Salo

**Salo**
	Lidnanznam;
Valdkund	Suomenma
Eläjiden lugu (2024)	50,912 ristitud
Pind	2,168,29 km²
Pämez'	Anna-Kristiina Korhonen; (2022—)
Telefonkod	+358-(0)2
Aigvö	tal'vel UTC+2,; kezal UTC+3

Lidnankundan sijaduz agjas i valdkundas (2020)

Salo (mugažo suomen i ročin kelil, suomen virkand: [ˈsɑlo]) om Suomenman lidn da lidnankund Suvipäivlaskmaine Suomenma-agjas. Se om valdkundan 20. lidn eläjiden lugun mödhe.

Istorii

Eländpunkt mainitase ezmäižen kerdan Turkun tulendan aigkirjas vodenke 1325. Nügüdläižen eländpunktan aluz om pandud vl 1887, se sai lidnan statusad vl 1960.

Salo šingotase Piiroinen-torguindmarkan meblin tehmižel (ištmed, lebuištmiden rived, sofad da laudad, metalližed pressuidud ezitegesed), kruizlaivoiden uksiden (Antti) i villänkuidimiden edheotandal, LeinoCast-metalltegesiden pästandal (mectehnikan, laivoiden i energomašiništon täht), mail'man indižen Wipro Technologies-kompanijan alajagudel (IT-konsul'tiruind, sistemintegracijan pätandad). Suriden teraztegesiden edheotand sijadase Halikko-ezilidnas.

Ende Nokia-kompanijan pezasidon telefoniden ezmäine tegim radoi lidnas vspäi 1981, sid' saudihe toist tegint vl 1995. Telefoniden pästand tuli lophu vl 2012. Vl 2015 Microsoft-kompanii saupsi pezasidon tedokeskust-ki. Saksalaine Hella-kompanii ezimeleti sirta lämuzdiodiden fabrikad Romanijha vodele 2018. Vl 2007 sauptihe sahartegint, Evrolaudkund lüheni saharsvöklan kazvatandan kvotid Suomenman täht.

Geografijan andmused

Lidn sijadase Uskelanjogen (toine nimi — Salonjogi) da penembiden jogiden randoil, Baltijan meren randpolel. Om severt-se penid järvid lidnankundas.

Salo seižub Turku — Hel'sinki oiktal tel. Matkad agjan Turku-keskushesai om 52 km päivlaskmha, pälidnhasai om 114 km päivnouzmha.

Vn 2022 andmusiden mödhe lidnankundan pind om 2 168,29 km², sidä kesken kuivma — 1 987,47 km², meri — 106,45 km², vezi i sokaz tahond ottas 74,37 nellikkilometrad.

Tobmuz

Lidnankundan kart ende erigoittud kundoidenke (2020)

Kaik 30 lidnrajonad da 413 küläd mülüdas Salon municipalitetha, ühtetas külid 12 gruppha. Salon municipaline suim kogoneb 51 ezitajaspäi.

Edeližed lidnan pämehed oma Tero Nissinen (2021−2022), Lauri Inna (kezaku 2017 — 2021), Antti Rantakokko (uhoku 2009 — semendku 2017), Matti Rasila (1999 — viluku 2009).