Wasiljefski-eiland
59°56′24″N 30°15′36″O / 59.94°N 30.260°O
Wasiljefski-eiland Inheemse naam: Васильевский остров | |
---|---|
Die ligging van Wasiljefski-eiland (no. 1 op die kaart) | |
Geografie
| |
Ligging | Golf van Finland
|
Administrasie | |
Stad | Sint Petersburg
|
Demografie | |
Bevolking | 203 058 (in 2010)
|
Wasiljefski-eiland is ’n eiland in Sint Petersburg, Rusland, wat in die delta van die Newarivier lê tussen die riviere Groot-Newa in die suide en Klein-Newa in die noordooste. In die weste word dit begrens deur die Golf van Finland. Die eiland word van die Dekabristof-eiland geskei deur die Smolenka-rivier. Saam vorm hulle die Wasileostrofski-distrik, ’n administratiewe afdeling van Sint Petersburg.
Die eiland lê aan die oorkantste oewer van die rivier as die Winterpaleis en bevat ’n groot deel van die stad se geskiedenis. Twee van Sint Petersburg se bekendste brûe, Paleis- en Blagowesjtsjensk-brug, verbind dit met die vasteland in die suide. Beurs- en Toetsjkof-brug oor die Klein-Newa verbind dit met Petrogradski-eiland. Die eiland kan bereik word met die Wasileostrofskaja- en die Primorskaja-moltreinstasies. Daar is ook tremverbindings.
Naam
[wysig | wysig bron]Russiessprekendes verstaan Wasiljefski as ’n besitlike byvoeglike naamwoord wat afgelei is van die voornaam "Wasili" of die van "Wasiljef"" (wat van die voornaam afgelei is). Daar is verskeie weergawes oor wie die Wasili is na wie die eiland genoem is, maar dit is meer waarskynlik ’n aanpassing van die Sweedse of Finse name uit die tyd voor Russe die grondgebied beset het. Die eerste melding van die Russiese naam is in 1500 gemaak in ’n landmeting.[1][2]
Topografie
[wysig | wysig bron]Die eiland bestaan geografies uit twee hoofdele. Die suidelike en oostelike deel is oud, met geboue uit hoofsaaklik die 19de eeu. Die suidelike oewer se westelike deel heet Universiteitsoewer en is na die Universiteit van Sint Petersburg genoem wat daar geleë is. Dit bevat van die oudste geboue in die stad wat uit die 18de eeu dateer.
Dié deel van die eiland het ’n reghoekige uitleg van strate (wat oorspronklik kanale sou wees, soos in Venesië) met drie deurgangspaaie wat ’n prospekt genoem word – Bolsjoi ("Groot"), Sredni ("Middel") en Mali ("Klein"). Hulle loop rofweg van oos na wes. Daar is sowat 30 strate, of eintlik "lyne" (linii), wat hulle kruis. Dié lyne het nommers en nie gewone name nie, en elke lyn is ’n kant van ’n straat, nie ’n hele straat nie. Die twee kante van ’n straat het dus verskillende name. Die mees oostelike straat se kante heet Kadetskaja in die ooste en Perwaja (1ste) in die weste, die volgende straat heet 2de en 3de, ens. Die laaste straat is 28ste en 29ste.
Op die eiland is die stad se nouste straat, wat genoem is na die kunstenaar Ilja Repin.
Bakens
[wysig | wysig bron]Die mees oostelike deel van die eiland, wat die Strelka ("uitham" of "landpunt") genoem word, het ’n paar museums, onder meer die ou Sint Petersburgse Aandelebeurs. Aan die Universiteitsoewer lê onder meer die Kunstkammer, Mensjikof-paleis en Sint Andreas-katedraal – almal uit die 18de eeu. In die middel van die eiland is ’n museum van elektriese vervoer. Die westelike deel van die eiland het eers later ontwikkel, in die Sowjet-tyd, en bevat Sowjet-tipe woonstelblokke.
Die hoofgeboue van die Universiteit van Sint Petersburg lê op die eiland en bevat die Twaalf Kolleges asook die voormalige paleis van Pieter II van Rusland. Daar is ook verskeie ander opvoedingsinstansies soos die wetenskapakademie (plus baie van sy navorsingsinstellings), die vlootkadetkorps en die akademie van nasionale ekonomie en openbare administrasie.
Op die eiland is ook verskeie nywerhede, wat wissel van skeepsboufabrieke tot nywerheidsbakkerye.
Galery
[wysig | wysig bron]Verwysings
[wysig | wysig bron]Hierdie artikel is vertaal uit die Engelse Wikipedia
Wikimedia Commons het meer media in die kategorie Wasiljefski-eiland.