Domi Tromp

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Domi Tromp

Dominico (Domi) Tromp (☆ 9 di december 1935 na Aruba - † 19 di december 2023 na Malmok) tabata un educador, actor y politico Arubano. E tabata 30 aña activo den politica y un miembro prominente di partido PPA.

Biografia

Domi Tromp a nace dia 9 di december 1935. Na edad di 15 aña el a bay studia na Hulanda, na kweekschool na Baarle-Nassau. Cu 19 aña e tabata maestro di scol y tabata duna les na entre otro scol na Santa Cruz, Paradera, Savaneta, Oranjestad y Noord. Despues el a traha na Departamento di Enseñansa, seccion di inspeccion di enseñansa.

Teatro

Tromp tabata fundado, presidente y actor di grupo teatral Mascaruba, funda na 1961 di un fusion entre gruponan teatral di parokia, en particular Centro Apostolico Arubano, di cua e tabata miembro y Grupo Artistico di Santa Cruz. Den decada 60 y 70 di siglo 20 bida teatral tabata florece na Aruba. El a actua den varios obra, entre otro Maria di Ser’i Noka (1963), Suert'i Pushi Pretu (1964), Vengansa di un Chines (1965), Tiro riba Tiro (1984) y Ken ta keda cu Mama? (1993). Huntu cu e otro miembronan di Mascaruba e tabata traduci obranan teatral di fama mundial, contribuyendo asina na desaroyo di e idioma Papiamento como idioma literario teatral. Pa e tumba di Padu Lampe den Suert'i Pushi Pretu el a compone e letra.

Politica

Como hoben e ta drenta politica na comienso di decada 1960.

Otro

Tromp tabata socialmente activo riba diferente tereno. E tabata presidente di Fundacion Teatro Arubano. Alabes tabata presidente di Stichting Ser’i Noka y Stichting Capilla Cristo Sufriente na Madiki. El a yuda 10 aña como Sinterklaas di Sint Jan School y mas scolnan. Na 1986 el a wordo condecora Cabayero (Officier} den Orden di Oranje-Nassau.

Na 1964 Tromp ta casa cu Yvonne Frans, actriz y miembro di Mascaruba. Hunto nan a haya dos yiu muhe y dos nieta. Su yiu Marisol Lopez-Tromp ta politico y actualmente parlamentario y lider di partido MAS. El a fayece dia 19 di december 2023 na su cas na Malmok na edad di 88 aña.

Fuente, nota i/òf referensia