Buku 4 Musa

4 Musa ᯔᯮᯘ 1

1:1 Dung i ro muse hata ni Jahowa tu si Musa di halongonan Sinai, di bagasan undungundung parluhutan i, di artia bulan sipaha dua, paduataonhon dung ruar nasida sian tano Misir, ninna ma: ᯑᯮᯰ ᯤ ᯒᯬ ᯔᯮᯘᯩ ᯂᯖ ᯉᯪ ᯐᯂᯬᯋ ᯖᯮ ᯘᯪ ᯔᯮᯘ ᯑᯪ ᯂᯞᯬᯝᯬᯉᯉ᯲ ᯘᯪᯉᯤ ᯑᯪ ᯅᯎᯘᯉ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯇᯒ᯲ᯞᯮᯂᯮᯖᯉ᯲ ᯤ ᯑᯪ ᯀᯒ᯲ᯖᯪᯀ ᯅᯮᯞᯉ᯲ ᯘᯪᯇᯂ ᯑᯮᯀ ᯇᯑᯮᯀᯖᯀᯉᯬ᯲ᯂᯉᯬ᯲ ᯑᯮᯰ ᯒᯮᯀᯒ᯲ ᯉᯘᯪᯑ ᯘᯪᯀᯉ᯲ ᯖᯉᯬ ᯔᯪᯘᯒᯪ᯲

1:2 Surathon ma bilangan ni sandok luhutan ni Israel marmargamarga, marompuompu, marsasahalak nasa baoa tahe.

1:3 Olat ni na marumur duapulu taon dohot lobi sian i, nasa baoa sialo musu di Israel, ingkon bilangonmuna nasida mangihuthon parduaannasida, ho dohot si Aron.

1:4 Jala ingkon adong donganmuna sasahalak sian ganup marga, i ma gabe ihutan di nasida na samarga.

1:5 Jala on do goargoar ni angka baoa na jongjong mandongani hamu: Sian marga Ruben: Si Elizur, anak ni si Sedeur.

1:6 Sian Simeon: Si Selumiel, anak ni si Zurisaddai. ᯘᯪᯀᯉ᯲ ᯘᯪᯔᯩᯀᯉᯬ᯲ ᯘᯪ ᯘᯩᯞᯮᯔᯪᯀᯞᯩ᯲ ᯀᯉᯂ᯲ ᯉᯪ ᯘᯪ ᯐᯮᯒᯪᯘᯑ᯲ᯑᯤ

1:7 Sian Juda: Si Nahason anak ni si Aminadab.

1:8 Sian Isasar: Si Netaneel, anak ni si Zuar.

1:9 Sian Zebulon: Si Eliab, anak ni si Helon.

1:10 Sian angka anak ni si Josep, sian Epraim: Si Elisama, anak ni si Amihud; sian Manasse: Si Gamaliel, anak ni si Pedazur. ᯘᯪᯀᯉ᯲ ᯀᯰᯂ ᯀᯉᯂ᯲ ᯉᯪ ᯘᯪ ᯐᯬᯘᯇᯩ᯲ ᯘᯪᯀᯉ᯲ ᯀᯩᯇ᯲ᯒᯀᯔᯪ᯲ ᯘᯪ ᯀᯩᯞᯪᯘᯔ ᯀᯉᯂ᯲ ᯉᯪ ᯘᯪ ᯀᯔᯪᯂᯑᯮ᯲ ᯘᯪᯀᯉ᯲ ᯔᯉᯘ᯲ᯘᯩ ᯘᯪ ᯎᯔᯞᯪᯀᯞᯩ᯲ ᯀᯉᯂ᯲ ᯉᯪ ᯘᯪ ᯇᯩᯑᯝᯒᯮ᯲

1:11 Sian Benjamin: Si Abidan, anak ni si Gidion i. ᯘᯪᯀᯉ᯲ ᯅᯉᯩ᯲ᯐᯔᯉᯪ᯲ ᯘᯪ ᯀᯅᯪᯑᯉ᯲ ᯀᯉᯂ᯲ ᯉᯪ ᯘᯪ ᯎᯪᯑᯪᯀᯉᯬ᯲ ᯤ

1:12 Sian Dan: Si Ahieser, anak ni si Amisaddai.

1:13 Sian Aser: Si Pagiel, anak ni si Okran.

1:14 Sian Gad: Si Eliasap, anak ni si Deuel.

1:15 Sian Naptali: Si Ahira, anak ni si Enan.

1:16 I ma halak angka na tarpio tu parluhutan i, angka induk marmargamarga, dohot marompuompu; angka ihutan marsasaribu halak di Israel do nasida.

1:17 Dung i dipapulik si Musa dohot si Aron ma angka baoa i, angka napola ginoar.

1:18 Laos sandok luhutan i paluhuthon nasida di artia bulan sipaha dua, asa dipasurathon partubuna be marmargamarga dohot marompuompu dohot marsasahalak baoa, olat ni na marumur duapulu taon dohot lobi sian i.

1:19 Hombar tu na tinonahon ni Jahowa tu si Musa, laos dibilangi ma nasida di halongonan Sinai.

1:20 Ia bilangan ni pinompar ni si Ruben, anak buhabaju di Israel, mangihuthon partubunasida marmargamarga, marompuompu, marsasahalak pe, nasa baoa na marumur duapulu taon dohot lobi sian i, nasa baoa sialo musu.

1:21 Angka na tarbilang sian marga Ruben opatpulu onom ribu lima ratus halak toropna.

1:22 Ia bilangan ni pinompar ni si Simeon, mangihuthon partubunasida marmargamarga, marompuompu, marsasahalak pe, nasa baoa na marumur duapulu taon dohot lobi sian i, nasa baoa sialo musu.

1:23 Angka na tarbilang sian marga Simeon limapulu sia ribu tolu ratus halak toropna.

1:24 Ia bilangan ni pinompar ni si Gad, mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:25 Angka na tarbilang sian marga Gad opatpulu lima ribu onom ratus limapulu halak toropna.

1:26 Ia bilangan ni pinompar ni si Juda mangihuthon partubunasida, marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:27 Angka na tarbilang sian marga Juda pitupulu opat ribu onom ratus halak toropna.

1:28 Ia bilangan ni pinompar ni si Isasar mangihuthon partubunasida, marmargamarga, marompuompu marsasahalak pe, na marumur duapulu taon dohot lobi sian i, nasa baoa sialo musu.

1:29 Angka na tarbilang sian marga Isasar limapulu opat ribu opat ratus halak toropna.

1:30 Ia bilangan ni pinompar ni si Zebulon mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:31 Angka na tarbilang sian marga Zebulon limapulu pitu ribu opat ratus halak toropna.

1:32 Ia bilangan ni pinompar ni si Josep, i ma sian Epraim mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:33 Angka na tarbilang sian marga Epraim opatpulu ribu lima ratus halak toropna.

1:34 Ia bilangan ni pinompar ni si Manasse mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:35 Angka na tarbilang sian marga Manasse tolupulu dua ribu dua ratus halak toropna.

1:36 Ia bilangan ni pinompar ni si Benjamin mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:37 Angka na tarbilang sian marga Benjamin tolupulu lima ribu opat ratus halak toropna.

1:38 Ia bilangan ni pinompar ni si Dan mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:39 Angka na tarbilang sian marga Dan onompulu dua ribu pitu ratus halak toropna.

1:40 Ia bilangan ni pinompar ni si Aser mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

1:41 Angka na tarbilang sian marga Aser opatpulu sada ribu lima ratus halak toropna.

1:42 Ia bilangan ni pinompar ni si Naptali mangihuthon partubunasida marmargamarga, marompuompu, marsasahalak pe, nasa baoa sialo musu.

1:43 Angka na tarbilang sian marga Naptali limapulu tolu ribu opat ratus halak toropna.

1:44 I ma sude jolma na tarbilang, angka na binilang ni si Musa dohot si Aron rap dohot induk ni Israel na sampulu dua halak i, ganup nasida ihutan di nasida na saompu.

1:45 Asa saluhut angka na tarbilang sian halak Israel marompuompu, olat ni na marumur duapulu taon dohot lobi sian i, nasa baoa sialo musu di Israel.

1:46 Luhut angka na tarbilangi tahe onom ratus tolu ribu lima ratus limapulu halak toropna.

1:47 Alai anggo halak Lepi, nasida na samarga marompuompu, ndang masuk tu bilangannasida.

1:48 Ai nunga didok Jahowa hian tu si Musa songon on:

1:49 Holan marga Lepi ndang jadi bilangonmu, jala ndang jadi papunguon toropnasida i di tongatonga ni halak Israel.

1:50 Ingkon pabangkitonmu tahe halak Lepi patureture joro panindangion i ro di sude ulaulana dohot angka na masuk tusi; ingkon nasida do mangusung undungundung i ro di sude ulaulana, jala nasida marhalado disi, laos marsaro humaliang undungundung i.

1:51 Ia jumpa borhat undungundung i, ingkon halak Lepi do manduduk; jala ia jumpa mangulon undungundung i, ingkon halak Lepi muse pajongjongkon; tung sura jumonok halak sileban tusi, ingkon marutang hosa ibana.

1:52 Ingkon marsaro dohot halak Israel, ganup di parsaroanna be, jala ganup mardonokkon partonggolna mangihuthon parduaan ni paranganna.

1:53 Alai anggo halak Lepi, ingkon marsaro humaliang undungundung panindangion i, asa unang mangonai rimas na marpiarpiar tu luhutan ni halak Israel; dibahen i ingkon radotan ni halak Lepi do siradotan i di undungundung panindangion i.

1:54 Dung i dibahen halak Israel ma hombar tu saluhut na tinonahon ni Jahowa tu si Musa, laos songon i dibahen nasida.

4 Musa 2

2:1 Dung i ro ma hata ni Jahowa tu si Musa dohot tu si Aron songon on:

2:2 Ingkon marsaro halak Israel ganup mardonokkon partonggolna, partinandaan ni nasida marompuompu, jala ingkon marsaro nasida tondong ni undungundung parluhutan i humaliang.

2:3 Dungkon habinsaran ingkon marsaro marga Juda rap dohot partonggolna dohot paranganna, jala si Nahason, anak ni si Aminadab, ihutan ni halak Juda.

2:4 Jala paranganna angka naung tarbilangi pitupulu opat ribu onom ratus halak toropna.

2:5 Jala di lambungna ingkon marsaro marga Isasar, jala si Netaneel, anak ni si Zuar, ihutan ni halak Isasar.

2:6 Jala paranganna angka naung tarbilangi limapulu opat ribu opat ratus halak toropna.

2:7 Tole muse marga Zebulon, jala si Eliab, anak ni si Helon, ihutan ni halak Zebulon.

2:8 Jala paranganna angka naung tarbilangi limapulu pitu ribu opat ratus halak toropna.

2:9 Jadi luhut angka na tarbilangi sian parsaroan Juda saratus ualupulu onom ribu opat ratus halak toropna, angka na masuk tu paranganna, jala ingkon nasida manguluhon.

2:10 Dingkan dangsina ingkon marsaro partonggol ni marga Ruben, rap dohot paranganna, jala si Elizur, anak ni si Sedeur, ihutan ni halak Ruben.

2:11 Jala paranganna angka naung tarbilangi opatpulu onom ribu lima ratus halak toropna.

2:12 Jala di lambungna ingkon marsaro marga Simeon, jala si Selumiel, anak ni si Zurisaddai, ihutan ni halak Simeon.

2:13 Jala paranganna angka naung tarbilangi limapulu sia ribu tolu ratus halak toropna.

2:14 Tole muse marga Gad, jala si Eliasap, anak ni si Rehuel, ihutan ni halak Gad.

2:15 Jala paranganna angka naung tarbilangi opatpulu lima ribu onom ratus limapulu halak toropna.

2:16 Jadi luhut angka na tarbilangi sian parsaroan Ruben saratus limapulu sada ribu opat ratus limapulu halak toropna, angka na masuk tu paranganna; jala ingkon parduan paidua nasida laho borhat.

2:17 Dung salpu nasida ingkon borhat undungundung parluhutan i rap dohot parsaroan ni halak Lepi di tongatonga ni angka parsaroan suang songon parpeakna marsaro, laos songon i nasida borhat, ganup di ingananna be mardonokkon partonggolna.

2:18 Dingkan hasundutan ingkon marsaro partonggol ni marga Epraim rap dohot paranganna jala si Elisama, anak ni si Amihud, ihutan ni halak Epraim.

2:19 Jala paranganna angka naung tarbilangi opatpulu ribu lima ratus halak toropna.

2:20 Jala di lambungna ingkon marsaro marga Manasse, jala si Gamaliel, anak ni si Pedazur, ihutan ni halak Manasse.

2:21 Jala paranganna angka naung tarbilangi tolupulu dua ribu dua ratus halak toropna.

2:22 Tole muse marga Benjamin, jala si Abidan, anak ni si Gidion i induknasida i.

2:23 Jala paranganna angka naung tarbilangi tolupulu lima ribu opat ratus halak toropna.

2:24 Jala luhut angka na tarbilangi sian parsaroan Epraim saratus ualupulu ribu saratus halak toropna, angka na masuk tu paranganna; jala ingkon parduan paitolu nasida laho borhat.

2:25 Dingkan utara ingkon marsaro partonggol ni marga Dan rap dohot paranganna, jala si Ahiezer, anak ni si Amisaddai ihutan ni halak Dan.

2:26 Jala paranganna angka naung tarbilangi onompulu dua ribu pitu ratus halak toropna.

2:27 Jala di lambungna ingkon marsaro marga Aser, jala si Pagiel, anak ni si Okran, ihutan ni halak Aser.

2:28 Jala paranganna angka naung tarbilangi opatpulu sada ribu lima ratus halak toropna.

2:29 Tole muse marga Naptali, jala si Ahira, anak ni si Enan, ihutan ni halak Naptali.

2:30 Jala paranganna angka naung tarbilangi limapulu tolu ribu opat ratus halak toropna.

2:31 Jala luhut angka na tarbilangi sian parsaroan Dan saratus limapulu pitu ribu onom ratus; jala ingkon parpudi nasida laho borhat mangihuthon tu partonggolna.

2:32 I ma saluhutna angka na tarbilangi sian halak Israel marompuompu, saluhut angka na tarbilang tahe di bagasan parsaroan mangihuthon parduanna be onom ratus tolu ribu lima ratus limapulu halak toropna.

2:33 Alai anggo halak Lepi ndang dibilangi di tongatonga ni halak Israel, hombar tu na tinonahon ni Jahowa hian tu si Musa.

2:34 Jadi dibahen halak Israel ma saluhut songon na tinonahon ni Jahowa tu si Musa, laos songon i ma parpeaknasida marsaro mangihuthon partonggolna be, songon i dohot haboborhatnasida, ganup marmargamarga dohot marompuompu.

4 Musa 3

3:1 On do partubu ni pinompar ni si Aron dohot si Musa di ari uju na martona Jahowa tu si Musa di dolok Sinai.

3:2 Jala on do goargoar ni angka anak ni si Aron: Anak buhabajuna si Nadab, dung i si Abihu, si Eleasar dohot si Itamar.

3:3 On do goargoar ni anak ni si Aron, angka na miniahan gabe malim, angka naung pinabangkit mangaradoti hamalimon.

3:4 Alai nunga mate punu anggo si Nadab dohot si Abihu di adopan ni Jahowa, uju na binoannasida api sileban tu adopan ni Jahowa di halongonan Sinai; alai anggo si Eleasar dohot si Itamar saut do mangaradoti hamalimon di adopan si Aron, amanasida i.

3:5 Dung i ro ma hata ni Jahowa tu si Musa songon on:

3:6 Dokkon ma ro jumonok marga Lepi jala pajongjong nasida di adopan ni malim si Aron, asa marhalado nasida di ibana.

3:7 Asa diradoti nasida siradotanna hian di nasida sandiri dohot di sandok luhutan i di adopan ni undungundung parluhutan i, mangaringkoti ulaon di undungundung i.

3:8 Laos nasida patureturehon angka ulaula di undungundung parluhutan i dohot patureture di halak Israel laho mangaradoti ulaon di undungundung i.

3:9 Jala ingkon pasahatonmu halak Lepi bahen dongan ni si Aron dohot angka anakna i, ai angka nasida do naung binasabasahon tu ibana sian halak Israel.

3:10 Alai anggo si Aron dohot angka anakna i, ingkon pabangkitonmu do, asa nasida mangaradoti hamalimonnasida i; alai tung sura jumonok halak sileban marulaon, ingkon marutang hosa ibana.

3:11 Dung i ro muse hata ni Jahowa tu si Musa songon on:

3:12 Ida ma, nunga hubuat anggo halak Lepi sian tongatonga ni halak Israel bahen singkat ni nasa anak buhabaju sian halak Israel; asa Ahu do nampuna halak Lepi.

3:13 Ai nasa anak buhabaju, Ahu do nampunasa; olat ni ari dung Ahu mambunu nasa anak buhabaju di tano Misir, nunga huparbadiai hian di Ahu nasa anak buhabaju di Israel sian jolma ro di pinahan tahe, ingkon Ahu do nampunasa, ai Ahu do Jahowa.

3:14 Dung i ro muse hata ni Jahowa tu si Musa di halongonan Sinai.

3:15 Bilangi ma angka anak ni si Lepi marompuompu dohot marmargamarga, nasa baoa olat ni na marumur sabulan dohot lobi sian i, ingkon bilangonmu do nasida.

3:16 Jadi tole ma si Musa mamilangi nasida hombar tu hata ni Jahowa, songon naung tinonahonna i.

3:17 Jala angka on do goar ni angka anak ni si Lepi: Si Gerson, si Kohat dohot si Merari.

3:18 Alai anggo goargoar ni angka anak ni si Gerson marmargamarga on do: Si Libni dohot si Simei.

3:19 Ia angka anak ni si Kohat marmargamarga: Si Amram, si Isebar, si Hebron dohot si Usiel.

3:20 Ia angka anak ni si Merari marmargamarga: Si Mahli dohot si Musi. I ma marga ni halak Lepi marompuompu.

3:21 Sian pinompar ni si Gerson ro marga ni halak Libni dohot marga ni halak Simei; i ma marga sian pinompar ni si Gerson.

3:22 Ia torop ni bilangannasida i, nasa baoa olat ni na marumur sabulan dohot lobi sian i pitu ribu lima ratus halak toropna.

3:23 Ia pinompar ni si Gerson, ingkon marsaro di pudi ni undungundung i tungkan hasundutan.

3:24 Jala ingkon si Eliasap, anak ni Lael, ihutan ni pinompar ni si Gerson.

3:25 Ingkon angka anak ni si Gerson do panahatan ni undungundung parluhutan i, i ma abit rimberimbena di bagasan dohot di langitlangitna dohot rimberimbe tutup ni pintu haroroan tu undungundung parluhutan i.

3:26 Tole rimberimbe ni alaman dohot rimberimbe tutup ni pintu haroroan tu alaman na humaliang undungundung i dohot humaliang langgatan, ro di talina angka na masuk tu ulaonna be.

3:27 Sian pinompar ni si Kohat ro marga ni halak Amram dohot marga ni halak Isebar dohot marga ni halak Hebron dohot marga ni halak Usiel; i ma angka marga sian pinompar ni si Kohat.

3:28 Ia bilangan ni nasa baoa olat ni na marumur sabulan dohot lobi sian i ualu ribu onom ratus halak toropna, angka na marhalado di bagasan inganan na badia i.

3:29 Ia pinompar ni si Kohat, ingkon marsaro di lambung ni undungundung i tungkan dangsina.

3:30 Jala ingkon si Elisapan, anak ni si Usiel, ihutan ni pinompar ni si Kohat.

3:31 Ingkon nasida do panahatan ni poti i, meja i, parpalitoan i, angka langgatan i dohot ulaula angka na badia i, angka na pinangke marulaon na badia, ro di rimberimbe rap dohot sude ulaulana.

3:32 Alai ihutan ni angka induk ni halak Lepi, i ma si Eleasar, anak ni malim Aron; ibana do panahatan ni halak, angka na marhalado di inganan na badia i.

3:33 Sian pinompar ni si Merari ro marga ni halak Mahli dohot marga ni halak Musi; i ma angka marga sian pinompar ni si Merari.

