Albert Sassen

Albert Sassen (Troapel, 1921 - Hoaren, 1999) was een Grunninger taalkundige die veule betiekend hef veur de studie van 't Nedersaksisch, mit name 't Drèents en umliggende variaanten.

Tiedens de Duutse bezetting zat Sassen onderedeuken in Fluitenbarg. Veur 't aprilnummer 1946 van 't Drèentse culturele tiedschrift Erica leverde e onder de schrieversname Willem van Fluitenberg 't gedicht 'De Reuze', een parodie op Goethe zien 'Erlkönig'. 't Begunt mit:

Wie ridt daor zo late deur nacht en deur wiend?
't Is een vaar mit achter op zien fietse zien kiend.
Hij hef 't jonchien bij de naarmpies goed vast
En 't kiend hef van kolde gien last.

Mit Willem Diemer schreef e onder de schrieversname Sander Siemes de novelle Als het leven roept, mit dialogen in 't Drèents en Grunnings, die kört nao de oorlog eerst as fulleton in Het Vrije Volk stund.

Sassen studeerde Nederlaands (feilijk Nedersaksisch), Fries en Oldgermaans. In zien studietied was zien hoogleraar perfesser Overdiep van grote invloed op hum. In 1953 studeerde e bij G.A. van Es of op Het Drents van Ruinen. 't Materiaol veur dit proefschrift had e diels in zien onderdukerstied bij menare ebracht. Een bulte inwoners van Drenthe, de Stellingwarven en Aoveriessel vreug e uut aover heur streektaal. Zien proefschrift giet niet allennig aover 't Ruunders, mar gef ok inzicht in 't Saksisch van aandere dielen van Drenthe, van de Stellingwarven en van Noordwest-Aoveriessel. Krek as aandere bestudeerders van streektalen, gunk 't Sassen bename aover klaanklere, vervoegings, verbugings, woorden en woordvörming.

Sassen was ien van de kandidaoten veur 't hooglererschop Nedersaksisch det in 1953 inericht wördden an de Rieksuniversiteit Grunning, mar die post gunk uutendelijk naor Klaas Hanzen Heeroma. Van 1970 töt 1986 was Sassen in Stad hoogleraar Nederlaandse taalkunde. Veur de Reeks Nederlandse Dialectatlassen van Blancquaert en Pee beschreef e 't Grunnings en 't Noord-Drèents.

Sassen hef redacteur ewest van 't Grunninger pergramme van de Regionaole Umroep Noord (RON), de radio-umroep van Grunning, Drenthe en Frieslaand.

Bronnen

• Rouke Broersma (2017), Drentse Letteren. Het verhaal achter Scheupers van de taol 1837-2016, Beilen: Het Drentse Boek
• Abel Darwinkel, Jan Germs en H. Slot (2005), Moi! Taalgids Drenthe, Assen: In Boekvorm Uitgevers bv
• F.G.H. Löwik (2003), De Twentse Beweging: strijd voor modersproake en eigenheid, Stad: Rieksuniversiteit Grunning
• Geheugen van Drenthe aover Albert Sassen

Dit artikel is eschreven in 't Zuudwest-Drèents.