Pieksämägi

Pieksämägi
Pieksämäki (suom. i roč.)

Lidnanznam
Valdkund	Suomenma
Eläjiden lugu (2024)	17,192 ristitud
Pind	1,836,24 km²
Pämez'	Emilia Savolainen (sügüz'ku 2024—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Pieksämägi (suom. i roč.: Pieksämäki, suomen virkand: [ˈpie̯ksæˌmæki]) om lidn da raudtesol'm Suomenman suvipalan keskuses. Mülüb Suvisavo-agjaha, sen kaikiš penemb lidnankund koumespäi.

Istorii

Pieksämägin volost' oli olmas vspäi 1575. Vl 1889 «Kouvol — Kuopio»-raudtekeskust läbiti žilod, vl 1914 raudtesarak ühtenzoiti Savonlidnanke. Erigoittihe Pieksämägi-žilod (suom.: kauppala) volostišpäi vl 1930. Keskuzird om saudud vn 1934 žilon generaližen planan mödhe. Žilo sai lidnan statusad (kaupunki) vl 1962. Mülütihe Pieksänmaa-kundad Pieksämägihe vl 2007.

Pieksämägi šingotase tervhudenkaičendan i socialižholitišiden sektoral, raudten VR-kompanijan mehanižel cehal i kompanijoil senno, sauvondmaterialiden tehmižel (eriližed metalližed konstrukcijad), sömtegimištol (glütenatomad i kül'menzoittud leibäntegesed), mugažo kassoiden i meblin pästandan edheotandoil.

Geografijan andmused

Lidn sijadase agjan lodehes, Pieksänjärven suvirandal.

Matkad agjan Mikoi-keskushesai om 66 km suvhe orhal, 76 km avtotedme vai raudtedme, Hel'sinkihesai om 265 km suvipäivlaskmha orhal, 300 km avtotel vai raudtel. Lähembaižed lidnad oma Varghuz (Pohjoižsavo) 42 km päivnouzmha orhal da kaikil teil, i Suonenjogi (Pohjoižsavo) 37 km pohjoižhe orhal, 42 km avtotedme vai raudtedme.

Vn 2022 andmusiden mödhe lidnan ühthine pind om 1 836,24 km², sidä kesken kuivma — 1 569,03 km², vezi i sokaz tahond ottas seičemendest (267,21 km²).

Tobmuz

Pieksämägin municipaline suim kogoneb 35 ezitajaspäi.

Edeližed lidnan pämehed oma Ulla Nükänen (Ulla Nykänen, uhoku 2018 — sügüz'ku 2024), Tapio Turunen (2002−2018).

Eläjad

Vl 1980 lidnankundan ristitišt oli 23 781 eläjad, vl 2000 — 22 040 eläjad, vl 2010 — 19 869 eläjad, vl 2020 — 17 661 eläjad. Kaikiš suremb kundan eläjiden lugu oli 24 217 ristitud vl 1985. Ristitišton koume nelländest eläb lidnankundan keskuses.

Mamankelen mödhe (2016): suomen kel' — 97,4 %, ročin kel' — 0,1 %, toižed keled — 2,5 %.

Galerei

• 
  Lidnan tobmuden pert' (2011)
• 
  Pieksämägin vanh jumalanpert', vn 2018 nägu
• 
  «Savon solmu»-adivpert' (2014)
• 
  Citymarket-torguindkeskuz (vn 2014 olend)
• 
  Kanttila-sauvuz (2015, om vaumitud vl 1988 kut Pieksämägin küläkundan tobmuden keskuseks), kävutase lidnan kirjištoks i ofispertikš
• 
  Pieksämägin päraudtestancii vl 2009

Irdkosketused

• Lidnankundan oficialine sait (pieksamaki.fi). (suom.)