3:34 Ia torop ni bilangannasida i, nasa baoa olat ni na marumur sabulan dohot lobi sian i onom ribu dua ratus halak toropna.

3:35 Ingkon si Zuriel, anak ni si Abihail, ihutan ni pinompar ni si Merari, jala ingkon marsaro nasida di lambung ni undungundung i tungkan utara.

3:36 Jala ingkon anak ni si Merari panahatan ni angka papan ni undungundung i ro di ransangransangna, angka tiangna, angka pat ni tiang i, ro di nasa ulaulana dohot sude na masuk tu ulaonna i.

3:37 Angkup ni angka tiang ni alaman humaliang rap dohot angka patna, labangna dohot talina.

3:38 Alai jolma angka na marsaro di adopan ni undungundung i tungkan habinsaran, di adopan ni undungundung parluhutan i tungkan purba, i ma si Musa. Si Aron dohot angka anakna i, asa nasida mangaradoti ulaon di inganan na badia i laho marhalado di halak Israel; tung sura jumonok halak sileban marulaon, ingkon marutang hosa ibana.

3:39 Bilangan ni halak Lepi luhutna, angka na binilang ni si Musa dohot si Aron, hombar tu hata ni Jahowa, mangihuthon margana be, nasa baoa olat ni na marumur sabulan dohot lobi sian i duapulu dua ribu halak toropna.

3:40 Dung i ro ma hata ni Jahowa tu si Musa: Bilangi ma nasa anak buhabaju di tongatonga ni halak Israel, olat ni na marumur sabulan dohot lobi sian i, jala buat huhut bilangan ni goargoarnasida i.

3:41 Dung i buatonmu ma di Ahu halak Lepi bahen singkat ni nasa baoa buhabaju di tongatonga ni halak Israel, ai Ahu do Jahowa; jala pinahan ni halak Lepi bahen singkat ni nasa buhabaju di tongatonga ni pinahan ni halak Israel.

3:42 Dung i dibilang si Musa ma, songon na tinonahon ni Jahowa tu ibana, nasa anak buhabaju di tongatonga ni halak Israel.

3:43 Jadi dapot ma bilangan ni goargoar ni nasa anak buhabaju, olat ni na marumur sabulan dohot lobi sian i duapulu dua ribu dua ratus pitupulu tolu halak toropna tarbilang.

3:44 Dung i ro ma hata ni Jahowa tu si Musa songon on:

3:45 Buat ma halak Lepi bahen singkat ni nasa anak buhabaju di tongatonga ni halak Israel, jala pinahan ni halak Lepi bahen singkat ni pinahannasida, asa Ahu nampuna halak Lepi; ai Ahu do Jahowa.

3:46 Angkup ni hepeng partobus ni sidua ratus pitupulu tolu halak, angka na ganda sian anak buhabaju ni halak Israel martimbangkon torop ni halak Lepi i.

3:47 Ingkon buatonmu do limalima sekkel tobus ni sasahalak mangihuthon sekkel di inganan na badia i, duapulu gera sasekkel.

3:48 Jala ingkon lehononmu do perak partobus ni halak angka na ganda i tu si Aron dohot tu angka anakna i.

3:49 Jadi dibuat si Musa ma perak partobus i sian halak angka na ganda i, angka na tinobus ni halak Lepi.

3:50 Sian buhabaju ni halak Israel do binuatna perak i saribu tolu ratus onompulu lima sekkel, marguru tu sekkel di inganan na badia.

3:51 Dung i dilehon si Musa ma perak partobus i tu si Aron dohot tu angka anakna, hombar tu na tinonahon ni Jahowa tu si Musa.

4 Musa 4

4:1 Dung i ro ma hata ni Jahowa tu si Musa dohot tu si Aron songon on:

4:2 Buat ma bilangan ni angka anak ni si Kohat sian tongatonga ni angka anak ni Lepi marmargamarga dohot marompuompu.

4:3 Olat ni na marumur tolupulu taon dohot lobi sian i sahat ro di limapulu taon umurna, nasa baoa na tau masuk tu ulaon, asa mangaradoti ulaon di bagasan undungundung parluhutan i.

4:4 On do tahe ulaon tohonan ni angka anak ni si Kohat di bagasan undungundung parluhutan, i ma na badia sahali.

4:5 Molo borhat parsaroan i, ingkon ro si Aron dohot angka anakna paijurhon rimberimbe i, jala balutonna tusi poti panindangion i.

4:6 Ingkon bahenonna muse tu atasna salampis bobak ni pitudar, pahembangonna muse tusi sada tutup sian hain na rata langit situtu, dung i bahenonna ma haluhaluna tusi.

4:7 Ingkon pahembangonna huhut tu meja hapeahan ni sagusagu na marhadohoan sada tutup sian hain na rata langit situtu, jala peakkononna tu atasna angka pinggan, saoan, hondi dohot mangkuk pangusean ni tuak tangkasan, jala sagusagu ariari ingkon peak di atasna.

4:8 Ingkon pahembangonna huhut tu atasna tutup sian hain ma merham, bahenonna muse tusi salampis bobak ni pitudar, dung i bahenonna tusi angka haluhaluna.

4:9 Dung i buatonnasida ma sada tutup sian hain na rata langit bahen pamaluti ni parpalitoan rap dohot palitona dohot panurturna, pangintopina ro di sude parmiahanna, angka na masuk tu ulaonna be.

4:10 Ingkon balutanna parpalitoan i ro di sude ulaulana tu bobak ni pitudar salampis, dung i ampehononna tu sada ruarua.

4:11 Tu atas langgatan sian sere pe ingkon pahembangonnasida sada tutup sian haen na rata langit, jala tutuponna muse dohot bobak ni pitudar, jala bahenonna tusi haluhaluna.

4:12 Ingkon buatonnasida ma nasa ulaula tohonan, angka na pinangkenasida di bagasan inganan na badia i jala balutanna do i tu haen na rata langit, jala tutuponna do i muse dohot bobak ni pitudar, jala ampehononna tu atas ni ruarua.

4:13 Ingkon paiasonna huhut langgatan i sian sirabun, jala pahembangonna tu atasna sada haen na tinubar.

4:14 Dung i bahenonna ma tu atasna saluhut ulaulana, angka na pinangkena marhalado di atasna, i ma angka parapiapian, garpu, siuksiuk dohot mangkuk pamispisan ro di sude ulaula tu langgatan i, jala ingkon balutanna do i tu bobak ni pitudar jala bahenonna tusi haluhaluna.

4:15 Ia dung sidung dibaluti si Aron dohot angka anakna i inganan na badia i ro di sude ulaula di inganan na badia i, uju naeng borhat parsaroan i, ingkon bongot ma angka anak ni si Kohat laho mangusung; alai ndang jadi jamaonnasida na badia i, ingkon mate nasida tung sura. I ma angka siusungon ni angka anak ni si Kohat sian undungundung parluhutan i.

4:16 Alai anggo si Eleasar, anak ni malim Aron ma panahatan ni ulaon tohonan patureture miak tu parpalitoan, tole pamurpuri bahen daupa na hushus, tole pelean sipanganon ariari dohot miak pamiahion, tohonan patureture sandok undungundung i ro di nasa isina, nang inganan na badia i ro di angka ulaulana.

4:17 Dung i ro ma hata ni Jahowa tu si Musa dohot tu si Aron songon on:

4:18 Ndang jadi loasonmuna rendep marga ni pinompar ni si Kohat sian tongatonga ni halak Lepi!

4:19 Ingkon on do bahenonmuna tu nasida, asa mangolu nasida, jala unang mate, tung sura ro nasida jumonok manjama na badia sahali: Ingkon si Aron dohot angka anakna masuk tu bagasan dohot patongonhon tu ganup nasida ulaonna be dohot siusungonna.

4:20 Alai ndang jadi masuk tu bagasan anggo nasida naeng marnida pamalutina di inganan na badia i, asa unang mate nasida.

4:21 Dung i ro muse hata ni Jahowa tu si Musa songon on:

4:22 Buat ma huhut bilangan ni angka anak ni si Gerson marompuompu dohot marmargamarga.

4:23 Olat ni na marumur tolupulu taon dohot lobi sian i sahat ro di limapulu taon umurna bilangonmu nasida nasa baoa na tau masuk tu ulaon, asa mangaradoti ulaon di bagasan undungundung parluhutan i.

4:24 On do tahe ulaon tohonan ni angka pinompar ni si Gerson, sibahenonna dohot siusungonna.

4:25 Ingkon nasida mangusung angka rimberimbe ni undungundung i, ro di undungundung parluhutan i tahe, rimberimbe langitlangitna dohot bobak ni pitudar pangkuphupina sian ginjang ro di rimberimbe tutup ni pintu haroroan tu undungundung parluhutan i.

4:26 Ro di angka rimberimbe ni alaman dohot rimberimbe tutup ni pintu laho tu alaman na humaliang undungundung dohot langgatan i, ro di angka talina dohot sude ulaula ni tohonannasida i, luhut tahe angka sibahenon disi, ingkon patupaonnasida do.

4:27 Hombar tu hata ni si Aron dohot angka anakna i tahe, ingkon radotan ni angka anak ni si Gerson sandok ulaon tohonan i, taringot tu sandok siusungonnasida dohot siulaonnasida; jala ingkon hamu pasahathon tu nasida, asa diringkoti sandok siusungonasida i.

4:28 On do tahe ulaon tohonan ni pinompar ni angka anak ni si Gerson di bagasan undungundung parluhutan i, jala siradotannasida i, ingkon marpandapotan tu si Itamar, anak ni malim Aron.

4:29 Angka anak ni si Merari pe marmargamarga dohot marompuompu, ingkon bilangonmu do.

4:30 Olat ni na marumur tolupulu taon dohot lobi sian i sahat ro di limapulu taon umurna bilangonmu nasida, sude baoa angka na tau masuk tu pargansion laho mangaradoti ulaon tohonan di undungundung parluhutan i.

4:31 Jala on do pasahaton siusungonnasida taringot tu sandok ulaon tohonannasida i di bagasan undungundung parluhutan i: angka papan ni undungundung, angka ransangransangna, angka tiangna rap dohot patna.

4:32 Angkup ni angka tiang ni alaman humaliang rap dohot patna, labangna dohot talina, ro di sude ulaulana ro di nasa na masuk tu tohonannasida i; pola ingkon goaronmuna mamilangi angka ulaula i pasahathon tu ganup siusungonna be.

4:33 On do tahe ulaon tohonan ni pinompar ni angka anak ni si Merari taringot tu saluhut siulaonnasida di bagasan undungundung parluhutan i, marpandapotan tu si Itamar, anak ni malim Aron.

4:34 Jadi tole ma si Musa dohot si Aron ro di angka induk ni luhutan i mamilangi angka anak ni si Kohat marmargamarga dohot marompuompu.

4:35 Olat ni na marumur tolupulu taon dohot lobi sian i sahat ro di limapulu taon umurna, sude baoa angka na tau masuk tu ulaon i, asa mangaradoti ulaon di bagasan undungundung parluhutan i.

4:36 Jala jolma angka na tarbilangi marmargamarga dua ribu pitu ratus limapulu halak toropna.

4:37 I do jolma angka na tarbilang sian pinompar ni si Kohat, sude jolma angka na marhalado di bagasan undungundung parluhutan i, angka naung binilang ni si Musa dohot si Aron, hombar tu hata ni Jahowa marhite sian si Musa.

4:38 Tarbilang do huhut angka anak ni si Gerson marmargamarga dohot marompuompu.

4:39 Olat ni na marumur tolupulu taon dohot lobi sian i, sahat ro di limapulu taon umurna, sude jolma angka na tau masuk tu pargansion mangaradoti ulaon di bagasan undungundung parluhutan i.

4:40 Jala jolma angka na tarbilangi marmargamarga dohot marompuompu dua ribu onom ratus tolupulu halak toropna.

4:41 I do jolma angka na tarbilang sian pinompar ni si Gerson, sude jolma angka na marhalado di bagasan undungundung parluhutan i, angka naung binilang ni si Musa dohot si Aron, hombar tu hata ni Jahowa.

4:42 Tarbilang do huhut angka anak ni si Merari marmargamarga dohot marompuompu.

4:43 Olat ni na marumur tolupulu taon dohot lobi sian i, sahat ro di limapulu taon umurna, sude jolma angka na tau masuk tu pargansion mangaradoti ulaon di bagasan undungundung parluhutan i.

4:44 Jala jolma angka na tarbilangi marmargamarga tolu ribu dua ratus halak toropna.

4:45 I do jolma angka na tarbilang sian pinompar ni si Merari, angka naung binilang ni si Musa dohot si Aron, hombar tu hata ni Jahowa marhite sian si Musa.

4:46 Sude jolma na tarbilang, angka naung binilang ni si Musa dohot si Aron ro di angka induk ni Israel sian halak Lepi marmargamarga dohot marompuompu.

4:47 Olat ni na marumur tolupulu taon dohot lobi sian i sahat ro di limapulu taon umurna, nasa baoa angka na masuk mangula ulaon tohonan dohot ulaon mangusung di bagasan undungundung parluhutan i.

4:48 Luhut angka na tarbilangi ualu ribu lima ratus ualupulu halak toropna.

4:49 Hombar tu hata ni Jahowa tarbilang nasida marhite sian si Musa, patongonhon ganup tu ulaon tohonanna dohot tu siusungonna; jala i do pamilangionna, na tinonahon ni Jahowa tu si Musa.

4 Musa 5

5:1 Dung i ro muse hata ni Jahowa tu si Musa songon on:

5:2 Dokkon ma halak Israel, asa dipabali nasida sian parsaroan saluhut halak na puruon dohot na somal marnipinipi ro di sude halak na ramun binahen ni bangke.

5:3 Nang baoa, nang parompuan, ingkon pabalionmuna do tu balian ni parsaroan i, asa unang diramuni nasida parsaroannasida i, ala maringan Ahu di tongatongamuna.

5:4 Jadi dibahen halak Israel ma songon i, dipabali ma nasida tu balian ni parsaroan i, hombar tu hata ni Jahowa tu si Musa, songon i ma dibahen halak Israel.

5:5 Dung i ro muse hata ni Jahowa tu si Musa songon on:

5:6 Paboa ma tu halak Israel: Tung sura sahalak baoa, manang parompuan naung mambahen nanggo sada sian angka dosa ni jolma, asa manjahati dompak Jahowa, laos marsala tu dirina jolma sisongon i.

5:7 Ingkon topotanna ma dosana, angka naung binahenna i, jala ingkon pasuangonna ugasan i tu nampunasa hian, jala ambaanna tusi saparlimana, gararonna tu halak parutanganna i.

5:8 Alai tung sura so adong di baoa i panean sihasolhotanna panjaloan utang i, ingkon tu Jahowa gararon utang i, bahen jambar ni malim, angkup ni birubiru tunggal pardenggan i, na mambahen pardengganan tu ibana.

5:9 Luhut pelean tatingan pe sian saluhut na pinarbadiaan ni halak Israel, angka na binoannasida tu malim, ingkon malim i nampunasa.

5:10 Jala manang ise na pabadiahon manang aha, laos ibana do nampunasa; jala manang ise na mangalehon tu malim manang aha, laos ibana do nampunasa.

5:11 Dung i ninna Jahowa muse tu si Musa songon on:

5:12 Paboa ma tu halak Israel songon on: Tung sura dituhas sada baoa jolmana tardege pinggol ni dalan palea baoa i.

5:13 Nunga pola sampur baoa na asing tu nasida, alai ndang dapot diida sinondukna i, marsibuni nasida tarramun, jala ndang adong sitindangi dompak nasida, manang dapot tartangkup nasida.

5:14 Tung sura songgop tu ibana tondi pangiburuon, gabe mangiburu ibana mida jolmana, ala naung tutu tarramun nasida; manang songgop pe tondi pangiburuon tu ibana gabe mangiburu ibana mida jolmana, hape ndang tutu nian tarramun nasida.

5:15 Jadi ingkon boanon ni baoa i ma jolmana tu jolo ni malim, boanonna huhut peleanna taringot tu nasida, saparsampulu epah itak dahanon; alai ndang jadi dogilonna tusi miak, jala ndang jadi bahenonna daupa tusi; ai pelean sipanganon pangiburuon do i, pelean sipanganon parningotan, pasingothon hajahaton.

5:16 Dung i toguon ni malim i ma nasida, asa pajongjongkon di adopan ni Jahowa.

5:17 Dung i buaton ni malim i ma sian aek na badia di bagasan guriguri tano, buatonna huhut orbuk sian pantar ni undungundung i jala bahenonna do i tu bagasan aek i.

5:18 Dung i pajongjongon ni malim i ma parompuan i di adopan ni Jahowa, songon i manangkas uluna, jala lehononna tu tanganna pelean sipanganon parningotan, i ma pelean sipanganon pangiburuon, jala ingkon di bagasan tangan ni malim i aek na paet na parohon torutoru.

5:19 Dung i patolonon ni malim ma parompuan i, huhut dohononna tu nasida: Molo tung so sampur ho tu manang ise jala molo tung so tutu tardege pinggol ni dalan ho gabe tarramun, lias ma ho sian torutoru hinorhon ni aek na paet on.

5:20 Alai molo tutu ho tardege pinggol ni dalan gabe tarramun jala sampur ho tu baoa na asing di balik ni sinondukmu.

5:21 Ingkon patolonon ni malim ma parompuan i marhitehite sumpa burabura on; laos dohonon ni malim ma tu parompuan i: Sai dibahen Jahowa ma ho gabe panginonaan ni bura dohot torutoru di tongatonga ni bangsom, asa marpuhungan gontingmu bahenon ni Jahowa, jala busungon ia butuham.

5:22 Ingkon masuk ma aek on na parohon torutoru tu bagasan butuham, asa busungon butuham dibahen jala puhung gontingmu! Dung i dohonon ni parompuan i ma Amen, Amen!

5:23 Dung i ingkon suraton ni malim i ma angka bura i tu pustaha sambulung, jala apusanna muse dohot aek na paet i.

5:24 Dung i painumhononna muse tu parompuan i aek na paet i na parohon torutoru, asa masuk tu bagasan butuhana aek na parohon torutoru i gabe jea bolon.

5:25 Dung i ingkon buaton ni malim ma sian tangan ni parompuan i pelean sipanganon pangiburuon, jala tatingtatingonna pelean sipanganon i di adopan ni Jahowa, laos pelehononna ma i di atas langgatan.

5:26 Dung i pohulon ni malim i ma sampohul sian pelean sipanganon bahen parningotanna jala suda do i tutungonna di atas langgatan, dung i painumhononna ma anggo aek i tu parompuan i.

5:27 Ia dung dipainumhon aek i tu nasida, molo tung na tutu tarramun nasida jala marlea sinondukna i dibahen, ingkon masuk ma tu bagasan nasida aek na parohon torutoru gabe jea bolon, gabe busungon butuhana jala puhung gontingna, jala parompuan i gabe panginonaan ni bura di tongatonga ni bangsona.

5:28 Alai tung sura ndang tarramun parompuan i, lias do nasida tahe ndang mangonai torutoru tu nasida, tarbahensa do marhangoluan tu joloan on.

5:29 I ma patik taringot tu pangiburuon, tung sura tardege pinggol ni dalan sada parompuan na marharajaan, gabe tarramun.

5:30 Manang tung sura songgop tu sada baoa tondi pangiburuon, gabe mangiburu ibana mida jolmana, ingkon pajongjongonna jolmana i di adopan ni Jahowa, jala bahenon ni malim i tu nasida sandok hombar tu patikon.

5:31 Jadi ingkon lias ma anggo baoa i sian hajahaton, alai anggo tu parompuan i, ingkon manginona ma hajahatonna i.

4 Musa 6

6:1 Dung i ro muse hata ni Jahowa tu si Musa songon on:

6:2 Paboa ma tu halak Israel angka hata on: Tung sura sada baoa manang parompuan marbagabaga hasurungan, bagabaga ni halak Nasir, naeng pasahathon dirina tu Jahowa.

6:3 Ingkon paholangonna dirina sian anggur dohot siinumon na horas, jala ndang jadi inumonna tuak na pang manang na hona raru, jala ndang jadi inumonna sandok aek ni parbue ni anggur jala ndang jadi panganonna parbue ni anggur nambura tinapu manang na jinomur.

