Nina Gavriljuk

Nina Gavriljuk
Statsborgarskap	Sovjetunionen, Russland
Fødd	13. april 1965 (59 år) St. Petersburg
Idrett	langrenn
Tok del i	Vinter-OL 1994, Vinter-OL 1998, Vinter-OL 2002, Vinter-OL 1988, Ski-VM 1989, Ski-VM 1993, Ski-VM 1995, Ski-VM 1997, Ski-VM 1999, Ski-VM 2001, Ski-VM 2003
Utmerkingar	4. klasse av Orden for tjeneste for fedrelandet, Æresordenen, Idrettens mester i Sovjetunionen

Nina Vasiljevna Gavriljuk (fødd 13. april 1965) er ein russisk tidlegare langrennar frå Leningrad som vann ni gullmedaljar i 4 x 5 km stafett med Sovjetunionen og seinare Russland. I tida 1987-2003 sikra ho seg i alt elleve VM-medaljar og fire OL-medaljar.

Gavriljuk stod mest heile si lange tid som langrennsløpar i skuggen av utøvarar som Larisa Lazutina, Jelena Välbe, Ljubov Jegorova og Olga Danilova. Samstundes drog ho nytte av å vere på lag med ei eller fleire av dei i stafettevlingane. Ho var såleis med å vinne VM-gull 1987 og OL-gull 1988, men fekk ikkje gå nokon etappe i meisterskapane i åra 1989-92. Frå 1993 til 2001 var ho derimot fast på Russlands lag i 4 x 10 stafett, eit landslag som vann samtlege sju stafettgull i perioden.

Individuelt tok Gavriljuk si fyrste medalje under vinterleikane 1994 på Lillehammer, der ho vart nummer tre på 15 km. Året etter vann ho to sølvmedaljar då Ski-VM 1995 fann stad i kanadiske Thunder Bay. Både på 5 km og den etterfylgjande jaktstarten vart ho klart slått av landskvinna Larisa Lazutina. Gavriljuk var særleg flink i fristiltevlingar, og sikra seg bronsen i 15 km jaktstart under verdsmeisterskapen 1997 i Trondheim. To år etter tok ho sølvmedaljen i same øvinga ved Ski-VM 1999 i Ramsau, eit lite halvminutt bakom Stefania Belmondo frå Italia.

I tida frå desember 1994 til desember 1999 vann Gavriljuk fem renn i Verdscupen i langrenn. Gjennom 1995-sesongen sanka ho 840 poeng i verdscupen, noko som gav henne andreplassen, 220 poeng bakom landskvinna Jelena Välbe.

Medaljar og plasseringar i internasjonale meisterskap

• Ski-VM 1987 i Oberstdorf: Gull i 4 x 5 km stafett
• Vinter-OL 1988 i Calgary: Gull i 4 x 5 km stafett
• Ski-VM 1989 i Lahti: Nr 5 på 10 km
• Ski-VM 1993 i Falun: Gull i 4 x 5 km stafett, nr 8 på 30 km
• Vinter-OL 1994 på Lillehammer: Gull i 4 x 5 km stafett, bronse på 15 km
• Ski-VM 1995 i Thunder Bay: Gull i 4 x 5 km stafett, sølvmedaljar på 5 km og på 15 km jaktstart
• Ski-VM 1997 i Trondheim: Gull i 4 x 5 km stafett, bronse på 15 km jaktstart, nr 4 på 5 km
• Vinter-OL 1998 i Nagano: Gull i 4 x 5 km stafett, nr 4 på 5 km
• Ski-VM 1999 i Ramsau: Gull i 4 x 5 km stafett, sølvmedalje på 15 km jaktstart og nr 5 på 5 km
• Ski-VM 2001 i Lahti: Gull i 4 x 5 km stafett, nr 5 i sprint og nr 8 på 10 km skiathlon
• Vinter-OL 2002 i Salt Lake City: Nr 5 på 10 km skiathlon
• Ski-VM 2003 i Val di Fiemme: Bronse i 4 x 5 km stafett, nr 9 på 30 km

Kjelder

• Denne artikkelen bygger på «Nina Gawriljuk» frå Wikipedia på tysk, den 10. mars 2017.

Bakgrunnsstoff

• Nina Gavrylyuk, olympedia.org