Baja

Baja, dikana juo sabagai logam paduan basi baja kareh (Bahaso Inggirih: Steel) adalah logam paduan, logam basi nan baguno sabagai unsur dasa diagiah jo babarapo elemen lainnyo, tamasuak unsua karbon. Basi dapek tabantuak manjadi duo bantuak kristal yaitu Body Center Cubic (BCC) dan Face Center Cubic (FCC), tagantuang dari tempratur panehnyo katiko dibuek. Dalam susunan bantuak BCC, ado atom basi ditangah-tangah kubuih atom, dan susunan FCC mamiliki atom basi di satiok sisi pado anam sisi kubuih atom. Interaksi alotropi nan tajadi antaro logam basi jo elemen pamadu, sarupo karbon, nan mambuek baja jo basi tuang mamiliki ciri khas nan ado pado dirinyo.

Kandungan unsua karbon dalam baja bakisa antaro 0.2% hingga 2.1% dari barek kasaluruhan baja tasabuik sasuai grade-nyo. Elemen barikuik ko salalu ado dalam baja: karbon, mangan, fosfor, sulfur, silikon, sarato sabagian ketek oksigen, nitrogen dan aluminium. Salain itu, ado elemen lain nan ditambahkan untuak pambedo karakteristik antaro baberapo jinih baja diantaranyo: mangan, nikel, krom, molybdenum, boron, titanium, vanadium dan niobium.^[1]

Bilo variasinyo pado kandungan karbon jo unsua paduan lainnyo, babagai jinih kualitas baja dapek diambiak. Fungsi karbon dalam baja adolah sabagai unsua pangareh dangan mancagah dislokasi baranjak pado kisi kristal dari atom payusun basi. Bilo indak ado karbon ko mako struktur kristal dari basi murni indak mamiliki resistensi antar atom dan akan saliang malewati satu samo lain, atau manjadi lunak. Baja karbon ko dikana sabagai baja hitam karano bawarna hitam, banyak digunoan untuak paralatan partanian misanyo sabik dan pangkua.

Panambahan kanduangan karbon pado baja dapek maningkatkan kareh dan kakuatan tariknyo, namun di sisi lain mambueknyo manjadi getas sarato manurunkan keuletannyo.

Meskipun baja sabalunnyo alah diproduksi dek pandai basi manggunoan tungku baka salamo ribuan tahun, panggunaannyo manjadi samakin batambah katiko metode produksi nan labiah efisien ditamukan pado abad ke-17. Dangan panamuan proses Bessemer di patangahan abaik ka-19, baja manjadi material produksi massal nan mambuek harago produksinyo manjadi labiah murah. Kini, baja marupokan ciek dari material paliang umum di dunia, dangan produksi labiah dari 1,3 miliar ton tiok tahunnyo manggantian basi tempa. Baja marupokan komponen utamo pado bangunan, infrastruktur, kapa, oto, masin, pakakeh, jo sanjato.

Baja modern sacaro umum diklasifikasikan badasarkan kualitasnyo dek babarapo limbago standar. Proses pamurnian lanjutan, sarupo basic oxygen steelmaking (BOS), manggantian sabagian basa metoda-metoda lamo dangan manurunkan biayo produksi jo maningkatkan kualitas produk akia.

Rujuakan

↑ Ashby, Michael F. and Jones, David R. H. (1992) [1986]. Engineering Materials 2 (edisi ke-with corrections). Oxford: Pergamon Press. ISBN 0-08-032532-7.

Pautan lua

Cari tau tantang Baja di proyek-proyek Wikimedia lainnyo:
	Definisi dan terjemahan dari Wiktionary
	Gambar dan media dari WikiCommons
	Buku dari Wikibooks
	Entri basis data #Q11427 di Wikidata

Media tantang Baja di Wikimedia Commons

[EM2-1] Ashby, Michael F. and Jones, David R. H. (1992) [1986]. Engineering Materials 2 (edisi ke-with corrections). Oxford: Pergamon Press. ISBN 0-08-032532-7.

[1]