6:4 Saleleng masa bagabaga hanasironna ndang jadi panganonna agia aha na pinauli sian hau anggur, nang sian batuna manang langkatna.

6:5 Saleleng masa bagabaga hanasironna ndang jadi dais raut parnabung tu uluna; saleleng so gok dope ariari hanasironna tu Jahowa, ingkon badia ibana, ingkon pasombuonna ganjang obuk ni uluna i.

6:6 Saleleng masa ariari ni hanasironna tu Jahowa ndang jadi ibana jumonok tu halak na mate.

6:7 Ndang jadi ramunanna dirina nang ala ni bangke ni amana manang inana, anggina manang ibotona pe, ai bagabaga hanasiron tu Debatana do di atas uluna.

6:8 Saleleng ariari ni hanasironna, badia do ibana di Jahowa.

6:9 Tung sura mate satongkin sahalak di lambungna so pangkirimanna, tarramun ma ulu hanasironna i; dibahen i ingkon gorbangonna uluna di ari pangurasanna; di ari papituhon tahe ingkon gorbangonna uluna.

6:10 Tole paualuarihon ingkon boanonna dua anduhur tabu manang dua anak ni darapati tu malim, tu pintu ni undungundung parluhutan i.

6:11 Ingkon hobason ni malim ma na sada bahen pelean pardosaon, jala na sadanari bahen pelean situtungon, asa mambahen pardenggananna, ala naung mardosa ibana binahen ni bangke i, asa parbadiaanna uluna di ari na sasada i.

6:12 Asa diparata muse ariari hanasironna binagabagahonna tu Jahowa, ingkon boanonna huhut sada anak ni birubiru na marumur sataon bahen pelean parsalaan. Alai ndang be masuk tu etongan anggo angka ari parjolo i, ala naung tarramun hanasironna i.

6:13 Jala on do patik tu halak Nasir: Ia dung gok ariari hanasironna i boanon ma ibana tu pintu ni undungundung parluhutan i.

6:14 Ingkon boanonna huhut peleanna tu Jahowa, sada anak ni birubiru tunggal na marumur sataon na so martihas bahen pelean situtungon dohot sada anak ni birubiru boruboru na marumur sataon, na so martihas, bahen pelean pardosaan, jala sada birubiru tunggal na so martihas bahen pelean hamauliateon.

6:15 Tole muse sahirang na marisi sagusagu na so niasoman sian itak na lamot na nidogil dohot miak dohot timpatimpa na so niasoman na marsapu miak rap dohot peleanna sipanganon dohot siinumon.

6:16 Dung i boanon ni malim ma i jumonok tu adopan ni Jahowa laos hobasonna bahen peleanna pardosaon dohot situtungon.

6:17 Dung i pelehononna ma birubiru tunggal i bahen pelean hamauliateon tu Jahowa rap dohot hirang na marisi sagusagu na so niasoman; ingkon pelehonon ni malim i huhut peleanna sipanganon dohot siinumon.

6:18 Dung i ingkon gorbangon ni halak Nasir i ma ulu hanasironnasida i, di jolo pintu ni undungundung parluhutan i, dung i ingkon buatonna ma obuk ni ulu hanasironna i jala bahenonna tu atas api na di toru ni pelean hamauliateon i.

6:19 Dung i buaton ni malim i ma sian birubiru tunggal i hae jolo naung nilompa i dohot sada sagusagu na so niasoman sian hirang i dohot sada timpatimpa na so niasoman jala ampehononna do i tu tangan ni halak Nasir i duansa, dung ginorbanganna obuk ni hanasironna.

6:20 Dung i ingkon tatingtatingon ni malim ma i bahen pelean tatingtatingon di adopan ni Jahowa; na badia di malim ma i rap dohot andora pelean tatingan dohot hae jolo pelean tatingan i. Dung salpu i jadi ma minum anggur halak Nasir i.

6:21 I ma patik tu halak Nasir, naung marbagahon peleanna tu Jahowa ala ni hanasironna, lobi sian na dapot tanganna hian; hombar tu bagabagana naung binagabagahonna i, ingkon songon i do bahenonna hombar tu patik ni hanasironna i.

6:22 Dung i ro muse ma hata ni Jahowa tu si Musa songon on:

6:23 Patolhas ma hatangkon tu si Aron dohot tu angka anakna i: Ingkon songon on do dohononmuna tu halak Israel, laho mamasumasu nasida:

6:24 Sai dipasupasu jala diramoti Jahowa ma ho!

6:25 Dipasondangkon Jahowa ma Bohina tu ho, jala asi rohana mida ho!

6:26 Didompakkon Jahowa ma Bohina tu ho jala dipasaorhon ma dame tu tondim!

6:27 Ingkon songon i ma ampehononnasida Goarhu (Jahowa) tu halak Israel, asa Ahu mamasumasu nasida.

4 Musa 7

7:1 Jadi dung jumpang ari hasisidungna naung pinajongjong ni si Musa undungundung i, naung miniahanna dohot naung pinarbadiaanna ro di saluhut ulaulana, sun miniahanna dohot pinarbadiaanna nang langgatan i ro di sandok ulaulana.

7:2 Jadi diboan angka induk ni Israel, angka ihutan marompuompu, nasida angka induk marmargamarga, angka na manguluhon halak na tarbilangi.

7:3 Diboan nasida ma tutu angka peleannasida i tu adopan ni Jahowa: Onom hureta marhulambu dohot sampulu dua lombu, duadua induk sada hureta jala salombu be ganup induk, jala diboan nasida do i jumonok tu adopan ni undungundung i.

7:4 Dung i ro muse hata ni Jahowa tu si Musa songon on:

7:5 Jalo ma luhutna i sian nasida, asa masuk angka i tu ulaon di undungundung parluhutan i, jala pasahat ma i tu halak Lepi, tu ganup hombar tu ulaonna be.

7:6 Jadi dijalo si Musa ma angka hureta dohot lombu i jala dipasahat ma i tu halak Lepi.

7:7 Dua hureta dohot opat lombu dipasahat tu angka anak ni si Gerson, hombar tu ulaonnasida i.

7:8 Jala opat hureta dohot ualu lombu dipasahat tu angka anak ni si Merari, hombar tu ulaonnasida i, marpandapotan tu si Itamar, anak ni malim Aron.

7:9 Alai anggo tu angka anak ni si Kohat, ndang agia aha dilehon, ala nasida panahatan ni ulaon di inganan na badia i, ingkon usungonnasida do i di abarana.

7:10 Jadi laos dipelehon angka induk i ma peleanna be laho pasahathon langgatan i di ari uju pamiahanna, laos diboan angka induk i do peleannasida i jumonok tu adopan ni langgatan i.

7:11 Dung i ninna Jahowa ma tu si Musa: Ingkon sasahalak induk i di arina be mamboan peleanna laho pasahathon langgatan i.

7:12 Jala na mamelehon peleanna di ari parjolo, i ma si Nahason, anak ni si Aminadab, sian marga Juda.

7:13 Ia peleanna i sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:14 Sada saoan sian sere sampulu sekkel dokdokna, gok daupa.

7:15 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:16 Sada hambing tunggal bahen pelean pardosaon.

7:17 Dua lombu, lima birubiru tunggal, lima hambing tunggal dohot lima anak ni birubiru ma marumur sataon bahen pelean hamauliateon. I ma pelean ni si Nahason, anak ni si Aminadab.

7:18 Di ari paduahon mamelehon Natanael, anak ni si Zuar, ihutan ni halak Isasar.

7:19 Pelean pinelehonna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:20 Sada saoan sian sere sampulu sekkel dokdokna, gok daupa.

7:21 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:22 Sada hambing tunggal bahen pelean pardosaon.

7:23 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Natanael, anak ni si Zuar.

7:24 Di ari patoluhon mamboan peleanna ihutan ni halak Zebulon, i ma si Eliab, anak ni si Helon.

7:25 Pelean binoanna i, i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak, bahen pelean sipanganon.

7:26 Sada saoan sian sere sampulu sekkel dokdokna, gok daupa.

7:27 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:28 Sada hambing tunggal bahen pelean pardosaon.

7:29 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Eliab, anak ni si Helon.

7:30 Di ari paopathon mamboan peleanna ihutan ni halak Ruben, i ma si Elizur, anak ni si Sedeur.

7:31 Pelean binoanna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:32 Sada saoan sian sere sampulu sekkel dokdokna, gok daupa.

7:33 Sada anak ni lombu, sada birubiru tunggal, sada anak ni birubiru, na marumur sataon bahen pelean situtungon.

7:34 Sada hambing tunggal bahen pelean pardosaon.

7:35 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Elizur, anak ni si Sedeur.

7:36 Di ari palimahon mamboan peleanna ihutan ni halak Simeon, i ma si Selumiel, anak ni si Zurisaddai.

7:37 Pelean binoanna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:38 Sada saoan sian sere sampulu sekkel dokdokna, gok daupa.

7:39 Sada anak ni lombu, sada birubiru tunggal, sada anak ni birubiru, na marumur sataon bahen pelean situtungon.

7:40 Sada hambing tunggal bahen pelean pardosaon.

7:41 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Selumiel anak ni si Zurisaddai.

7:42 Di ari paonomhon mamboan peleanna ihutan ni halak Gad, i ma si Eliasap, anak ni si Deuel.

7:43 Pelean binoanna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:44 Sada saoan sian sere, sampulu sekkel dokdokna, gok daupa.

7:45 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:46 Sada hambing tunggal bahen pelean pardosaon.

7:47 Dua lombu, lima birubiru tunggal, lima hambing tunggal dohot lima anak ni birubiru na marumur sataon bahen pelean hamauliateon. I ma pelean ni si Eliasap, anak ni si Deuel.

7:48 Di ari papituhon mamboan peleanna ihutan ni halak Epraim, i ma si Elisama, anak ni si Amihud.

7:49 Pelean binoanna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:50 Sada saoan sian sere sampulu sekkel dokdokna, gok daupa.

7:51 Sada anak ni lombu, sada birubiru tunggal, sada anak ni birubiru, na marumur sataon bahen pelean situtungon.

7:52 Sada hambing tunggal bahen pelean pardosaon.

7:53 Dua lombu, lima birubiru tunggal, lima hambing tunggal dohot lima anak ni birubiru na marumur sataon bahen pelean hamauliateon. I ma pelean ni si Elisama, anak ni si Amihud.

7:54 Di ari paualuhon mamboan peleanna ihutan ni halak Manasse, i ma si Gamaliel, anak ni si Pedazur.

7:55 Pelean binoanna i i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:56 Sada saoan sian sere sampulu sekkel dokdokna, gok daupa.

7:57 Sada anak ni lombu, sada birubiru tunggal, sada anak ni birubiru, na marumur sataon bahen pelean situtungon.

7:58 Sada hambing tunggal bahen pelean pardosaon.

7:59 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Gamaliel, anak ni si Pedazur.

7:60 Di ari pasiahon mamboan peleanna ihutan ni halak Benjamin, i ma si Abidan, anak ni si Gidion i.

7:61 Pelean binoanna i, i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:62 Sada saoan sian sere sampulu sekkel dokdokna, gok daupa.

7:63 Sada anak ni lombu, sada birubiru tunggal, sada anak ni birubiru, na marumur sataon bahen pelean situtungon.

7:64 Sada hambing tunggal bahen pelean pardosaon.

7:65 Dua lombu, lima birubiru tunggal, lima hambing tunggal dohot lima anak ni birubiru, na marumur sataon bahen pelean hamauliateon. I ma pelean ni si Abidan, anak ni si Gidion i.

7:66 Di ari pasampuluhon mamboan peleanna ihutan ni halak Dan, i ma si Ahieser, anak ni si Amisaddai.

7:67 Pelean binoanna i, i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak, bahen pelean sipanganon.

7:68 Sada saoan sian sere sampulu sekkel dokdokna, gok daupa.

7:69 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:70 Sada hambing tunggal bahen pelean pardosaon.

7:71 Dua lombu, lima birubiru tunggal, lima hambing tunggal dohot lima anak ni birubiru na marumur sataon bahen pelean hamauliateon. I ma pelean ni si Ahieser, anak ni si Amisaddai.

7:72 Di ari pasampulusadahon mamboan peleanna ihutan ni halak Aser, i ma si Pagiel, anak ni si Okran.

7:73 Pelean binoanna i, i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:74 Sada saoan sian sere sampulu sekkel dokdokna, gok daupa.

7:75 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:76 Sada hambing tunggal bahen pelean pardosaon.

7:77 Dua lombu, lima birubiru tunggal, lima hambing tunggal dohot lima anak ni birubiru na marumur sataon bahen pelean hamauliateon. I ma pelean ni si Pagiel, anak ni si Okran.

7:78 Di ari pasampulu duahon mamboan peleanna ihutan ni halak Naptali, i ma si Ahira, anak ni si Enan.

7:79 Pelean binoanna i, i ma sada saoan perak, saratus tolupulu sekkel dokdokna; sada mangkuk pamispisan sian perak, pitupulu sekkel dokdokna, marguru tu sekkel di inganan na badia i; duansa i gok dohot itak na lamot, na nidogil dohot miak bahen pelean sipanganon.

7:80 Sada saoan sian sere sampulu sekkel dokdokna, gok daupa.

7:81 Sada anak ni lombu, sada birubiru tunggal, sada anak ni birubiru na marumur sataon bahen pelean situtungon.

7:82 Sada hambing tunggal bahen pelean pardosaon.

7:83 Dua lombu, lima birubiru tunggal, lima hambing tunggal dohot lima anak ni birubiru na marumur sataon bahen pelean hamauliateon. I ma pelean ni si Ahira, anak ni si Enan.

7:84 On do pelean laho pasahathon langgatan di ari pamiahionna sian angka ihutan ni Israel sampulu dua saoan perak, sampulu dua mangkuk pamispisan sian perak, sampulu dua saoan sere.

7:85 Saratus tolupulu sekkel perak dokdok ni saoan i sadasada, jala pitupulu sekkel dokdok ni mangkuk pamispisani sadasada, asa dokdok ni saluhut perak tu angka ulaula i dua ribu opat ratus sekkel marguru tu sekkel di inganan na badia i.

7:86 Sampulu dua saoan sere, angka na gok daupa, sampulu sekkel dokdokna sadasada, marguru tu sekkel di inganan na badia i, asa dokdok ni saluhut sere tu angka saoan i saratus duapulu sekkel.

7:87 Saluhut pinahan bahen pelean situtungon, i ma sampulu dua lombu, sampulu dua birubiru tunggal, sampulu dua anak ni birubiru na marumur sataon rap dohot peleanna sipanganon dohot sampulu dua hambing tunggal bahen pelean pardosaon.

7:88 Ia torop ni angka pinahan bahen pelean hamauliateon, i ma duapulu opat anak ni lombu, onompulu birubiru tunggal, onompulu hambing tunggal, onompulu anak ni birubiru na marumur sataon. I ma angka pelean laho pasahathon langgatan i, dung sidung dimiahi.

7:89 Dung i di na masuk si Musa tu bagasan undungundung parluhutan i, naeng mangkatai dohot Jahowa, sai tangkas do dibege soara ni Jahowa, na mangkatai dohot ibana sian langkop pardengganan, na di atas ni poti panindangion i di holangholang ni kerubim na dua i, sian i mangkatai Jahowa tu ibana.

4 Musa 8

8:1 Dung i ro ma hata ni Jahowa tu si Musa songon on:

8:2 Paboa ma tu si Aron hatangkon: Molo dipagalak ho angka palito i, ingkon tu jolo ni parpalitoan i marsinondang palito na pitu i.

8:3 Jadi dibahen si Aron ma songon i; tungkan jolo ni parpalitoan i do dipagalak angka palitona, hombar tu tona ni Jahowa tu si Musa.

8:4 Songon on do parpaulina di parpalitoan i sian sere na pita sangkimpal ditopa badanna ro di bungana, hombar tu tiruan na pinatuduhon ni Jahowa tu si Musa, songon i do dipauli parpalitoan i.

8:5 Dung i ro muse hata ni Jahowa tu si Musa songon on:

8:6 Arahon ma halak Lepi sian tongatonga ni halak Israel jala urasi ma nasida.

8:7 Alai songon on do bahenonmu tu nasida laho mangurasi nasida: Ingkon pistikkononmu tu nasida aek pangurasion sian dosa, jala ingkon gorbangonna sandok dagingnasida i, jala sunsionna pangkeanna, huhut mangurasi dirina.

8:8 Dung i ingkon buatonnasida ma sada anak ni lombu rap dohot itak na lamot na nidogil dohot miak bahen peleanna sipanganon; dung i ingkon buatonmu ma anak ni lombu sadanari bahen pelean pardosaon.

8:9 Dung i dohononmu ma halak Lepi ro jumonok tu adopan ni undungundung parluhutan i, ingkon paluhutonmu huhut sandok luhutan ni halak Israel.

8:10 Dung i dohononmu muse halak Lepi ro jumonok tu adopan ni Jahowa, dung i ingkon ampehonon ni halak Israel tangannasida tu halak Lepi.

8:11 Dung i ingkon patogutoguon ni si Aron ma halak Lepi di adopan ni Jahowa, hira sada pelean tatingan sian halak Israel, asa tau nasida mangaradoti ulaon ni Jahowa.

8:12 Dung i ingkon ampehonon ni halak Lepi ma tangannasida tu ulu ni angka lombu i, ingkon hobasonna na sada bahen pelean pardosaon, jala na sadanari bahen pelean situtungon di Jahowa mambahen pardengganan tu halak Lepi.

8:13 Dung i ingkon pajongjongonmu halak Lepi di adopan ni si Aron dohot angka anakna i, laos patogutoguonmu nasida bahen pelean tatingan di Jahowa.

8:14 Asa ingkon papulihonmu halak Lepi sian tongatonga ni halak Israel, asa Ahu nampuna halak Lepi.

8:15 Dung songon i, ingkon masuk ma halak Lepi, asa marulaon nasida di bagasan undungundung parluhutan i; ingkon songon i nasida urasonmu, jala patogutoguonmu bahen pelean tatingan.

8:16 Ai silehonlehon tu Ahu do nasida sian tongatonga ni halak Israel; ai singkat ni nasa anak buhabaju sian halak Israel do nasida hubuat di Ahu.

8:17 Ai Ahu hian do nampuna nasa anak buhabaju di tongatonga ni halak Israel, nang sian jolma, nang sian pinahan, olat ni ari dung Ahu mambunu nasa anak buhabaju di tano Misir, nunga huparbadiai hian nasida di Ahu.

8:18 Jala nunga hubuat halak Lepi singkat ni nasa anak buhabaju di tongatonga ni halak Israel.

8:19 Jala nunga hubasabasahon halak Lepi bahen dongan ni si Aron dohot angka anakna i sian tongatonga ni halak Israel, asa diradoti ulaon ni halak Israel di bagasan undungundung parluhutan i dohot mambahen pardengganan tu halak Israel, asa unang masa begu di tongatonga ni halak Israel, molo ro nasida jumonok tu inganan na badia i.

8:20 Dung i dibahen si Musa dohot si Aron dohot sandok luhutan ni halak Israel ma songon i tu halak Lepi, hombar tu sandok na tinonahon ni Jahowa tu si Musa taringot tu halak Lepi, laos songon i ma dibahen halak Israel tu nasida.

8:21 Dung i diuras halak Lepi ma dirina be sian dosa jala disunci pangkeanna be, laos ditogutogu si Aron nasida bahen pelean tatingan di adopan ni Jahowa, asa si Aron mambahen pardengganan tu nasida laho manguras dirinasida i.

8:22 Dung songon i masuk ma halak Lepi laho mangaradoti ulaonnasida i di bagasan undungundung parluhutan i di adopan ni si Aron dohot angka anakna i, songon na tinonahon ni Jahowa tu si Musa, taringot tu halak Lepi, songon i do dibahen tu nasida.

8:23 Dung i ro muse ma hata ni Jahowa tu si Musa songon on:

8:24 On do na tama siingoton ni halak Lepi: Olat ni na marumur duapulu lima taon dohot lobi sian i, ingkon masuk ibana tu pargansion marulaon di undungundung parluhutan i.

8:25 Alai olat ni na marumur limapulu taon malua ma nasida sian ulaon tohonan, ndang jadi be marulaon nasida.

