Mouse
El mouse (da l'inglese mouse, che in veneto saria rato o sorxe o moréciola o "morejoła") el xe un marchingegno eletronico che ghe xe in tuti i computer de ancó.
El mouse el ghe manda un segnal al computer, in maniera che moendo el mouse su la tola, el puntator che ghe xe sul schermo el se moe anca lu ne la stessa maniera.
El ga vari botoni (dipende dai modei, de solito ghe n'è tri, su quei de na olta ghe n'era do) che i serve par diverse funzion, e na ruelina che gira avanti e indrio, che de solito la se dopara par scorrar su e zo la schermata (a olte la ruelina la fa anca da terzo boton). El xe sta inventà inte el 1967 da l'ingegner merican Douglas Engelbart.
I mouse de na olta i gavea na baleta par soto, che rugolando la moéa do rulli picenini che i registrava el movimento vertical e quel orizontal. Sicome i gavea el difeto che la baleta la se inpolvarava come gnente e te tocava pulirla ogni tanto, i ga inventà i mouse otiçi, che i ga un sensor co un LED che "vede" el movimento (che parò nol va mia su le superfici rifletenti). Par farlo scorrar mejo, de frecuente soto al mouse se ghe mete un tapetin fato aposta.
I mouse i pol verghe el filo tacà dedrio el computer (el conetor el pol esar de diversi tipi, ghe xe el PS/2, opure l'USB, o el vecio conetor seriale) o senò i pol esar anca sensa fiłi (wireless): in sto caso qua ghe xe na base tacà dedrìo al computer, che la comunica col mouse co le onde radio o coi infrarossi; el svantagio el xe che i mouse senza fili i ga da verghe drento dele baterie, che bisogna ricaricar o sostituir ogni tanto.
Lingambi foresti
[canbia | canbia el còdaxe]Wikimedia Commons el detien imàjini o altri file so mouse
Controło de autorità | LCCN (EN) sh93009624 · GND (DE) 4225191-6 · BNF (FR) cb12160745r (data) |
---|