, una mudesta cà de tre camber, tre stansít pütost piscinít, lucada in del vilagg rüral ciamaa Sabaneta, in de l'estaa venezuelan ciamaa Barinas. La faméja Chávez l'eva de radis Indios, negher african, ed Ispagnö. I sò vegg, Hugo de los Reyes Chávez e l'Elena Frías de Chávez, eren master de scöra che viveven e lauraven in un paesin ciamaa Los Rastrojos.