8:26 Jadi do nian urupanna angka anggina marulaon di undungundung parluhutan i, mangaradoti siradotan i, alai ndang be jadi nasida tohonan di ulaon i. Ingkon songon i bahenonmu tu halak Lepi, taringot tu siradotannasida i.

4 Musa 9

9:1 Dung i ro muse hata ni Jahowa tu si Musa di halongonan Sinai, di taon paduahon, dung ruar nasida sian tano Misir, di bulan sipaha sada, ninna ma:

9:2 Ingkon marulaon Paska halak Israel di tingkina naung binuhul hian.

9:3 Di ari sampulu opat bulan on mareak bodari, ingkon hobasonmuna do i di tingkina naung binuhul hian; ingkon hombar tu sude aturanna dohot patikna do i hobasonmuna.

9:4 Dung i didokkon si Musa ma halak Israel marulaon Paska.

9:5 Jadi saut ma nasida marulaon Paska di ari sampulu opat di bulan sipaha sada mareak bodari di halongonan Sinai; sandok songon na tinonahon ni Jahowa tu si Musa, songon i do dibahen halak Israel.

9:6 Alai tahe adong do deba baoa angka na ramun, binahen ni bangke ni jolma, jadi ndang tarbahen nasida marulaon Paska di ari na sasada i; laos ro ma nasida tu adopan ni si Musa dohot si Aron di ari na sasada i.

9:7 Laos didok nasida ma tu ibana: Na ramun do hami dibahen bangke ni jolma, boasa ma tung ummuba ia hami, so jadi hami mamboan pelean tu Jahowa di tingkina naung binuhul di tongatonga ni halak Israel?

9:8 Dung i ninna si Musa ma tu nasida: Paima hamu dison, asa jolo hubege manang aha dohonon ni Jahowa taringot tu hamu.

9:9 Dung i ro ma hata ni Jahowa tu si Musa songon on:

9:10 Hatahon ma tu halak Israel hatangkon: Tung sura tarramun manang ise di hamu manang di pinomparmuna sogot binahen ni bangke manang di pardalanan na dao ibana, ingkon tarbahen ibana do marulaon Paska di Jahowa.

9:11 Ingkon di bulan sipaha dua, di ari sampulu opat mareak bodari nasida marulaon Paska, ingkon panganonnasidai mardongan sagusagu na so niasoman dohot ingkau paet.

9:12 Ndang jadi tebahononhon sian i ro di manogotna i, jala ndang jadi ponggolhononhon holiholina nanggo sada; ingkon hombar tu sandok aturan ni Paska, nasida marulaon Paska.

9:13 Alai tahe manang ise na ias jala ndang di pardalanan ibana, hape sundat ibana marulaon Paska, ingkon siaphononhon ibana sian tongatonga ni bangsona, ala na so binoanna pelean tu Jahowa di tingkina naung binuhul hian, ingkon manginona tu ibana dosana i.

9:14 Tung sura manginsua di tongatongamuna sada halak dagang, na naeng marulaon Paska di Jahowa, ingkon ulahononna do i hombar tu aturan dohot patik ni Paska hian; ingkon sisada uhum do i di hamu, dos di halak dagang songon di isi ni tano i hian.

9:15 Dung i di ari uju pinajongjongna undungundung i dihungkupi ombun i ma undungundung panindangion i, jala olat ni bodari sahat ro di manogotna i, sai mangulon ombun i di atas ni undungundung i idaon songon rupa ni api.

9:16 Sai songon i do tongtong ombun i manghungkupisa, alai anggo bornginna i, idaon songon rupa ni api.

9:17 Jadi disi manaek ombun i sian atas ni undungundung i, borhat ma halak Israel mardalan, tole muse mangulon ombun i manang di inganan dia, laos disi ma marsaro nang halak Israel.

9:18 Asa marguru tu hata ni Jahowa borhat halak Israel, jala marguru tu hata ni Jahowa nasida marsaro; saleleng mangulon ombun i di atas undungundung i marsaro nasida.

9:19 Molo pola nania leleng ombun i mangulon di atas undungundung i, sai diradoti halak Israel do siradotannasida hian tu Jahowa, jala ndang borhat nasida.

9:20 Suang songon i do nang jumpa so sadia leleng ombun i mangulon di atas undungundung i; asa marguru tu hata ni Jahowa nasida marsaro, jala marguru tu hata ni Jahowa nasida borhat muse.

9:21 Tung sura holan sian bodari sahat ro di manogotna i ombun i mangulon, tole manogotna i manaek ombun i, borhat ma dohot nasida, nang arian, nang borngin, molo manaek ombun i, borhat ma nasida.

9:22 Tung sura dua ari, manang sabulan, manang lumeleng sian i ombun i mangulon di atas undungundung i, marsaro ma dohot halak Israel, ndang borhat nasida; alai molo manaek ombun i, borhat ma nasida.

9:23 Hombar tu hata ni Jahowa tahe nasida marsaro jala hombar tu hata ni Jahowa nasida borhat muse, asa diradoti nasida siradotanna hian tu Jahowa, hombar tu hata ni Jahowa marhite sian si Musa.

4 Musa 10

10:1 Dung i ro muse hata ni Jahowa tu si Musa songon on:

10:2 Bahen ma di ho dua sarune sian perak, ingkon sian sangkimpal perak do i topaonmu jala ingkon marhite sian i paluhutonmu luhutan i, jala dohononmu borhat angka parsaroan i.

10:3 Molo tung duansa sarune i dipalu, ingkon marluhut ma sandok luhutan i tu lambungmu di adopan ni pintu ni undungundung parluhutan i.

10:4 Molo holan sada sarune i mangkuling, ingkon marluhut ma tu lambungmu angka induk, angka ihutan ni halak Israel marriburibu.

10:5 Alai molo marsoara toletole sarune i, ingkon tole ma borhat parsaroan angka na marsaro tungkan habinsaran.

10:6 Molo marsoara toletole sarune i paduahalihon, ingkon borhat parsaroan angka na marsaro tungkan dangsina; ingkon jolo marsoara toletole sarune i, asa jadi borhat nasida.

10:7 Alai molo naeng paluhuton luhutan i ingkon pola sangombas mangkuling sarune i, unang marsoara toletole.

10:8 Ingkon angka anak ni si Aron, angka naung bangkit malim mamalu sarune i; i ma aturan na hot di hamu dohot di pinomparmuna ro di salelenglelengna.

10:9 Tung sura borhat hamu tu parporangan di tanomuna i mangalo musumuna na manosaknosak hamu, ingkon marsoara toletole hamu marsarune, taringotanna ma hamu di adopan ni Jahowa, Debatamuna i, jala paluaonna hamu sian musumuna i.

10:10 Suang songon i di ari halalas ni rohamuna, di angka ari rayamuna pe naung binuhul hian dohot di poltak ni bulan, ingkon paluonmu do angka sarune i laho pasahathon peleanmuna situtungon dohot peleanmuna hamauliateon, asa mambahen parningotan di hamu di adopan ni Debatamuna; ai Ahu do Jahowa, Debatamuna i.

10:11 Tole paduataonhon, di bulan sipaha dua, di ari duapulu, manaek ma ombun i sian atas ni undungundung panindangion i.

10:12 Dung i borhat ma halak Israel mangihuthon jojornasida i mardalan sian parhorsihan Sinai, gabe mangulon ombun i muse di halongonan Elaparan.

10:13 Jadi borhat ma parjolo i marguru tu hata ni Jahowa marhite sian si Musa.

10:14 Borhat tahe jumolo partonggol ni parsaroan ni halak Juda rap dohot parduaannasida i jala ihutan ni parduaanna i, i ma si Nahason, anak ni si Aminadab.

10:15 Jala ihutan ni parduaan ni marga ni halak Isasar, i ma si Natanael, anak ni si Zuar.

10:16 Jala ihutan ni parduaan ni marga ni halak Zebulon, i ma si Eliab, anak ni si Helon.

10:17 Dung i diloha ma undungundung i, jadi borhat ma angka anak ni si Gerson dohot si Merari, angka na mangusung undungundung i.

10:18 Dung i borhat ma partonggol ni parsaroan Ruben rap dohot parduaannasida, jala ihutan ni parduaanna i, i ma si Elizur, anak ni si Sedeur.

10:19 Jala ihutan ni parduaan ni marga ni halak Simeon, i ma Selumiel, anak ni si Zurisadai.

10:20 Jala ihutan ni parduaan ni marga ni halak Gad, i ma si Eliasap, anak ni si Deuel.

10:21 Dung i borhat ma huhut halak Kohat i, angka na mangusung habadiaon i, asa sanga parjolo i pajongjongkon undungundung i, paima ro nasida.

10:22 Dung i borhat ma partonggol ni parsaroan ni halak Epraim, rap dohot parduaannasida i jala ihutan ni parduaannasida i, i ma si Elisama, anak ni si Amihud.

10:23 Jala ihutan ni parduaan ni marga ni halak Manasse, i ma si Gamaliel, anak ni si Pedazur.

10:24 Jala ihutan ni parduaan ni marga ni halak Benjamin, i ma si Abidan, anak ni si Gidion i.

10:25 Dung i borhat ma partonggol ni parsaroan ni halak Dan, rap dohot parduaannasida i, i ma panimpuli di sandok parsaroan, jala ihutan ni parduaanna i, i ma si Ahieser, anak ni si Amisaddai.

10:26 Jala ihutan ni parduaan ni marga ni halak Aser, i ma si Pagiel, anak ni si Okran.

10:27 Jala ihutan ni parduaan ni marga ni halak Naptali, i ma si Ahira, anak ni si Enan.

10:28 I ma parture ni haborhatan ni halak Israel rap dohot parduaannasida i, sai songon i do nasida borhat.

10:29 Dung i ro ma hata ni si Musa tu si Hobab, anak ni si Reguel, halak Midian, simatua doli ni si Musa: Na tole ma hami borhat tu inganan naung pinorbagabaga ni Jahowa hian: Ahu mangalehonsa tu hamu ninna; antong rap ma hita mardalan, marjambar na denggan pe ho bahenonnami, ai nunga diparbaga Jahowa na denggan tu Israel.

10:30 Alai ninna ibana ma mangalusi: Ndang olo ahu mardalan rap dohot hamu, naeng mulak ma ahu tu luathu dohot tu hahaanggingku.

10:31 Alai ninna si Musa ma: Ua unang tadingkon hami, ai tangkas do diboto ho manang ingkon didia parsaroan na denggan di halongonan i, ingkon ho nian hira gabe matanami.

10:32 Molo tung mardalan ho rap dohot hami, jala ro na denggan i, na naeng bahenon ni Jahowa tu hami, ingkon bahenonnami huhut na denggan i tu ho.

10:33 Jadi borhat ma nasida sian dolok ni Jahowa tolu ari mardalan daona, jala poti parpadanan ni Jahowa mardalan di jolonasida, tolu ari mardalan daona, mangalului pangulonan di nasida.

10:34 Jala ombun ni Jahowa di atasnasida arian, molo borhat nasida sian parsaroan.

10:35 Ia naeng borhat poti i, ninna si Musa ma martangiang: Hehe ma Ho, ale Jahowa, asa tung marserak angka musum jala maporus angka na mangkagigihon Ho maradophon Bohim.

10:36 Jala ia jumpa mangulon poti i, ninna ma martangiang: Sai mulak ma Ho, ale Jahowa tu halak Israel na marriburibu loksa toropna!

4 Musa 11

11:1 Dung i ndang piga dan manggogo ma bangso i marmungutmungut, pola sahat tu pinggol ni Jahowa. Jadi dung dibege Jahowa songon i marsigorgor ma rimasna, pola galak di tongatonganasida api sian Jahowa mansudahon partalpahan ni parsaroan i.

11:2 Dung i mangangguhi ma bangso i tu si Musa, jadi martangiang ma si Musa tu Jahowa, gabe mintop ma api i.

11:3 Jadi dibahen ma goar ni inganan i Tabera, ala naung marsigorgor api ni Jahowa di tongatonganasida.

11:4 Tole ma muse manombo hisaphisap ni halak gambalgambal na di tongatonganasida dohot do halak Israel mangulahi tumatangis, angka ninna ma: Ise ulaning mangalehon juhut panganonnami?

11:5 Sai dipaingotingot rohanami do dengke, angka na hupangan hami di Misir so pola marpanuhor, tole angka ansimun, jelok, ingkau rata, baoang na rara dohot baoang hian.

11:6 Alai anggo nuaeng tung dipahiang do ateatenami, ndang adong agia aha diida matanami, nda holan Manna i.

11:7 Alai anggo Manna i songon boni katumbar balgana jala songon pultak ni haminjon do rupana.

11:8 Dung i mulakulak ma bangso i mardalan papungupunguhon Manna i, laos diduda ma i jala ditutu jala dilompa di bagasan hudon manang mambahen sagusagu sian i, jala daina songon dai ni sagusagu na ginoreng dohot miak.

11:9 Molo madabu nambur i bornginna i tu parsaroan i, madabu ma dohot Manna i tu atasna.

11:10 Jadi dung dibege si Musa bangso i tumatangis be marompuompu, ganup di pintu ni undungundungna, gabe marpiarpiar situtu ma rimas ni Jahowa; sogo dohot roha ni si Musa marnidasa.

11:11 Dung i ninna si Musa ma tu Jahowa: Boasa tung songon i toruanmu naposomon? Jala boasa tung so jumpangan asi ni roha ahu di adopanmu, umbahen tung ampehononmu tu ahu siusungon ni sandok bangso on?

11:12 Hea ahu hian marhangoluan sandok bangso on, manang tung ahu manubuhon nasida, umbahen dohononmu tu ahu: Ingkon ho mangabing nasida di bagasan ampuanmu, songon pangusung ni ama pangintubu di posoposona sahat tu tano naung niuarihonmu tu ompunasida i.

11:13 Tung sian dia ma dapot ahu juhut laho mangalehon tu sandok bangso on? Ai tumatangis nasida di adopanku, huhut mandok: Lehon tu hami juhut panganonnami!

11:14 Ndang tarusung sasada ahu be sandok bangso on, madokdokhu do i di ahu.

11:15 Molo tung songon i bahenonmu tu ahu, tagonan nama ahu bunu, molo tung maruli asi ni roha ahu di adopanmu, asa unang be hupaidaida soro ni aringkon.

11:16 Dung i ro ma hata ni Jahowa tu si Musa songon on: Papungu ma tu Ahu pitupulu halak sian sintua ni halak Israel, angka na tangkas tinandam nasida hian sintua ni bangso i dohot panuturina, dung i arahon ma nasida tu undungundung parluhutan i, asa jongjong nasida disi rap dohot ho.

11:17 Dung i tuat ma Ahu laos mangkatai dohot ho disi; dung i buatonku ma sian Tondi na songgop tu ho, jala ampehononku tu nasida, asa nasida donganmu mangusung sianjuon di bangso i, asa unang be sasada ho mangusungsa.

11:18 Dung i dohononmu ma tu bangso i: Manguras ma hamu tu marsogot, asa panganonmuna juhut, ai nunga pola sahat partangisonmuna i tu pinggol ni Jahowa, uju na nidokmuna i: Ise ulaning mangalehon juhut panganonnami? Ai marsonangsonang do hami di Misir? Dibahen i lehonon ni Jahowa ma tu hamu juhut, asa panganonmuna.

11:19 Ndada holan sadari panganonmuna, manang dua ari, jala ndada holan lima ari, manang sampulu ari, manang duapulu ari pe lelengna.

11:20 Ingkon pola boho sabulan lelengna, asa maradu ruar musengani sian igungmuna, jala maradu gialan hamu disi, ala naung marlea dibahen hamu Jahowa, na di tongatongamuna i, pola nunga tumatangis hamu di adopanna huhut mandok: Boasa tung ruar hita sian Misir?

11:21 Dung i ninna si Musa ma: Pola onom ratus ribu halak parhantarhantar torop ni bangso na pinasahatmu tu ahu, hape lam nimmu do: Lehononku ma juhut tu nasida, asa singkop panganonnasida boho sabulan lelengna.

11:22 Ingkon potongon huroha angka birubiru dohot lombu, asa singkop di nasida? Manang tung ingkon papungupunguon luhut dengke sian laut, asa singkop di nasida?

11:23 Alai ro ma hata ni Jahowa tu si Musa: Na hurang gogo do huroha tangan ni Jahowa? Alai tahe ingkon idaonmu nuaeng manang na sintong hatangku tu ho manang ndang.

11:24 Dung i ruar ma si Musa, laos dipatolhas ma tu bangso i angka hata ni Jahowa, jala dipapungu pitupulu halak sian angka sintua ni bangso i jala dipajongjong nasida humaliang undungundung i.

11:25 Dung i tuat ma Jahowa di bagasan ombun i laos mangkatai dohot ibana, jala dibuat sian Tondi na songgop tu ibana, jala dilehon tu na pitupulu halak sintua i; jadi dung mangulon Tondi i di atasnasida manurirangi ma nasida, alai dungkon ni ndang be di didatdati.

11:26 Alai tinggal dope dua halak di parsaroan, goar ni na sada si Eldad, jala goar ni na sadanari si Medad, mangulon huhut Tondi i di atasnasida, ai dohot do nasida masuk tu angka na tarsurat i, alai dung ruar nasida tu undungundung i, gabe manurirangi nasida di bagasan parsaroan i.

11:27 Dung i marlojong ma sada dolidoli paboahon barita i tu si Musa: Si Eldad dohot si Medad manurirangi di bagasan parsaroan.

11:28 Dung i ro ma alus ni si Josua, anak ni si Nun, parhalado ni si Musa olat i haposoonna, ninna ma: Ale tuanku Musa, orai ma nasida!

11:29 Alai ninna si Musa ma mandok ibana: Tung tama ma ho mangiburu mandingkani ahu? Anggiat nian dipangido rohangku sandok bangso ni Jahowa manurirangi, jala dibasabasahon Jahowa Tondina songgop tu atasnasida.

11:30 Dung i marpungu ma muse si Musa tu parsaroan i, ibana tahe rap dohot angka sintua ni Israel.

11:31 Dung i borhat ma sada alogo sian Jahowa na mamboan angka lote sian laut, jala dipandabuhon tu parsaroan i, hira sadari mardalan daona tu sadaon jala sadari mardalan daona muse tu sadaan, humaliang parsaroan i, arga dua asta timbona sian tano i.

11:32 Jadi hehe ma bangso i papungupunguhon angka lote i manipat sadarina i manipat borngin pe dohot manipat sadari marsogot; jala manang ise na papunguhon na ummotik, sampulu homer pinapunguna, laos dijomur nasida do i humaliang parsaroan i.

11:33 Hape uju dihilhil nasida dope juhut i, tagan so suda dope disohali, nunga marpiarpiar muruk ni Jahowa mida bangso i, rahat situtu do pamunu ni Jahowa di nasida.

11:34 Dung i dibahen nasida ma goar ni pangulonan i angka tanoman ni hahisapon, ala disi tartanom bangso na hisapan i.

11:35 Dung i borhat ma bangso i sian angka tanoman ni hahisapon tu Hazerot, laos tinggal di Hazerot i nasida.

4 Musa 12

12:1 Dung i marmungutmungut ma si Miryam dohot si Aron dompak si Musa, ala jolmana boru Kus i, na binuatna i; ai boru Kus i do na binuatna i bahen jolmana.

12:2 Jadi ninna nasida ma: Tung holan marhite sian si Musa do huroha Jahowa mandok hatana? Nda dohot do marhite sian hami Ibana mandok hatana? Jadi dibege Jahowa ma hata i.

12:3 Alai jolma na mardangol situtu do si Musa, gabe lumambok ibana sian saluhut jolma na di atas tano on.

12:4 Dung i tompu ma ro hata ni Jahowa tu si Musa dohot tu si Aron dohot tu si Miryam: Ruar ma anggo hamu na tolu mandapothon tu undungundung parluhutan i! Jadi ruar ma nasida tolunsa.

12:5 Dung i tuat ma Jahowa di bagasan ombun na marsijongjong, laos jongjong di pintu ni undungundung i jala dijou ma si Aron dohot si Miryam, gabe ruar ma nasida na dua.

