Tocantins

Quest articol chì l'è scrivuu in lombard, grafia milanesa.

El Tocantins (parnonziaa [tukɐ̃ˈtʃĩs] o [tokɐ̃ˈtʃĩs]) l'è un fium del Brasil centro-settentrional, longh pressapoch 2.450 km: a l’è el segond fium pussee grand che l’è tutt in del territori brasilian, dree del São Francisco. In de la stagion di piogg a l’è navigabel per pressapoch 2.000 km.
Normalment a l’è consideraa coma vun di affluent del Rio di Amazzon, ma in realtàa el và a finì in de l’Ocean Atlantegh fianch a fianch cont el Rio di Amazzon, in d’on alter canal fluvial ciamaa fium Pará. El sò basin idrografegh l’è spantegaa in d’ona area de 803.250 km2, e l’è donca el pussee grand tutt in del Brasil.

El sò nomm el vegn de la lengua Tupì, vuna di principaj lengov indigen de l’America del Sud: el voeur dì “becch del tucan”, e l’è on compost de tukana (tucan) e tĩ (becch). El “becch” a l’è la forma in su i cart geografegh del cors del Tocantins e del so affluent pussee important, el fium Araguaia.
El dà el nomm al staa brasilian omonem, el pussee noeuv de la federazion, faa su del 1990.

El nass in di montagn de la Serra dos Pireneus, in del staa de Goiás in del center del paes, minga lontan de Brasília. El bagna i staa de Goiás, Tocantins, Maranhão (frontera cont el Tocantins) e Pará. In del staa de Pará gh’eran finn a i agn ’80 tant cascaa e rapid, che hinn staa inondaa cont la costruzion de la diga de Tucuruí, la segonda pussee granda del Brasil, dree domà de la diga de Itaipù (per metàa in del Paraguay).

I grands fiœm del mond