Clamosa (municipio)
- Iste articlo tracta sobre Clamosa, que ye un municipio auxidido d'a val d'a Cinca, en a provincia de Uesca. Ta belaltros usos d'o toponimo «Clamosa», se veiga Clamosa (desambigación).
Clamosa ye un municipio historico d'Aragón en a provincia de Uesca y territorio d'a que huei ye a comarca d'o Sobrarbe. Se o puede documentar dende os primers censos mudernos de 1842 dica la suya absorción en o municipio d'A Fueva en a decada de 1960[1].
O termin municipal de Clamosa s'estructuraba, en primeras, con os quatro lugars que forman a valleta de o barranco de Clamosa, afluent de o río Cinca por a man cucha, más Caneto que se troba en a garra que la desepara d'o barranco d'o Salinar. En feba parte Clamosa como cabecera d'o municipio, A Penella (en a cuentra d'o barranco), Bediello un poquet más auguas t'alto por o mismo barranco, y A Selva que ye una pardina de Bediello. O dito termin municipal se forma d'estreturas y recuestos en as garras occidentals d'a sierra d'o Turón, con muitas penyas y turmos que afloran en pirol de a selva, con pocas faixas que dasen guaire productividat que se troben por alto d'a cota d'os 600 m, por o que os lugars más importants dependeban d'os campos que teneban en a ribera d'a Cinca.
Ta o censo de 1857 se i heban adhivido os lugars que formaban l'antigo municipio de Trillo[1][2], que son Trillo, Salinas de Trillo y Sant Per de Trillo, totz tres en a valleta d'o barranco d'o Salinar, en a man que toca a la sierra de l'Entremont.
O municipio fué absorvido en o municipio d'A Fueva en a decada d'os anyos 60 d'o sieglo XX, conseqüencia d'a despoblación progresiva de totz os nuclios que o formaban. En 1968 s'inauguró l'entibo de Lo Grau, que submerchió parcialment os campos que Clamosa y A Penella teneban en a ribera d'a Cinca, por o que se prevocó a zaguer tongada emigradera d'os suyos zaguers habitants.
Referencias
- ↑ 1,0 1,1 (es) «Clamosa» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada l'1 de noviembre de 2010
- ↑ (es) «Trillo» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada l'1 de noviembre de 2010