12:6 Dung i ninna Jahowa ma: Tangihon hamu ma angka hatangkon: Tung sura adong manang ise sian hamu panurirang ni Jahowa, Ahu papatarhon diringku tu ibana marhite sian pangungkapon, manang marhite sian nipi Ahu mandok hata tu ibana.

12:7 Alai ndang songon i anggo naposongku si Musa, tung di sandok bagashu do ibana haposan.

12:8 Tung pamangan tu pamangan do Ahu mangkatai dohot ibana, tung adop bohi be do, ndada marhite sian hata hulingkulingan, tung rupa ni Jahowa sandiri do na niidana. Boasa tung so dihabiari rohamuna mandok hata ungutungut dompak naposongku si Musa?

12:9 Dung i marsigorgor ma rimas ni Jahowa mida nasida, laos laho marhalindo.

12:10 Ombuni pe manginsurut do sian atas undungundung i, jala ida ma, nunga puruon si Miryam mamontar songon itak; humusor ma dohot si Aron mandompakkon si Miryam, jala ida ma, nunga puruon ibana.

12:11 Dung i ninna si Aron ma tu si Musa: Iale tuanku, unang nian painonahon tu hami dosa i, ala na tarpaoto hami mambahen dosa sisongon i.

12:12 Unang tung ibana songon silumaksaijur naung satonga suda dagingna di haruruarna sian bortian ni inana!

12:13 Dung i mangangguhi ma si Musa tu Jahowa, ninna ma: O ale Debata, sai pamalum ma nasida!

12:14 Dung i ninna Jahowa ma tu si Musa: Tung sura marsitijur amana i tu bohina, nda ingkon tarurak ibana pitu ari lelengna? Dibahen i ingkon tarhurung ibana pitu ari lelengna di balian ni parsaroan i, dung ipe asa jadi jangkonon ibana muse.

12:15 Jadi tarhurung ma si Miryam pitu ari lelengna di balian ni parsaroan i, sundat dohot situan na torop i borhat, paima dijangkon muse si Miryam.

12:16 Dung i borhat ma bangso i sian Hazerot jala marsaro nasida di halongonan Elaparan.

4 Musa 13

13:1 Dung i ro muse ma hata ni Jahowa tu si Musa songon on:

13:2 Suru ma di ho baoa, angka na mangkahapi tano Kanaan, na naeng basabasahononku tu halak Israel; sian ganup marga marompuompu suruhononmu sahalak, luhutna i ingkon induk do di tongatonganasida.

13:3 Dung i disuru si Musa ma nasida sian halongonan Elaparan, hombar tu hata ni Jahowa, saluhut baoa i induk do di tongatonga ni halak Israel.

13:4 Jala on do goargoarnasida: si Sammua, anak ni si Sakur sian marga Ruben.

13:5 Si Sapat, anak ni si Hori sian marga Simeon.

13:6 Si Kaleb, anak ni si Jepune sian marga Juda.

13:7 Si Igeal, anak ni si Josep sian marga Isasar.

13:8 Si Hosea, anak ni si Nun sian marga Epraim.

13:9 Si Palti, anak ni si Rapu sian marga Benjamin.

13:10 Si Gaddiel, anak ni si Sodi sian marga Zebulon.

13:11 Si Gaddi, anak ni si Susi sian marga Josep, i ma sian marga Manasse.

13:12 Si Ammiel, anak ni si Gemali sian marga Dan.

13:13 Si Setur, anak ni si Mikhael sian marga Aser.

13:14 Si Nakbi, anak ni si Vopsi sian marga Naptali.

13:15 Si Geuel, anak ni si Mahi sian marga Gad.

13:16 I ma goargoar ni baoa, angka na sinuru ni si Musa mangkahapi tano i; alai anggo si Hosea, anak ni si Nun, digoar si Musa do si Josua.

13:17 Jadi di na sinuru ni si Musa nasida laho mangkahapi tano Kanaan i, ninna ma mandok nasida: Ingkon nangkok hamu tu tano na tungkan dangsina, nangkok muse hamu tu dolok.

13:18 Dung i tangkasi hamu ma manang songon dia pangalaho ni tano i ro di bangso na maringan disi, manang na marhuaso manang na gale, manang na otik manang na torop.

13:19 Jala manang songon dia pangalaho ni tano, na niingananna i, manang na denggan manang na roa, jala manang songon dia pangalaho ni huta, angka na niinganannasida i, manang adaran manangkas, manang na gonting angka huta i.

13:20 Nang mansam ni tano i, manang na napu manang na tungil, manang na tubuan hau, manang ndang. Antong pir ma tondimuna, boan hamu huhut sian parbue ni tano i. Alai tongon masa angka ari panapuon di patumonaan ni parbue ni anggur.

13:21 Dung i nangkok ma nasida jala dihahapi tano i olat ni halongonan Sin sahat ro di Rehob, di dalan laho tu Hamat.

13:22 Nangkok nasida huhut tu tano tungkan dangsina, gabe sahat nasida tu Hebron; disi do si Ahiman, si Sesai dohot si Talmai, angka anak ni si Enak, didapot nasida. Alai anggo Hebron pitu taon jumolo dipungka sian Zoan di Misir.

13:23 Dung i sahat nasida muse tu rura Eskol, gabe ditallik nasida disi saraungan parbue ni anggur, pola dipausungkon hallungon ni dua halak marhaluhalu, tole muse angka parbue ni hau dalimo dohot hau ara.

13:24 Laos targoar inganan i rura Eskol, ala parbue ni anggur saraungan, na tinallik ni halak Israel disi.

13:25 Jadi dung salpu opatpulu ari, mulak ma nasida sian na mangkahapi tano i.

13:26 Jadi mardalan ma nasida mandapothon si Musa dohot si Aron ro di sandok luhutan ni halak Israel tu halongonan Elaparan, tu Kades, jala mamboan barita tu nasida dohot tu sandok luhutan i, huhut patuduhon tu nasida parbue ni tano i.

13:27 Dung i dipajojor nasida ma tu si Musa, angka ninna ma: Nunga sahat hami tu tano, sihahapannami sinurumi, tano habaoran ni susu dohot situak ni loba tutu, jala on do parbuena.

13:28 Alai tung na marhuaso situtu do anggo bangso na maringan di tano i, angka hutana pe na gonting situtu do jala na bolon, tole huhut angka anak ni si Enak huida hami disi.

13:29 Halak Amalek maringan di tano tungkan dangsina, jala halak Het, Jebusi dohot Amori maringan di dolok, jala halak Kanaan maringan di topi laut dohot mardonokkon Jordan.

13:30 Alai anggo si Kaleb nian paposhon roha ni bangso i di adopan ni si Musa, ninna ma: Denggan hita nangkok manoluk tano i, ai tarpapatu hita do i.

13:31 Alai ro ma hala ni baoa angka na nangkok rap dohot ibana mandok: Ndang tarbahen hita nangkok mandopang bangso i, ai gumogo do i sian hita.

13:32 Dung i dipararat nasida ma barita na roa taringot tu tano na hinahapannasida i, ninna do mandok halak Israel i: Tano na hubolus hami laho mangkahapi nian, tano na rahat do i manganhon pangisina, jala sandok bangso na huida hami disi, angka baoa na ganjang situtu do.

13:33 Huida hami huhut disi halak ulubalang na bolon situtu, angka anak ni si Enak, pinompar ni ulubalang, hira sihapor do anggo hami di rohanami, laos songon i nang di rohanasida.

4 Musa 14

14:1 Dung i sandok luhutan i pangiar soarana be mangangguhi jala tumatangis bangso i manipat sabornginna i.

14:2 Dung i marmungutmungut ma sude halak Israel dompak si Musa dohot dompak si Aron, jala sandok luhutan i mandok hatana be tu nasida: Tung so mate hami nian uju di tano Misir dope hami, manang mate dope hami nian di halongonan on!

14:3 Boasa tung togihonon ni Jahowa hami tu tano on, asa marragean hami bahenon ni podang, jala jolmanami dohot ianakhonnami ripe tabanon? Nda tagonan nian hami mulak tu Misir?

14:4 Dung i masipandohan ma ganup tu donganna: Itapampe ma sahalak bahen ihutan, asa mulak hita tu Misir!

14:5 Dung i manungkap ma si Musa dohot si Aron tu tano di adopan ni sandok parluhutan ni halak Israel.

14:6 Alai anggo si Josua, anak ni si Nun dohot si Kaleb, anak ni si Jepune, angka na dohot mangkahapi tano i, manansani ulosnasida be.

14:7 Ninna huhut mandok sandok luhutan ni halak Israel: Ia tano naung huliati hami laho mangkahapi, tano na denggan sahali do i.

14:8 Molo lomo roha ni Jahowa mida hita, sai na tolhas do hita togihononna tu tano i, jala basabasahononna do i tu hita, tano habaoran ni susu dohot situak ni loba do i.

14:9 Alai na so tupa manggunturi hamu dompak Jahowa, jala ndang jadi hamu tahuton mida bangso isi ni luat i, ai hira sagusagu do nasida sohalanta; nunga sumurut pandingini sian nasida, alai Jahowa do pandingini di hita, unang tahuton hamu mida nasida!

14:10 Jadi sahata ma sandok luhutan i mandok, ingkon mate nasida dangguran dohot batu. Alai tahe marsinondang ma hamuliaon ni Jahowa di bagasan undungundung parluhutan i, sude halak Israel marnidasa.

14:11 Dung i ninna Jahowa ma tu si Musa: Sadia leleng on insahan ni bangso on Ahu? Jala sadia lelengna i ndang olo nasida porsea di Ahu, binahen ni sude tanda angka na hubahen di tongatongana?

14:12 Toruangku nama nasida marhite sian begu antuk jala rendephononku nasida, jala bahenonku ho gabe bangso na balga, jala na gumogo sian nasida.

14:13 Dung i ninna si Musa ma tu Jahowa: Begeon ni halak Misir ma barita i, ai nunga ditogihon Ho bangso on ruar sian tongatonganasida marhitehite hagogoonmu.

14:14 Paboaonnasida huhut hata i tu halak isi ni tano on, angka naung umbegesa tutu Ho, ale Jahowa, di tongatonga ni bangso on, nunga pola adop bohi be Ho, ale Jahowa diida, jala ombunmu marsijongjong di atasnasida, jala Ho mardalan di jolonasida marhite sian ombun na marsijongjong ia arian, jala marhitehite api na marsijongjong ia borngin.

14:15 Tung sura bunuonmu nuaeng bangso on, songon sahalak, jadi dohonon ni bangso parbegu, angka naung umbege baritami ma songon on:

14:16 Ala na so tuk gogo ni Jahowa manogihon bangso on tu bagasan luat, naung niuarihonna tu nasida, umbahen dipotongi nasida di bagasan halongonan.

14:17 Nuaeng pe, sai marmulia ma gogo ni Tuhan i songon naung nidok ni hatam, ai nimmu do:

14:18 Na lambas do roha ni Jahowa jala parasi roha godang, na marpamuati do rohana mida hajahaton dohot pangalaosion, alai ndang loasonna malua sian uhum anggo halak parsala, sai na luluhononna do hajahaton ni amaama tu angka anakna ro di sundut patoluhon dohot paopathon.

14:19 Antong sai marpamuati ma roham mida hajahaton ni bangsom, hombar tu hinagodang ni asi ni roham, ala naung sapala marpamuati roham mida bangsom olat ni Misir dope rasirasa nuaeng.

14:20 Dung i ninna Jahowa ma: Nunga marpamuati rohangku ala pangidoanmu.

14:21 Alai tahe, songon sintongna mangolu Ahu, ingkon gok hamuliaon ni Jahowa sogot liat portibi on.

14:22 Ai saluhut baoa, angka na sanga marnida hamuliaonku dohot tanda angka na hubahen i di Misir dohot di halongonan, hape nunga pola sanga sampulu hali diunjuni nasida Ahu, jala ndang ditangihon nasida soarangku.

14:23 Na so tupa idaonnasida tano naung huuarihon nian tu ompunasida i, sude tahe angka naung manginsahi Ahu, ndang jadi idaonna tano i.

14:24 Alai anggo naposongku si Kaleb, ala tondi na asing diparrohahon ibana jala marsihohot rohana mangihuthon tu Ahu, boanonku ma anggo ibana masuk tu tano na niebatanna i, jala pinomparna manean tano i.

14:25 Alai anggo halak Amalek dohot Kanaan maringan do di rura; dibahen i humusor na hamu marsogot jala borhat hamu mulak tu halongonan di dalan laho tu laut arung.

14:26 Dung i ro muse hata ni Jahowa tu si Musa dohot tu si Aron songon on:

14:27 Sadia leleng on paanjuanjuonku luhutan na jahat on, angka na marmungutmungut dompak Ahu? Nunga tangkas hubege ungutungut ni halak Israel, angka na niungutunguthonnasida dompak Ahu.

14:28 Dibahen i paboa ma tu nasida: Songon sintongna mangolu Ahu, ninna Jahowa, ingkon bahenonku do tu hamu songon naung nidokmuna i binege ni pinggolhon.

14:29 Ingkon di bagasan halongonan on do marragean bangkemuna i, jala saluhut hamu angka na tarbilang marguru tu sandok bilanganmuna i, olat ni na marumur duapulu taon dohot lobi sian i, angka na marmungutmungut dompak Ahu.

14:30 Na so tupa hamu masuk tu tano naung pola husumpahon nian, ingkon bahen ingananmuna nian, dungkon ni si Kaleb, anak ni si Jepune tahe dohot si Josua, anak ni si Nun.

14:31 Alai anggo dakdanakmuna, angka na nidokmuna i ripe tabanon, ingkon nasida do togihononku sahat tusi, asa ditanda nasida tano na tinoishon ni rohamuna i.

14:32 Alai anggo dagingmuna sandiri, ingkon marragean do di halongonan on.

14:33 Jala angka anakmuna ingkon gabe parmahan do di halongonan opatpulu taon lelengna, asa manginona tu nasida parmainanonmuna i, paima sun siap bangkemuna di halongonan.

14:34 Marguru tu bilangan ni na opatpulu ari i hamu mangkahapi tano i, sadari gabe sataon, asa opatpulu taon lelengna manginona tu hamu hajahatonmuna i, asa tung ditanda hamu hansitna, molo Ahu manadingkon hamu.

14:35 Ahu, Jahowa tahe naung mandok i: Ingkon songon i bahenonku tu sandok luhutan na jahat on, angka na marluhut mangalo Ahu; ingkon di bagasan halongonan on nasida sun siap jala marmatean disi.

14:36 Jala baoa angka na sinuru ni si Musa laho mangkahapi tano i, angka na mulak muse mambahen marmungutmungut sandok luhutan i dompak ibana, asa pararat barita na roa taringot tu tano i.

14:37 Jadi marmatean ma tutu baoa angka na pararat barita na roa taringot tu tano i, hona torutoru di adopan ni Jahowa.

14:38 Alai anggo si Josua, anak ni si Nun dohot si Kaleb, anak ni si Jepune mangolu do i tinggal sian baoa, angka na laho mangkahapi tano i.

14:39 Dung i dipatolhas si Musa ma angka hata i tu sandok halak Israel, gabe marsak situtu bangso i.

14:40 Dung i dipasogot nasida ma hehe manogotna i jala nangkok nasida tu punsu ni dolok, ninna ma: Ida ma, dison do hami, naeng nangkok do hami tu inganan naung nidok ni Jahowa hian, ai nunga mardosa hami!

14:41 Alai ninna si Musa ma: Boasa tung songon i pangalaosionmuna di hata ni Jahowa? Ndang tagamon marantu hamu.

14:42 Sai unang ma hamu nangkok, ai ndang di tongatongamuna anggo Jahowa, asa unang tung talu hamu maradophon musumuna i.

14:43 Ai halak Amalek dohot Kanaan do disi di Adopanmuna i, gabe marragean hamu maon bahenon ni podang, ai ala naung ditundali hamu Jahowa, ndang tagamon donganan ni Jahowa hamu.

14:44 Hape dituntun nasida do nangkok tu punsu ni dolok i mangoloi jungkat ni rohana; alai anggo poti parpadanan ni Jahowa dohot si Musa, ndang morot sian tongatonga ni parsaroan i.

14:45 Jadi tuat ma halak Amalek dohot Kanaan, angka na maringan di atas dolok i, laos ditaluhon ma nasida jala dipaundarundar sahat ro di Horma.

4 Musa 15

15:1 Dung i ro muse hata ni Jahowa tu si Musa songon on:

15:2 Patolhas ma tu halak Israel hatangkon: Ia dung sahat hamu tu tano siingananmuna i, na naeng basabasahononku tu hamu.

15:3 Tung sura naeng hobasonmuna sada pelean api di Jahowa: Pelean situtungon manang pelean sipotongon, asa marbagabaga hasurungan, manang pelean sian lomo ni roha, manang di ari rayamuna laho mambahen tu Jahowa sada uap na hushus sian lombu manang sian birubiru.

15:4 Manang ise na naeng mamelehon peleanna tu Jahowa, ingkon boanonna do saparpuluan itak na lamot na nidogil dohot saparopat Hin miak bahen pelean sipanganon.

15:5 Ingkon boanonmu huhut anggur bahen pelean siinumon saparopat Hin dongan ni pelean situtungon manang pelean sipotongon, dongan ni ganup anak ni birubiru tahe.

15:6 Alai anggo dongan ni sada birubiru tunggal, ingkon hobasonmu do dua parpuluan itak na lamot na nidogil dohot miak sapartolu Hin bahen pelean sipanganon.

15:7 Ingkon boanonmu huhut anggur bahen pelean siinumon sapartolu Hin, ingkon pelehononmu do i tu Jahowa bahen uap na hushus.

15:8 Tung sura naeng pelehononmu sada anak ni lombu bahen pelean situtungon manang pelean sipotongon, marbagabaga hasurungan manang bahen pelean hamauliateon tu Jahowa.

15:9 Ingkon boanonmu huhut dongan ni anak ni lombu i tolu parpuluan itak na lamot na nidogil dohot miak satonga Hin bahen pelean sipanganon.

15:10 Ingkon boanonmu huhut anggur bahen pelean siinumon satonga Hin, i ma sada pelean api bahen uap na hushus di Jahowa.

15:11 Ingkon songon i bahenon ni halak di ganup lombu manang di ganup birubiru tunggal manang di ganup birubiru boruboru manang di hambing pe.

15:12 Marguru tu bilangan ni pelean na pinelehonmuna i, ingkon songon i bahenonmuna di ganup pelean mangihuthon bilanganna.

15:13 Nasa halak isi ni tano i hian, ingkon songon i bahenonna laho mamelehon sada pelean api bahen uap na hushus di Jahowa.

15:14 Jala tung sura maisolat sahalak dagang di lambungmuna manang tung maringan ibana di tongatongamuna marsundutsundut, gabe naeng hobasonna sada pelean api bahen uap na hushus di Jahowa, suang songon na binahenmuna i, ingkon songon i bahenonna.

15:15 Ingkon sisada aturan do sandok luhutan i, di hamu dohot di halak na maisolat; aturan na hot salelenglelengna do i di pinomparmuna marsundutsundut, suang songon hamu, ingkon songon i nang halak dagang di adopan ni Jahowa.

15:16 Ingkon sisada patik jala sisada uhum di hamu dohot di halak dagang na maisolat di tongatongamuna i.

15:17 Dung i ro muse hata ni Jahowa tu si Musa songon on:

15:18 Patolhas ma tu halak Israel hatangkon: Ia dung sahat hamu tu tano, hasahatanmuna muse Ahu manogihon tusi.

15:19 Jala tole hamu manganhon sian sagusagu gogo ni tano i, ingkon pelehononmuna sada pelean tatingan tu Jahowa.

15:20 Bahen patumonaan ni itak na niudi, ingkon pelehononmuna do sada sagusagu bahen pelean tatingan; suang songon pelean tatingan sian pardegean, ingkon songon i do i tatingonmuna.

15:21 Ingkon lehononmuna do tu Jahowa sian patumonaan ni itakmuna na niudi bahen pelean tatingan di pinomparmuna marsundutsundut.

15:22 Jala tung sura lilu hamu gabe ndang diulahon hamu luhut tona on, angka na pinaboa ni Jahowa tu si Musa.

15:23 Tung luhut do naung tinonahon ni Jahowa tu hamu marhite sian si Musa, olat ni ari dung dipungka Jahowa martona dohot tu joloan on di pinomparmuna marsundutsundut.

