Saarijärvi

**Saarijärvi**
Lidnanznam;	Flag;
Valdkund	Suomenma
Eläjiden lugu (2024)	8,827 ristitud
Pind	1,422,72 km²
Pämez'	Satu Autiosalo; (keväz'ku 2022—)
Telefonkod	+358-
Aigvö	tal'vel UTC+2,; kezal UTC+3

Lidnankundan sijaduz agjas i valdkundas (2020)

Saarijärvi (mugažo suomen i ročin kelil, suomen virkand: [ˈsɑːriˌjærʋi]) om Suomenman lidn da municipalitet valdkundan keskuzpalan suves. Mülüb Kesksuomenma-agjaha, sen videnz' lidnankund kudespäi eläjiden lugun mödhe.

Istorii

Lidnankundan territorii om elänzoittud ristituil jo kahesa tuhad vozid arheologijan kaivandusen andmusiden mödhe. Jumalanpertin tulend om avaitud vspäi 1639. Municipalitetan aluz om pandud vl 1866. Raudte tuli Saarijärvihe vl 1960, se om vaiše jüguiden täht vspäi 1978. Kund sai lidnan statusad vl 1986. Mülütihe Pülkönmäki-kundad lidnha vspäi 2009.

Saarijärvi šingotase sauvondmaterialiden pästandal (puižed pertid, cellülozine lämuzizoläcii, lämbituzsisteman torved i fitingad, vuivodad), terasižiden mülütimiden edheotandal («Saarijärven Säiliövalmiste Oy»), «Serres Oy»-kompanijal (medicinine kaluišt läžundkodiden täht), lämbituzsistemiden sauvondkompanijal, sadmahusiden i heretusiden tehmižel («Tikalan Oy»). Mecpuiden ištutezbarboiden «Fin Forelia»-kazvatandtarh i niiden semniden «Siemen Forelia»-tarh (valdkundan kulutuzmäran pol') kazvatasoiš da pakuitasoiš lidnankundan Häkkilä-küläs.

Geografijan andmused

Lidn sijadase agjan keskuzpalas, Saarijärven pohjoižpäivnouzmaižel randal (14 km², 117 m ü.m.t.) da toižiden penembiden järviden randoil: Iso-Lumperoinen (3,2 km²), Pieni-Lumperoinen (koume nellikkilometrad), Herajärvi (0,5 km²).

Matkad agjan Jüväskülä-keskushesai om 57 km suvhe-suvipäivnouzmha orhal vai 66 km avtotedme, Hel'sinki-pälidnhasai om 282 km suvhe orhal vai 333 km avtol. Lähembaine lidn om Äänekoski 27 km päivnouzmha-suvipäivnouzmha orhal vai 35 km avtotedme.

Vn 2022 andmusiden mödhe lidnan ühthine pind om 1422,72 km², sidä kesken kuiv ma — 1251,72 km², vezi da sokaz tahond ottas kahesandest (171,00 km², 241 järved). Kaikiš znamasižembad järved oma Pühäjärvi, Summanen, Saarijärvi.

Tobmuz

Saarijärvin municipaline suim kogoneb 31 ezitajaspäi.

Edeližed lidnan pämehed oma Timo Rusanen (uhoku 2014 — 2021), Janne Kinnunen (radoi vll 2008–2013).

Eläjad

Vl 1980 nügüdläižen lidnan territorijan eläjiden lugu oli 11 871 ristitud, vl 2000 — 11 624 ristitud, vl 2010 — 10 580 ristitud, vl 2020 — 9 300 ristitud. Kaikiš suremb kundan ristitišt oli 12 026 eläjad vl 1990. Ristituiden nell' seičemendest elädas lidnankundan keskuses.

Kodikelen mödhe (2016): suomen kel' — 98,7 %, ročin kel' — 0,1 %, toižed keled — 1,2 %.