15:24 Tung sura buni maradophon mata ni luhutan i masa sada haliluan, ingkon hobason ni sandok luhutan i sada anak ni lombu bahen pelean situtungon, gabe uap na hushus di Jahowa, rap dohot peleanna sipanganon dohot peleanna siinumon hombar tu aturan i; tole muse sada hambing tunggal bahen pelean pardosaan.

15:25 Ingkon songon i pardengganan bahenon ni malim tu sandok luhutan ni halak Israel, asa salese dosanasida i, ai sada haliluon do i; ingkon nasida tahe mamboan peleannasida bahen pelean api tu Jahowa huhut bahen peleannasida pardosaan di adopan ni Jahowa, ala haliluonnasida i.

15:26 Jadi salese ma dosa ni sandok luhutan ni halak Israel, nang dosa ni halak dagang na maisolat di tongatongamuna, ai haliluan di sandok bangso i do i.

15:27 Jala tung sura sahalak mambahen dosa ala liluna, ingkon boanonna do sada hambing boruboru na marumur sataon bahen pelean pardosaan.

15:28 Ingkon malim i mambahen pardengganan di halak na lilu, molo mardosa ibana sian liluna di adopan ni Jahowa, ingkon bahenonna do pardenggananna, asa salese dosana i.

15:29 Ingkon sisada patik do di hamu, nang di halak Israel isi ni tano i hian, nang di halak dagang na maisolat di tongatongamuna, molo marsala ibana sian liluna.

15:30 Jala tung sura sahalak mambahen dosa sian jungkatna, nang halak isi ni tano i hian ibana, nang halak dagang. Jahowa do na niinsahanna disi, dibahen i ingkon siaphononhon halak sisongon i sian tongatonga ni bangsona.

15:31 Ala naung marlea binahenna hata ni Jahowa jala na niosena tonana, ingkon siaphononhon jolma sisongon i, ingkon manginona tu ibana do hajahatonna i!

15:32 Jadi uju di halongonan halak Israel i, jumpang nasida ma sada baoa na marsobansoban, tongon di ari Sabbat.

15:33 Jadi halak na marnida ibana marsobansoban mamboan ibana tu si Musa dohot tu si Aron dohot tu sandok luhutan i.

15:34 Dung i dihurungkon nasida ma ibana tu bagasan hurungan, ai ndang dope andar diboto nasida uhum sidabuon tu ibana.

15:35 Dung i ro ma hata ni Jahowa tu si Musa: Ingkon marutang hosa do baoa i; ingkon sandok luhutan i mandangguri ibana dohot batu di balian ni parsaroan.

15:36 Jadi sandok luhutan i manogihon ibana ruar tu balian ni parsaroan, laos didangguri nasida ibana mate dohot batu, songon na tinonahon ni Jahowa hian tu si Musa.

15:37 Dung i ro muse hata ni Jahowa tu si Musa songon on:

15:38 Pasahat ma tu halak Israel hatangkon: Ingkon bahenonnasida di nasida angka rambu di ujung ni sampesampenasida marsundutsundut, jala ingkon bahenonnasida tu rambu i sada tali bonang na rata langit.

15:39 Jala on do lapatan ni rambu i, asa paberengberengonmuna do i huhut pasingothon tu hamu saluhut tona ni Jahowa, asa diulahon hamu angka i, asa unang dipaihut hamu elaela ni rohamuna manang matamuna, pola tung marmainan hamu marhite sian i.

15:40 Asa tung diingot jala diulahon hamu saluhut tonangku, gabe angka na badia hamu di Debatamuna i.

15:41 Ahu do Jahowa, Debatamuna i, na manogihon hamu ruar sian tano Misir, asa Ahu gabe Debatamuna; Ahu ma tutu Jahowa, Debatamuna i.

4 Musa 16

16:1 Dung i marbulan ma si Kora, anak ni si Isebar, tubu ni si Kohat, anak ni si Lepi rap dohot si Datan dohot si Abiram, angka anak ni si Eliab dohot si On, anak ni si Pelet, pinompar ni si Ruben tolunsa.

16:2 Hehe ma nasida mambingkasi bada dompak si Musa rap dohot dua ratus limapulu baoa sian halak Israel, angka induk ni luhutan i, angka jolma na tarpis tu parrapotan, pola tarbarita nasida.

16:3 Jadi marluhut ma nasida mangalo si Musa dohot si Aron, angka ninna ma mandok nasida: Malobihu do pambahen ni hamu na dua; ai sandok luhutan i, angka na badia do luhutna, jala di tongatonganasida do Jahowa; boasa tung patimbotimboonmuna dirimuna gumomgom huria ni Jahowa?

16:4 Jadi dung dibege si Musa hata i, manungkap ma ibana tu tano.

16:5 Laos ninna ma tu si Kora dohot tu sude donganna saparbulanan: Marsogot ma pabotohonon ni Jahowa manang ise jujungan pinabangkitna, jala na badia, asa jadi jumonok tu Ibana; jala manang ise na pinillit ni Jahowa, i ma na jadi jumonok tu Ibana.

16:6 On ma bahen hamu, si Kora dohot sude donganna saparbulanan tahe: Buat hamu ma di hamu angka saoan panutungan daupa.

16:7 Dung i bahen hamu ma api tu bagasan, jala ampehon hamu tu atasna daupa di adopan ni Jahowa marsogot songon on; jadi manang ise na pinillit ni Jahowa, i ma na badia; pambahenmu do tahe na malobihu, hamu pinompar ni si Lepi!

16:8 Dung i ro ma hata ni si Musa tu si Kora: Ua tangihon ma hatangkon, hamu pinompar ni si Lepi!

16:9 Maotikku dope huroha di rohamu, naung pinapulik ni Debata ni Israel hamu sian luhutan Israel, asa hamu nian jumonok tu Ibana, mangaradoti ulaon di inganan ni Jahowa jala jongjong di adopan ni luhutan, marhalado di nasida?

16:10 Nunga tutu ho diloas jumonok rap dohot sude hahaanggim, i ma halak Lepi donganmu, hape lam naeng lahanganmuna huhut hamalimon.

16:11 Tongon tahe, ho dohot sandok donganmu saparbulanan, nunga marsatahi tahe hamu mangalo Jahowa; ai ise nian anggo si Aron, umbahen marmungutmungut hamu dompak ibana?

16:12 Dung i disuru si Musa ma suruanna manjou si Datan dohot si Abiram, angka anak ni si Eliab; alai ninna nasida ma: Ndang olo hami nangkok tusi!

16:13 Maotikku dope huroha di roham naung tinogihonmu hami ruar sian tano habaoran ni susu dohot situak ni loba, asa mate hami bunuonmu di halongonan? Lam naeng dope huroha pabangkitonmu dirim gabe pangarajai di hami?

16:14 Jagar do hami ditogihon ho tu tano habaoran ni susu dohot situak ni loba, tole dilehon ho tu hami hauma na tangkas di aek dohot porlak anggur bahen partalian! Beha so nda tung dohot mata ni angka baoa on pulsihanmu? Ndang olo hami nangkok tusi!

16:15 Jadi marsigorgor situtu ma rimas ni si Musa, laos ninna ma tu Jahowa: Sai unang ma marpanatap roham tu peleannasida sipanganon! Nanggo sada halode, ndang dung hubuat sian nasida, jala ndang dung huparoa uhumhu tu manang ise sian nasida.

16:16 Dung i ninna si Musa ma tu si Kora: Anggo marsogot ingkon ro ho rap dohot sandok donganmu saparbulanan tu adopan ni Jahowa, ho, nasida dohot si Aron.

16:17 Dung i ganup hamu, ingkon buatonna be saoanna panutungan daupa jala ampehononna tu atasna daupa, dung i boanonna jumonok ganup saoanna pardaupaan tu adopan ni Jahowa, i ma gabe dua ratus limapulu saoan pardaupaan, ho pe dohot si Aron mamboan be pardaupaanna.

16:18 Jadi ganup mambuat pardaupaanna be jala dibahen api tu bagasanna, diampehon muse daupa tu atasna, jala jongjong nasida di pintu ni undungundung parluhutan i, nang si Musa dohot si Aron.

16:19 Nunga dipaluhut si Kora hian sandok luhutan i tu pintu ni undungundung parluhutan i mangalo nasida. Dung i tarida ma hamuliaon ni Jahowa tu sandok luhutan i.

16:20 Dung i ro ma hata ni Jahowa tu si Musa dohot tu si Aron songon on:

16:21 Paholang hamu ma dirimuna sian tongatonga ni luhutan on, asa suda nasida hurendephon di bagasan satongkin.

16:22 Jadi manungkap be ma si Musa dohot si Aron tu tano huhut mandok: Iale Debata! Ho do Debata ni angka tondi ni nasa sibuk! Ala mardosa sahalak, tung rimasanmu ma sandok luhutan i?

16:23 Dung i ro ma hata ni Jahowa tu si Musa songon on:

16:24 Patolhas ma hatangkon tu luhutan i: Lumindak ma hamu sian humaliang ni undungundung ni si Kora, si Datan dohot si Abiram.

16:25 Dung i hehe ma si Musa mardalan mandapothon si Datan dohot si Abiram, jala angka sintua ni Israel mangihuthon ibana.

16:26 Dung i ro ma hatana tu luhutan i songon on: Ua lumindak ma hamu sian lambung undungundung ni angka baoa na jahat on, jala unang jama hamu agia aha sian ugasannasida i, asa unang dohot hamu direndephon di bagasan sandok dosanasida i!

16:27 Jadi lumindak be ma nasida sian lambung ni undungundung ni si Kora, si Datan dohot si Abiram humaliang. Jadi ruar ma si Datan dohot si Abiram laos jongjong di pintu ni undungundungnasida i rap dohot jolmanasida, angka anaknasida dohot posoposonasida.

16:28 Dung i ninna si Musa ma: Marhite sian on ma tandaonmuna, paboa tutu Jahowa marsuru ahu laho mangulahon sude angka ulaon on, paboa ndang tubutubu ni rohangku sandiri:

16:29 Molo songon hamamate ni halak siap ari hamamate ni halak on. Jala songgop tu nasida hinamago, suang songon tu halak siapari, na so sinuru ni Jahowa ma ahu tutu.

16:30 Alai molo dijadihon Jahowa na so dung dumatangi, tung dipangangang tano i babana jala dibondut nasida ro di sude ugasannasida i, laos songon i mangolu nasida tuat tu parbeguan, jadi botoonmuna ma naung mangaleai Jahowa do angka baoa on.

16:31 Jadi dung sidung angka hata ondeng dihatahon, angka rigat ma tano i di torunasida.

16:32 Pintor dipangangang tano i ma babana jala dibondut nasida, ro di jabunasida dohot sude jolma, angka na paihut roha ni si Kora ro di sude ugasannasida i.

16:33 Jadi songon i mangolu nasida tuat tu parbeguan ro di sude ugasannasida i, laos dihungkupi tano i nasida; jadi mago ma nasida sian tongatonga ni huria i.

16:34 Jadi sandok halak Israel angka na humaliang nasida maporus be umbege angguknasida i, ai ninna nasida do: Atik tung dohot hami maon bonduton ni tano i!

16:35 Ruar huhut api sian Jahowa gabe suda dipangan na dua ratus limapulu baoa i, angka naung mamelehon daupa.

4 Musa 17

17:1 Dung i ro muse hata ni Jahowa tu si Musa songon on:

17:2 Dokkon ma si Eleasar, anak ni malim Aron, asa dipapungupungu angka pardaupaan i sian holangholang ni turanggong i, jala ditirihon api i, ai na badia do angka ulaula i.

17:3 Ia angka pardaupaan ni halak na mardosa on, pola manginona tu hosanasida i, ingkon topaon ni halak do i gabe pamaluti lampishononhon tu langgatan; ai nunga pola angka i diboan tu adopan ni Jahowa, dibahen i nunga gabe badia, ingkon gabe tanda huhut di halak Israel.

17:4 Jadi dibuat malim Eleasar ma angka pardaupaan tombaga, angka naung binoan ni halak naung pinangan ni api, laos ditopa ma i bahen pamaluti ni langgatan.

17:5 Bahen parningotan di halak Israel, asa unang be hum jolma sileban, na so sian pinompar ni si Aron jumonok naeng manutung daupa di adopan ni Jahowa, jala asa unang marjea ibana songon si Kora dohot donganna saparbulanan, songon naung nilumbahon ni Jahowa hian tu ibana marhite sian si Musa.

17:6 Tole marsogotna i marmungutmungut muse ma sandok luhutan ni halak Israel dompak si Musa dohot si Aron ninna ma: Hamu do naung mambunu bangso ni Jahowa.

17:7 Jadi dung marluhut huria i tu lambung ni si Musa dohot si Aron humusor ma nasida dompak undungundung parluhutan i, jadi ida ma, nunga dihungkupi ombun i undungundung i, jala tarida hamuliaon ni Jahowa.

17:8 Jadi ro ma si Musa dohot si Aron tu adopan ni undungundung parluhutan i.

17:9 Jadi ro ma hata ni Jahowa tu si Musa songon on:

17:10 Lumindak ma hamu sian tongatonga ni huriaon, asa suda nasida hurendephon di bagasan satongkin! Jadi manungkap ma nasida na dua tu tano.

17:11 Dung i didok si Musa ma tu si Aron: Buat ma pardaupaan i jala bahen tu bagasan ni i api sian atas langgatan, jala ampehon tusi daupa, haru silu ma ho laho mandapothon huria i mambahen pardenggananna, ai nunga pola ruar rimas na marpiarpiar sian adopan ni Jahowa, nunga pola mamungka rahat begu masa i.

17:12 Dung i dibuat si Aron ma pardaupaan i, songon na nidokkon ni si Musa i, laos marlojong ma ibana tu tongatonga ni huria i, hape ida ma, nunga pola mamungka rahat begu masa i di tongatonga ni bangso i, gabe ditutung ma daupa i, asa mambahen pardengganan tu bangso i.

17:13 Jadi jongjong ma ibana di holangholang ni halak naung mate dohot na mangolu, gabe mansohot ma begu masa i.

17:14 Alai anggo halak naung mate binahen ni begu masa i sampulu opat ribu pitu ratus halak toropna, so padohot angka na mate paihuthon tahi ni si Kora.

17:15 Dung i mulak ma si Aron tu si Musa tu pintu ni undungundung parluhutan i, laos mansohot ma anggo begu masa i.

17:16 Dung i ro muse ma hata ni Jahowa tu si Musa songon on:

17:17 Patolhas ma hatangkon tu halak Israel jala buat sian nasida sada tungkot sian ganup marga, sian angka induknasida marompuompu, gabe sampulu dua tungkot, jala ingkon surathononmu goar ni ganup tu tungkotna be.

17:18 Alai anggo goar ni si Aron ingkon surathononmu tu tungkot ni si Lepi, ai di ganup induk marompuompu sada be tungkot i.

17:19 Ingkon peakkononmu do angka i tu bagasan undungundung parluhutan i di adopan ni poti panindangion i, tusi Ahu somal manopot hamu.

17:20 Jadi manang ise jolma na hupilliti, tungkotna i ma marbunga, asa tung hupasohot parungutunguton ni halak Israel ala Ahu, na marmungutmungut i nasida dompak hamu.

17:21 Jadi dipatolhas si Musa ma hata i tu halak Israel, gabe sude induknasida i mangalehon tungkotna be tu ibana ganup induk marompuompu sada be tungkot i, gabe sampulu dua tungkot, tungkot ni si Aron di tongatonga ni tungkotnasida i.

17:22 Dung i dipeakkon si Musa ma angka tungkot i di adopan ni Jahowa di bagasan undungundung panindangion i.

17:23 Tole manogotna i, di na masuk si Musa tu bagasan undungundung panindangion i, ida ma, nunga marbunga tungkot ni si Aron na di marga Lepi, nunga tutu martumbur jala marbunga na mangerbang jala marparbue na matoras.

17:24 Dung i diboan si Musa ma sude tungkot i ruar sian adopan ni Jahowa tu adopan ni sude halak Israel, asa diida nasida, laos dibuat nasida ma ganup tungkotna be.

17:25 Dung i ro ma hata ni Jahowa tu si Musa: Boan ma mulak anggo tungkot ni si Aron tu adopan ni poti panindangion i, asa dipajop disi bahen tanda di angka anak na somal manggunturi, asa tung marhaujungan ungutungutnasida i ala Ahu, asa unang mate nasida.

17:26 Dung i dibahen si Musa ma songon i, songon na tinonahon ni Jahowa tu ibana, songon i ma dibahen.

17:27 Dung i ro ma hata ni halak Israel tu si Musa songon on: Ida ma, na marragean ma hami, na mago ma hami, tung saluhut do hami mago!

17:28 Manang ise na hum jumonok tu undungundung ni Jahowa mate do i, tung ingkon luhut do hami rendep tagonan?

4 Musa 18

18:1 Dung i ro ma hata ni Jahowa tu si Aron: Ia ho dohot angka anakmu ro di pinompar ni amangmu rap dohot ho, ingkon tu hamu do manginona hajahaton dompak habadiaon, ingkon manginona tu ho dohot tu angka anakmu rap dohot ho hajahaton dompak hamalimonmuna.

18:2 Nang angka hahaanggim sian marga Lepi, marga ni amangmu, ingkon boanonmu do jumonok rap dohot ho, asa nasida mandongani ho dohot marhalado di ho; alai anggo ho dohot angka anakmu rap dohot ho ingkon di adopan ni undungundung panindangion i do.

18:3 Ingkon ringkotannasida do manumpak siradotanmu dohot siradotan di sandok undungundung i; alai ndang jadi jumonok nasida tu ulaula di inganan na badia, manang tu langgatan, asa unang rap mate, nang nasida nang hamu.

18:4 Ingkon mandongani ho do nasida, asa mangaradoti siradotan di undungundung parluhutan i di saluhut ulaon tu undungundung i; alai anggo halak sileban ndang jadi jumonok tu hamu.

18:5 Antong radoti hamu ma siradotan di inganan na badia i dohot siradotan di langgatan, asa unang be mangonai rimas na marpiarpiar tu halak Israel.

18:6 Jala ida ma, nunga Ahu mambuat halak Lepi, hahaanggimuna i sian tongatonga ni halak Israel; silehonlehon tu hamu do umbahen pinasahat nasida tu Jahowa, asa radotanna ulaon di undungundung parluhutan i.

18:7 Alai anggo ho dohot angka anakmu rap dohot ho, ingkon radotanmuna do hamalimonmuna i taringot tu saluhut ulaon di langgatan i dohot di bagasan, sahat tu rimberimbe i; ingkon radotanmuna do tohonan i, ai silehonlehon na hulehon do tu hamu tohonan hamalimonmuna i; alai manang ise halak sileban na ro jumonok, ingkon marutang hosa do.

18:8 Dung i ro muse hata ni Jahowa tu si Aron: Ianggo Ahu, ida ma, nunga hulehon tu ho angka pelean tatingan na tu Ahu hian siradotanmu; saluhut tahe na pinarbadiaan ni halak Israel, nunga hulehon bahen parjambaran tu ho dohot tu angka anakmu, gabe patik na hot ro di salelenglelengna.

18:9 On do tahe jambarmu sian na badia sahali, sian pelean api: Saluhut peleannasida, i ma saluhut peleannasida sipanganon dohot saluhut peleannasida pardosaan dohot saluhut peleannasida parsalaan, angka na binoannasida tu Ahu, i ma gabe na badia sahali di ho dohot di angka anakmu.

18:10 Ingkon di bagasan inganan na badia sahali do i panganonmuna; nasa baoa tahe, jadi do manganhon sian i, ingkon badia do i di ho!

18:11 Ingkon jambarmu huhut pelean tatingan silehonlehonnasida i, ro di saluhut pelean hian sian halak Israel; nunga hulehon angka i tu ho, tu angka anakmu dohot tu angka borum na rap dohot ho bahen patik na hot salelenglelengna; nasa na niuras di bagasan jabum jadi do manganhon sian i.

18:12 Nasa miak dohot anggur na dumenggan i ro di eme, angka patumonaanna i, silehononnasida hian tu Jahowa, nunga hulehon tu ho.

18:13 Nasa patumonaan sian gogo ni tanonasida i, siboanonna hian tu Jahowa, ingkon ho do nampunasa; manang ise na niuras di bagasan jabum, jadi do manganhon sian i.

18:14 Nasa naung hona harom di Israel, ingkon ho nampunasa.

18:15 Nasa buhabaju, sian nasa sibuk siboanonna hian tu Jahowa, nang sian jolma manang pinahan, ingkon ho nampunasa; alai tahe ingkon tobusonmu do anggo buhabaju sian jolma, dohot buhabaju sian pinahan na ramun pe ingkon tobusonmu do.

18:16 Anggo taringot tu partobusna, ingkon jolo marumur sabulan, asa jadi tobusonmu, hombar tu pangasammu, arga lima sekkel perak marguru tu sekkel di inganan na badia, i ma duapulu gera.

18:17 Alai anggo anak buhabaju ni lombu, manang birubiru manang hambing ndang jadi tobusonmu, ai angka na badia do i; jala mudarna i ingkon pistikkononmu do tu langgatan, jala tabotabona ingkon tutungonmu do i bahen pelean api, bahen uap na hushus di Jahowa.

18:18 Alai anggo sibukna, ingkon ho nampunasa, suang songon andora pelean tatingan i jala songon hae jolo siamun, ingkon ho nampunasa.

18:19 Saluhut pelean tatingan sian ugasan na badia, angka na tinating ni halak Israel di Jahowa, nunga hulehon tu ho, tu angka anakmu dohot tu angka borum na rap dohot ho bahen uhum na hot salelenglelengna, i ma sada parjanjian sira na hot salelenglelengna di adopan ni Jahowa, di ho dohot di pinomparmu rap dohot ho.

18:20 Dung i ro muse hata ni Jahowa tu si Aron: Ndang jadi maruli partalian ho di tanonasida i, manang margolat ho di tongatonganasida; ai Ahu do partalianmu dohot teanteanonmu di tongatonga ni halak Israel.

18:21 Alai anggo tu halak Lepi, ida ma, nunga hulehon saluhut parpuluan di Israel bahen teanteananna, bahen parjambaran upa ni ulaonnasida, na niulanasida i, tohonan di undungundung parluhutan i.

18:22 Dibahen i ndang jadi be jumonok anggo halak Israel tu undungundung parluhutan i, asa unang dapotan dosa, laos mate nasida.

18:23 Ingkon halak Lepi tahe mangaradoti ulaon tohonan di undungundung parluhutan i, ingkon manginona tu nasida hajahatonnasida i; patik na hot salelenglelengna do i ro di pinomparmuna, ndang jadi maruli partalian nasida di tongatonga ni halak Israel.

18:24 Ai parpuluan ni halak Israel, angka na tinatingnasida i tu Jahowa bahen pelean tatingan, nunga hulehon tu halak Lepi bahen partalianna; ala ni do umbahen naung hudok tu nasida: Ndang jadi maruli partalian nasida di tongatonga ni halak Israel.

18:25 Dung i ro ma hata ni Jahowa tu si Musa songon on:

18:26 Ingkon patolhasonmu do hatangkon tu halak Lepi: Molo dibuat hamu sian halak Israel parpuluan, angka naung hulehon tu hamu sian nasida bahen partalianmuna, ingkon tatingonmuna sian i pelean tatingan tu Jahowa, parpuluan tahe sian parpuluan.

18:27 Jala etongan do tu hamu pelean tatingonmuna i, hira songon eme sian pardegean jala songon anggur na marlobilobi sian pangilangan.

18:28 Ingkon songon i tatingonmuna huhut pelean tatingan tu Jahowa sian nasa parpuluanmuna, angka na binuatmuna sian halak Israel; pelean tatingan sisongon i tu Jahowa, ingkon lehononmuna do tu malim Aron.

18:29 Sian nasa silehonlehon tu hamu, ingkon tatingonmuna do pelean tatingan marragamragam di Jahowa, sian nasa na dumenggan disi, na tau parbadiaanna sian i.

18:30 Ingkon dohononmu ma tu nasida: Molo tatingonmuna na dumenggan i sian i, ingkon etongan do i tu halak Lepi, suang songon parbue na dapot sian pardegean dohot songon parbue na dapot sian pangilangan.

18:31 Jadi do huhut panganonmuna sian i di saluhut inganan, nang hamu, nang pinomparmuna i, ai upamuna do i, parjambaran sian ulaonmuna di bagasan undungundung parluhutan i.

18:32 Jala ndang dapotan dosa hamu marhite sian i, molo tatingonmuna sian i na dumenggan i bahen pelean tatingan, jala ndang jadi ramunanmuna ugasan naung pinarbadiaan ni halak Israel, asa unang mate hamu.

4 Musa 19

19:1 Dung i ro muse hata ni Jahowa tu si Musa dohot tu si Aron songon on:

19:2 On ma aturan ni patik, na tinonahon ni Jahowa, ninna do: Dokkon ma halak Israel asa ditogu nasida tu ho sada lombu boruboru na rara na so marlindang manang martihas, jala na so dung hapampean ni auga.

19:3 Jala pasahat hamu ma i tu malim Eleasar, asa ditogu lombu i tu balian ni parsaroan, laos disi ma diseat di adopanna.

19:4 Dung i ingkon sornophonon ni malim Eleasar ma jarijarina mambuat sian mudarna i, jala pistikkononna sian mudar i dompak undungundung parluhutan i pola pitu hali.

19:5 Dung i suda ma tutungonna lombu i di adopanna ro di bobakna, sibukna, tole mudarna ro di napana, ingkon tutungonna do.

19:6 Dung i ingkon buaton ni malim i ma hau ares dohot sanggul Hissop dohot bonang na rara, laos timpalhononna ma i tu tongatonga ni pamurunan di lombu i.

19:7 Dung i ingkon sunsion ni malim i ma pangkeanna jala didionna dagingna di bagasan aek, dung i jadi ma ibana masuk tu parsaroan, alai ingkon ramun malim i sahat ro di bodari.

19:8 Halak na manutung lombu i pe, ingkon sunsionna pangkeanna dohot aek jala didionna dagingna di bagasan aek, laos ramun ibana sahat ro di bodari.

19:9 Dung i ingkon papunguon ni sada baoa naung niuras sirabun sian lombu i, jala usehononna do i di balian ni parsaroan tu inganan na pansing, asa dipajop disi pangkeon tu luhutan ni halak Israel mambahen aek pangurason; ai pelean pardosaan do i.

19:10 Halak na papunguhon sirabun sian lombu i pe, ingkon sunsionna do pangkeanna jala ramun ibana sahat ro di bodari. I ma gabe aturan na hot salelenglelengna di halak Israel dohot di halak dagang na maisolat di tongatonganasida.

19:11 Manang ise na manjama halak naung mate, manang bangke ni sada jolma, ingkon ramun ibana pitu ari lelengna.

19:12 Ingkon urasonna ma dirina sian dosa marhite sian aek i di ari patoluhon dohot di ari papituhon, asa ias ibana muse; alai molo tung so diuras dirina sian dosa i di ari patoluhon dohot di ari papituhon, ndang tarbahensa ias.

19:13 Manang ise na manjama halak naung mate, manang bangke ni sada jolma, hape ndang olo ibana manguras dirina sian dosa i, inganan ni Jahowa do na niramunanna disi, ingkon siaphononhon jolma sisongon i sian tongatonga ni Israel, ala so pinistikkon tu ibana aek pangurason i, tong do ibana ramun saleleng lohot dope haramunonna di ibana.

19:14 On do huhut patikna: Tung sura mate sada jolma di bagasan sada undungundung, jadi manang ise na masuk tu bagasan undungundung i, jala manang ise na di bagasan undungundung i hian, ingkon ramun ibana pitu ari lelengna.

19:15 Songon i nasa isian na tedek na so marlangkop na nirahutan, ramun do i.

19:16 Jala manang ise na manjama di ladang sada halak na mate, binahen ni podang, manang bangke ni sada jolma manang holiholina manang hinamborna, ingkon ramun ibana pitu ari lelengna.

19:17 Ingkon buaton ni halak do di jolma na ramuni sian sirabun ni pelean pardosaon na tinutung i, jala usehononna tusi aek na mangolu di bagasan sada guriguri.

19:18 Dung i buaton ni sada baoa na ias ma sanggul Hissop jala sornophononna tu bagasan aek i, laos pistihanna ma undungundung i ro di sude ulaula dohot jolma angka na di bagasan; dohot tahe jolma na manjama holiholi ni na mate manang halak na binunu manang halak na mate boti manang hinambor.

19:19 Alai ingkon pistihan ni halak na ias i do halak na ramuni di ari patoluhon dohot di ari papituhon, jala urasanna ibana sian dosana di ari papituhon, sunsionna huhut pangkeanna jala maridi ibana di bagasan aek, gabe ias ibana bodari.

19:20 Alai manang ise baoa na ramun, hape ndang olo ibana manguras dirina sian dosana, ingkon siaphononhon ibana sian tongatonga ni huria i, ai habadiaon ni Jahowa do na niramunanna disi, ala so pinistikkon aek pangurason i tu ibana, laos ramun ma ibana.

19:21 Ingkon i ma gabe aturan na hot salelenglelengna di nasida; jolma na mamistikkon aek pangurason i pe, ingkon sunsionna do pangkeanna; jala manang ise na manjama aek pangurason i, ingkon ramun ibana sahat ro di bodari.

19:22 Jala manang aha pe na jinama ni halak na ramuni, ingkon ramun do i; jala manang ise na manjama halak na ramuni, ingkon ramun ibana sahat ro di bodari.

4 Musa 20

20:1 Dung i sahat ma halak Israel, sandok luhutan i tahe tu halongonan Sin di bulan sipaha sada, laos mangulon ma bangso i di Kades; mate ma disi ia si Miryam, laos tartanom disi.

20:2 Dung i hurangan aek ma na sahuria i, dibahen i marrongoman ma nasida ro manopot si Musa dohot si Aron.

20:3 Dung i dipungka halak situan na torop i ma bada tu si Musa, angka ninna ma: Tung so tos hosanami nahinan rap dohot hahaangginami di adopan ni Jahowa.

20:4 Boasa tung patogitogionmuna huria ni Jahowa tu halongonan on, asa mate marambolongan hami disi rap dohot dorbianami?

20:5 Jala boasa tung togihononmuna hami nangkok sian Misir, mamboan hami tu inganan na roa on, tu tano na so tarula on, so manang adong jumpang hau ara manang hau anggur manang hau dalimo, gari aek inumon ndang adong jumpang?

20:6 Dung i laho ma si Musa dohot si Aron sian adopan ni huria i tu pintu ni undungundung parluhutan i, laos manungkap nasida tu tano. Dung i tarida ma hamuliaon ni Jahowa di nasida.

20:7 Jadi ro ma hata ni Jahowa tu si Musa songon on:

20:8 Buat ma tungkot i jala paluhut ma huria i, ho dohot hahami si Aron, dung i pangkulingi hamu ma dolok batu di adopan ni matanasida i, asa lehononna aek sian ibana; ingkon paruaronmu di nasida aek sian dolok batu i, asa lehononmu minum huria i ro di dorbianasida i.

20:9 Dung i dibuat si Musa ma tungkot i sian adopan ni Jahowa, songon na tinonahonna i tu ibana.

20:10 Dung i dipaluhut si Musa dohot si Aron ma huria i tu jolo ni dolok batu i, jala ninna ma mandok nasida: Ua tangihon ma hatangkon, hamu ale panggunturi! Tagamon do ulaning tarparuar hami sian dolok batu on aek siinumonmuna?

20:11 Dung i dipatoltol si Musa ma tanganna jala dilombuti dolok batu i dohot tungkotna pola dua hali, jadi ruar ma aek mansai godang, gabe minum be huria i ro di dorbianasida.

20:12 Alai ro ma hata ni Jahowa tu si Musa dohot tu si Aron: Ala na so hinaporseaanmuna Ahu, pabadiahon Ahu nian di adopan ni halak Israel, dibahen i ndang be hamu manogihon huriaon sahat tu tano naung hubasabasahon tu nasida nian.

20:13 I ma aek Meriba, ala disi di badai halak Israel Jahowa, jala Ibana pabadiahon dirina di tongatonganasida.

20:14 Dung i disuru si Musa ma angka suruanna sian Kades manopot raja ni halak Edom mandok: Songon on do hata ni anggim halak Israel: Diboto ho do nasa haporsuhon naung huae hami.

20:15 Na tuati ompunami tu tano Misir, jala nania leleng hami maringan di Misir, jala na pinaporsukporsuk ni halak Misir hami dohot ompunami.

20:16 Jadi mangangguhi ma hami tu Jahowa, gabe ditangihon Ibana soaranami jala disuru sada surusuruan, jala ditogihon hami ruar sian Misir, jala ida ma, di Kades do hami nuaeng, i ma sada huta apala di partalpahan ni tanom.

20:17 Ua loas ma hami mamolus sian luatmu! Unang pe hami mardalan sian ladangmu manang sian porlak anggurmu, jala ndang olo hami minum aek sian sumur; dalan na bolon i do tulusonnami, unang pe manimbil tu siamun manang tu hambirang, paima salpu hubolus hami luatmu.

20:18 Alai ninna raja ni Edom i ma tu ibana: Ndang jadi bolusonmu luathu, sai na ruar do ahu mandopang ho marhite sian podang.

20:19 Dung i ro ma hata ni halak Israel tu ibana: Dalan na bolon sambing bolusonnami, tung sura minum hami sian tapianmi, hami nang pinahannami, ingkon gararonnami do i, ndada masisindir hami, asal naeng mamolus mardalan pat.

20:20 Alai ninna ibana ma: Ndang jadi bolusonmu! Laos ruar raja ni halak Edom manjumpangkon nasida manguluhon paranganna mansai godang, angka na tang be marsinjata.

20:21 Asa songon i ma panjua ni halak Edom mangaloas halak Israel mamolus sian luatna, jadi mamedu ma halak Israel pasiding ibana.

20:22 Dung i borhat ma nasida sian Kades, gabe sahat ma sandok huria ni halak Israel tu dolok Hor.

20:23 Dung i ro ma hata ni Jahowa tu si Musa dohot tu si Aron di bona ni dolok Hor, mardonokkon partalpahan ni luat Edom, ninna ma:

20:24 Papunguon ma anggo si Aron tu bangsona, ndang jadi ibana masuk tu tano naung hulehon tu halak Israel, ala na nilaosanmuna hatangku di lambung aek Meriba.

20:25 Arahon ma si Aron dohot si Eleasar, anakna i, jala togihon nasida nangkok tu dolok Hor.

20:26 Dung i tanggali ma sian si Aron pangkeanna, jala solukkon ma i tu si Eleasar, anakna i, ai ingkon disi papunguon anggo si Aron tu bangsona, laos mate.

20:27 Jadi dibahen si Musa ma songon na tinonahon ni Jahowa, nangkok ma nasida tolunsa tu dolok Hor di adopan ni sandok huria i.

20:28 Dung i ditanggal si Musa ma sian si Aron pangkeanna i jala disolukkon ma i tu si Eleasar, anakna i. Dung i laos mate ma disi anggo si Aron di punsu ni dolok i. Alai tuat ma muse anggo si Musa dohot si Eleasar sian dolok i.

20:29 Jadi dung diida sandok huria i naung monding anggo si Aron, gabe ditatangisi sandok pinompar ni Israel ma si Aron, pola tolupulu ari lelengna.

4 Musa 21

21:1 Jadi dung dibege si Arad, raja ni halak Kanaan na maringan di tano tungkan dangsina, naung ro halak Israel sian dalan laho tu Atarim, gabe diporang ibana ma halak Israel, pola diboan deba sian nasida dapot tartangkup.

21:2 Dung i marbagabaga ma halak Israel tu Jahowa, ninna ma: Molo tung pasahatonmu bangso on tu bagasan tanganku, ingkon haromhononku ma angka hutanasida i.

21:3 Jadi ditangihon Jahowa ma soara pangidoan ni Israel, dipasahat ma halak Kanaan tu nasida, gabe diharomhon Israel ma nasida ro di hutanasida i, jala dibahen ma goar ni inganan i Horma.

21:4 Jadi borhat ma nasida sian dolok Hor manulus dalan dompak laut arung, asa mangaliat pasiding luat ni halak Edom gabe murhing ma roha ni bangso i di tongan dalan.

21:5 Dung i marmungutmungut ma bangso i dompak Debata dohot dompak si Musa: Boasa tung togihononmuna hami nangkok sian Misir, asa mate hami di halongonan on huroha? Ai so manang adong sagusagu manang aek dison, jala nunga ginegine ateatenami mida sagusagu na giakgiak on.

21:6 Dung i ditongos Jahowa ma tu tongatonga ni bangso i angka ulok tulung api, angka na mamarguti bangso i, gabe marmatean mansai torop sian Israel.

21:7 Dung i ro be ma bangso i manopot si Musa, angka ninna ma: Nunga mardosa hami, ala na marmungutmungut hami dompak Jahowa dohot dompak ho; martangiang ma ho tu Jahowa, asa dipadao sian hami ulok tulung api i. Jadi martangiang ma si Musa mangondihon bangso i.

21:8 Dung i ro ma hata ni Jahowa: Bahen ma di ho sada ulok tulung api jala sangkothon ma i tu hau partonggol, ia adong manang ise na hona pargut jala dibereng tusi, ingkon mangolu ibana.

21:9 Jadi disuman si Musa ma sada ulok sian tombaga, jala disangkothon ma i tu hau partonggol; jala ia adong manang ise na pinargut ni ulok i jala dibereng dompak ulok tombaga i, laos mangolu ma ibana.

21:10 Dung i borhat ma halak Israel sian i jala marsaro di Obet.

21:11 Dung i borhat muse nasida sian Obet jala marsaro di bona ni dolok Abarim di halongonan, tondong ni Moab, tungkan habinsaran.

21:12 Borhat muse nasida sian i jala marsaro martopihon sunge Zered.

21:13 Borhat muse nasida sian i jala marsaro di bariba i sunge Arnon na mardalan di halongonan, na marharoroan sian partalpahan ni halak Amori; ai Arnon i do parbolatan ni Moab, di holangholang ni Moab dohot Amori.

21:14 Ala ni do umbahen tarsurat di bagasan buku parporangan ni Jahowa: Mardonokkon Waheb di Supa dohot mardonokkon angka sunge ni Arnon.

21:15 Tole muse hapuasan ni angka sunge, angka na mabaor tungkan inganan Ar, jala mandiori di partalpahan ni Moab.

21:16 Borhat muse nasida sian i tu Beer (sumur); i ma sumur i, na nidok ni Jahowa tu Musa: Papungu ma bangso i, asa Ahu mangalehon aek inumon tu nasida.

21:17 Uju i ma diendehon halak Israel hata ni ende on: "Binsat ma ho, ale sumur, marende taripar ma hamu!

21:18 I ma sumur na hinali ni angka induk, na saut nidungkir ni halak na sangap sian bangso i marhite sian tungkot harajaon, marhite sian angka tungkotnasida i tahe." Dung i borhat muse nasida sian halongonan tu Matana.

21:19 Jala sian Matana tu Nahaliel, jala sian Nahaliel tu Bamot.

21:20 Jala sian Bamot tu rura na di ladang ni Moab na patondong dohot punsu ni Pisga, panatapan tungkan halongonan.

21:21 Dung i disuru Israel ma angka suruanna manopot si Sihon, raja ni halak Amori, mandok tu ibana:

21:22 Ua loas ma hami mamolus sian luatmu! Unang pe hami manimbil tu ladang manang tu porlak anggur; jala ndang olo hami minum aek sian sumur; dalan na bolon i do tulusonnami, paima salpu hubolus hami luatmu.

21:23 Alai ndang diloas si Sihon halak Israel i mamolus sian luatna, pola dipaluhut si Sihon sandok bangsona jala ruar mandopang Israel tu halongonan; jadi dung sahat ibana tu Jahas, tole ma ibana marporang dompak Israel.

21:24 Alai ditaluhon Israel do ibana marhite sian baba ni podang, laos disoluk ma luatna olat ni Arnon sahat tu Jabok, sahat tu halak Amon; ai tung na gonting do partalpahan ni halak Amon.

21:25 Dung i dipapatu Israel ma sude angka huta i, laos maringan Israel di saluhut huta ni halak Amori, di Hesbon, dohot di sude sosorna humaliang.

21:26 Ai Hesbon do huta ni si Sihon, raja ni halak Amori, ai nunga jolo diporang ibana raja ni halak Moab, jala dilaum sian ibana sandok tanona sahat ro di Arnon.

21:27 Ala ni do umbahen didok angka parende aling: Beta hita tu Hesbon, asa hona pauli jala pinagonting huta ni si Sihon.

21:28 Ai ruar do api sian Hesbon, nala ni api sian huta ni si Sihon, i ma na mansudahon Ar di Moab, ro di angka tuan nampuna dolokdolok ni Arnon.

21:29 Marjea ma ho, ale Moab! Nunga mago ho, ale bangso na marsomba tu Kamos! Tung dipasahat ibana do anakna angka naung malua nian jala tarboan do angka boruna tu si Sihon, raja ni halak Amori.

21:30 Jala nunga hupatunduk hami nasida, nunga mago Hesbon sahat ro di Dibon; jala nunga hutaban hami nasida sahat ro di Nopal, pola ro di Medeba.

21:31 Jadi maringan ma Israel di tano ni halak Amori.

21:32 Dung i disuru si Musa ma halak laho mangkahapi Jaser, laos dipapatu nasida ma angka sosorna, jala dipabali halak Amori, angka na maringan disi.

21:33 Dung i mamedu ma nasida jala nangkok manulus dalan tu Basan; jadi ruar ma si Og, raja di Basan, manjumpangkon nasida manguluhon sandok bangsona laho marporang di Edrei.

21:34 Dung i ro ma hata ni Jahowa tu si Musa: Unang ho mabiar mida ibana, ai nunga Ahu pasahathon ibana tu bagasan tanganmu ro di bangsona dohot luatna, ingkon bahenonmu tu ibana, suang songon na binahenmi tu si Sihon, raja ni halak Amori na maringan na jolo di Hesbon.

21:35 Jadi dipapatu nasida ma ibana ro di angka anakna dohot sandok bangsona, nanggo sahalak tahe ndang tading di ibana, laos disoluk nasida ma tanona i.

4 Musa 22

22:1 Dung i borhat muse halak Israel jala marsaro di angka adaran ni Moab di bariba ni Jordan, tondong ni Jeriko.

22:2 Jadi dung diida si Balas, anak ni si Zippor, saluhut naung binahen ni Israel tu halak Amori.

22:3 Godoron situtu ma Moab maradophon bangso i, ala bolonna, jala tahuton Moab mida halak Israel i.

22:4 Dung i ro ma hata ni Moab tu angka sintua ni Midian: Suda ma nuaeng dilaton ni bangso on saluhut na humaliang hita, songon pandilati ni jonggi di tumburtumbur di ladang. Alai si Balas, anak ni si Zippor uju i raja di Moab.

22:5 Dung i disuru ibana ma angka suruanna manopot si Bileam, anak ni si Beor, tu Petor na martopihon (Euprat) di bagasan luat ni angka anak ni bangsona, asa dijou nasida ibana, ninna ma: Ida ma, nunga ruar sada bangso sian Misir, ida ma, pola ditutup sandok tano i, nunga pola marsaro nasida patondong dohot ahu.

22:6 Nuaeng pe sai ro ma ho, bura i ma di ahu bangso on, ai gumogo do nasida sian ahu, anggiat tung dapot tartaluhon ahu bangso i, laos onjaronku do i sian luaton, ai nunga tangkas huboto, manang ise na pinasupasum dapotan pasupasu, jala manang ise na binuraanmi hona bura do.

22:7 Jadi mardalan ma angka sintua ni Moab dohot angka sintua ni Midian jala upa pangarundingon di bagasan tangannasida, laos sahat ma nasida tu si Bileam jala dipatolhas tu ibana angka hata ni si Balas.

22:8 Dung i ro ma hatana tu nasida: Marborngin ma hamu dison saborngin on, asa hulehon alus tu hamu, marguru tu hata ni Jahowa tu ahu. Jadi tading ma angka induk ni Moab di lambung ni si Bileam.

22:9 Dung i ro ma Debata manopot si Bileam, ninna ma: Ise do angka baoa on na rap dohot ho?

22:10 Dung i ninna si Bileam ma tu Debata: Si Balas, anak ni si Zippor, raja ni Moab marsuru suruanna manopot ahu.

22:11 Ida ma, nunga ruar sada bangso sian Misir jala ditutup sandok tano i, ninna, nuaeng pe, sai ro ma ho mamburai bangso i di ahu, anggiat tung dapot ahu porangonku ibana, laos onjaronku ibana.

22:12 Alai ninna Debata ma tu si Bileam: Ndang jadi ho mardalan udur dohot nasida, jala ndang jadi buraanmu bangso i, ai na pinasupasu do i.

22:13 Dung i hehe ma si Bileam manogotna i, laos didok ma tu angka induk ni si Balas: Muli ma hamu tu tanomuna, ai manjua do Jahowa mangaloas ahu mardalan udur dohot hamu.

22:14 Dung i borhat ma angka induk ni Moab, jala sahat nasida tu si Balas, angka ninna ma: Manjua do si Bileam mardalan udur dohot hami.

22:15 Dung i diulahi si Balas dope marsuru angka induk tumorop jala marmuliaan sian parjolo i.

22:16 Jadi dung sahat nasida tu si Bileam, ninna nasida ma tu ibana: Songon on do hata ni si Balas, anak ni si Zippor: Sai unang olo ho sundatan mardalan manopot ahu!

22:17 Ai tung na marsangap situtu do ho bahenonku, jala manang aha pe sidohononmu tu ahu, sai bahenonku do i. Antong sai ro ma ho, jala bura i di ahu bangso on!

22:18 Alai ninna si Bileam ma mangalusi angka naposo ni si Balas: Tung sura pe gok jabuna perak dohot sere dilehon si Balas tu ahu, ndang halaosan ahu hata ni Jahowa, Debatangku, mangulahon hata na metmet manang na balga.

22:19 Nuaeng pe na tading ma hamu dison, nang saborngin on, asa huboto, manang dia dope hata ni Jahowa tu ahu.

22:20 Dung i ro ma Debata bornginna i manopot si Bileam jala ninna ma mandok ibana: Ala naung ro angka baoa i manjou ho, antong hehe ma ho mardalan udur dohot nasida, alai holan hata sipaboaonku tu ho do na jadi bahenonmu.

22:21 Tole manogotna i hehe ma si Bileam jala dipalanoi halodena boruboru jala mardalan ibana udur dohot angka induk ni Moab.

22:22 Alai marpiarpiar ma rimas ni Jahowa ala mardalan ibana, jala jongjong suruan ni Jahowa di tongan dalan naeng mangalo ibana. Alai marsihundul di halodena anggo ibana, jala dua halak naposona donganna.

22:23 Dung i diida halode i ma suruan ni Jahowa jongjong di tongan dalan marpodang sintak di bagasan tanganna, jadi manimbil ma halode i sian dalan laho tu ladang; alai sai dilombuti si Bileam ma halode i paulakkon tu dalan nian.

22:24 Dung i jongjong ma suruan ni Jahowa di dalan na sompit di holangholang ni angka porlak anggur, jala parik do angkupangkup be.

22:25 Jadi dung diida halode i suruan ni Jahowa, dihapithon ma ibana tu parik, gabe tardugus pat ni si Bileam tu parik, gabe didatdati ma mangalombuti halodena i.

22:26 Dung i mardalan ma suruan ni Jahowa dumao dope jala jongjong tu inganan na sompit situtu, na so adong dalan parhusoranna tu siamun manang tu hambirang.

22:27 Dung diida halode i suruan ni Jahowa pola somsam di toru ni si Bileam halode i, jadi marpiarpiar ma rimas ni si Bileam, gabe dilombuti halode i dohot tungkotna.

22:28 Dung i dibungka Jahowa ma baba ni halode i, gabe didok ma tu si Bileam: Aha ma na hubahen tu ho, umbahen lombutanmu ahu nunga pola tolu hali?

22:29 Dung i ninna si Bileam ma tu halode i: Ala naung pininggilanmu rohangku, tung sura adong podang di bagasan tanganku, ingkon bunuonku do ho nuaeng.

22:30 Dung i ro ma hata ni halode i mangalusi si Bileam: Nda ahu do nian halodem, naung hinundulanmu olat ni dung ho nampuna ahu rasirasa sadarion? Tung dung ma somal ahu mambahen songon i tu ho? Jadi ninna si Bileam ma: Ndang nian.

22:31 Dung i dipatonggor Jahowa ma mata ni si Bileam, asa diida suruan ni Jahowa jongjong di tongan dalan marpodang sintak di bagasan tanganna; jadi dipaunduk si Bileam ma ibana, laos marsomba manungkap tu tano.

22:32 Dung i ro ma hata ni suruan ni Jahowa mandok tu ibana: Boasa tung lombutanmu halodem, nunga pola tolu hali? Ida ma, Ahu do ruar naeng mangalo ho, ai pate tu hamagoan do dalan i di jolongku.

22:33 Balik do halode i jumolo marnida Ahu, gabe manimbil maradophon Ahu pola tolu hali; tung sura so manimbil halode i maradophon Ahu, sai ho do bunuonku, alai anggo halode i pangoluonku do.

22:34 Dung i ninna si Bileam ma tu suruan ni Jahowa: Nunga mardosa ahu, alai ndada huboto ho jongjong di dalan naeng mangambat ahu. Nuaeng pe molo sogo roham, asa mulak ahu.

22:35 Dung i ninna suruan ni Jahowa ma tu si Bileam: Mardalan ma ho udur dohot angka baoa i; alai ingkon holan hata sipaboaonku tu ho, i do hatahononmu. Jadi mardalan ma si Bileam udur dohot angka induk ni si Balas.

22:36 Jadi dung dibege si Balas naung ro si Bileam, ruar ma ibana manomunomu ibana sahat ro di huta ni Moab na martopihon Arnon, apala di partalpahan ni luatna.

22:37 Dung i ninna si Balas ma tu si Bileam: Nda nunga husuru suruanku manopot ho mangalapi ho nian? Boasa so pintor ro ho tu ahu? Dirimpu roham huroha na so tarpasangap ahu ho, songon patutna?

22:38 Dung i ninna si Bileam ma mangalusi si Balas: Ida ma nunga ro ahu nuaeng manopot ho? Nuaeng pe tung tarbahen ahu ma mandok manang aha? Hata na niampehon ni Debata tahe tu bagasan pamanganku, ingkon i do hatahononku.

22:39 Dung i mardalan ma si Bileam udur dohot si Balas, gabe sahat nasida tu Kiryat-Huzzot.

22:40 Dung i dipelehon si Balas ma angka lombu dohot birubiru, jala ditongoshon jambar todoan tu si Bileam dohot tu induk, angka na rap dohot ibana.

22:41 Tole manogotna i diarahon si Balas ma si Bileam manogihon ibana nangkok tu atas angka tombak ni Baal, asa sian i ditatap sandok bangso i.

4 Musa 23

23:1 Dung i ninna si Bileam ma tu si Balas: Pajongjong ma di ahu dison pitu langgatan, jala padiri di ahu dison pitu lombu dohot pitu birubiru tunggal.

23:2 Jadi dibahen si Balas ma hombar tu hata ni si Bileam; jadi duansa, si Balas dohot si Bileam, mamelehon sada lombu dohot sada birubiru tunggal, di atas ni ganup langgatan.

23:3 Dung i ninna si Bileam ma tu si Balas: Pajonok ma jongjong tu lambung ni pelean situtungonmi, asa laho ahu, anggiat tung ditomutomu Jahowa ahu, manang hata dia pinapatarna tu ahu, i do paboaonku tu ho. Dung i laho ma ibana tu sada robean.

23:4 Dung i pajumpang ma Debata dohot si Bileam, laos didok ma mandok Ibana: Nunga pola hupajongjong pitu langgatan jala hupelehon sada lombu dohot sada birubiru tunggal di ganup langgatan i.

23:5 Dung i diampehon Jahowa ma sada hata tu bagasan pamangan ni si Bileam, huhut didok: Mulak ma ho tu si Balas, jala songon on do dohononmu!

23:6 Jadi dung mulak ibana tu rajai, ida ma, jongjong dope ibana di lambung pelean tinutungna i rap dohot sude induk ni Moab.

23:7 Dung i dipungka si Bileam ma mandok tonggona: Nunga pola disuru si Balas, raja sian Moab suruanna mangalapi ahu sian Ram, sian angka dolok tungkan habinsaran, ninna do: Sai ro ma ho, bura i di ahu Jakkob! Sai ro ma ho mamulasi Israel!

23:8 Beha ma pambahenku mamburai halak na so binuraan ni Debata? Jala beha ma pambahenku mamulasi halak na so pinulasan ni Jahowa?

23:9 Ai sian punsu ni angka dolok batu tartatap ahu ibana, jala sian angka dolokdolok huranapi ibana; ida ma, i ma sada bangso na punjung maringanan, jala ndang masuk bilangan tu tongatonga ni angka bangso parbegu.

23:10 Tung ise ma na tuk mamilangi orbuk ni Jakkob dohot torop ni saparopat sian Israel? Ingkon songon hamamate ni halak na tigor on nian hamamate ni hosangkon, jala ajalhu songon ajalna i!

23:11 Dung i didok si Balas ma tu si Bileam: Aha do na binahenmu tu ahu? Laho mamburai angka musungku do umbahen na husuru mangalapi ho, hape ida ma, sai didatdati ho do mamasumasu nasida.

23:12 Dung i ninna si Bileam ma mangalusi: Nda tama ingkon ingoton ni rohangku hata na niampehon ni Jahowa tu bagasan pamanganku laho mangkatahon?

23:13 Dung i ninna si Balas ma tu ibana: Ua, beta hita tu inganan na asing, asa dapot ho tataponmu nasida sian i; alai asal partalpahanna idaonmu, ndang jadi anggo tung sandok bangsona ranapanmu; sai bura i ma i di ahu sian i!

23:14 Dung i diarahon ma ibana tu ladang ni halak parjaga, tu atas punsu ni Pisga, jala dipajongjong muse pitu langgatan, jala dipelehon sada lombu dohot sada birubiru tunggal di atas ni ganup langgatan i.

23:15 Dung i ninna si Bileam ma tu si Balas: Pajonok ma jongjong tuson tu lambung pelean situtungonmi, laho ma anggo ahu tu adui manomunomu Jahowa.

23:16 Dung i pajumpang ma Jahowa dohot si Bileam, jala diampehon hatana tu bagasan pamanganna, ninna ma: Mulak ma ho tu si Balas, jala ingkon songon on dohononmu.

23:17 Jadi dung mulak ibana mandapothon si Balas, ida ma, laos jongjong dope ibana di lambung pelean tinutungna i rap dohot angka induk ni Moab. Dung i ninna si Balas ma mandok ibana: Aha do hata ni Jahowa tu ho?

23:18 Dung i dipungka ibana ma mandok tonggona, ninna ma: Hehe ma ho, ale Balas, jala tangihon: Patinggil ma pinggolmu tumangihon angka panindangionkon, ho ale anak ni si Zippor!

23:19 Anggo Debata ndada jolma tung olo margabus, ndada Ibana anak ni jolma manisia, tung solsolanna dirina! Tung tagamon ma dohononna hatana, so pasautonna? Manang tung dohononna manang aha so hajongjongkononna?

23:20 Ida ma, nunga didokkon ahu mamasumasu, ai molo Ibana mamasumasu, tung beha ma bahenonku manundati?

23:21 Ndang adong diida Ibana hajahaton di Jakkob jala ndang adong diida hangaluton di Israel. Jahowa Debatana do donganna, jala soara ni sarune mangolophon Rajai di tongatongana.

23:22 Nunga ditogihon Debata nasida ruar sian Misir, jala songon doras ni badak tunggal do ibana mardalan.

23:23 Ai ndada marguna parsibalikmataon anggo mangalo Jakkob, jala ndada marguna pangarundingon mangalo Israel. Jumpang do sogot tingkina, dohonon ma disi tu Jakkob dohot tu Israel: Manang aha naung binahen ni Debata.

23:24 Ida ma, hehe do sogot bangso i songon singa boruboru, jala padirgahonna dirina songon singa jantan. Ndang tagamon olo manggompang, nda jolo manganhon juhut soroan, jala sopsoponna mudar ni angka na binununa.

23:25 Dung i ninna si Balas ma tu si Bileam: Molo tung na so tarbahen ho mamburai nasida, ba unang sai datdati mamasumasu nasida.

23:26 Dung i ninna si Bileam ma mangalusi si Balas: Nda nunga hudok hian tu ho songon on: Manang aha sidohonon ni Jahowa, i do bahenonku?

23:27 Dung i ninna si Balas ma tu si Bileam: Beta hita, asa hutogihon ho tu inganan na asing, anggiat tung lomo roha ni Debata, asa buraanmu nasida di ahu sian i.

23:28 Dung i diarahon si Balas ma muse si Bileam tu punsu ni Peor, panatapan tungkan halongonan.

23:29 Jadi ninna si Bileam ma tu si Balas: Pajongjong ma di ahu dison pitu langgatan, jala padiri di ahu dison pitu lombu dohot pitu birubiru tunggal.

23:30 Jadi dibahen si Balas ma hombar tu hata ni si Bileam, jala dipelehon sada lombu dohot sada birubiru tunggal di atas ni ganup langgatan i.

4 Musa 24

24:1 Jadi dung diida si Bileam lomo roha ni Jahowa ala pinasupasuna Israel, ndang laho ibana songon na dua hali parjolo i mandiori pangarundingon, pintor dituju do bohina dompak halongonan.

24:2 Dung i mangaranapi ma mata ni Bileam, gabe diida ma parpeak ni parsaroan ni Israel marmargamarga; jadi songgop ma Tondi ni Debata tu ibana.

24:3 Dung i dipungka ma muse mandok tonggona: On ma pangungkapon sian si Bileam, anak ni si Beor, pangungkapon tahe sian baoa naung tonggor matana!

24:4 Pangungkapon sian jolma naung somal umbege angka hata ni Debata, naung marnida parmataon sian Nasunhinagogo, jolma naung tungkap jala tarbungka matana.

24:5 Tung na uli sahali do angka undungundungmu, ale Jakkob, angka ingananmu, ale Israel!

24:6 Songon sunge tahe, angka na gistang mardalan, songon angka porlak martopihon sunge, songon hau aloe, angka na sinuan ni Debata, songon hau ares di topi ni aek.

24:7 Sai tong do mabaor aek sian timbatimbana, pinomparna pe marsihohot jongjong di bagasan angka aek magodang, jala tumimbul do rajana sian Agag, jala marmulia situtu harajaonna i sogot.

24:8 Nunga ditogihon Debata ibana ruar sian Misir, jala songon doras ni badak tunggal ibana mardalan. Ingkon suda ma panganonna angka bangso parbegu alona i, jala ropuhanna holiholinasida jala ponggolhononna angka sumbianasida.

24:9 Nunga marsinggang ibana huhut manggompang songon singa jantan, jala songon singa boruboru; tung ise ma na hum manungguli ibana? Dapotan pasupasu ma manang ise na mamasumasu ho, jala hona bura manang ise na mamburai ho.

24:10 Jadi marpiarpiar ma rimas ni si Balas dompak si Bileam, pola ditopaptopap tanganna, jala didok si Balas mandok si Bileam: Laho mamburai angka musungku ho nian umbahen jinou, hape ida ma, sai didatdati ho do mamasumasu nasida, nunga pola tolu hali.

24:11 Nuaeng pe hatop ma ho maporus mulak tu ingananmu hian! Disangkap rohangku do nian naeng marmulia situtu ho bahenonku; alai ida ma, nunga diambat Jahowa hamuliaon sian ho.

24:12 Jadi ninna si Bileam ma tu si Balas: Nda nunga hudok hian nang tu surusuruan, angka na sinurum manopot ahu songon on:

24:13 Tung sura pe gok jabuna perak dohot sere dilehon si Balas tu ahu, ndang halaosan ahu hata ni Jahowa, laho mambahen na denggan manang na roa sian roharohangku sandiri; hata sipaboaon ni Jahowa tu ahu, ingkon i do hatahononku.

24:14 Nuaeng pe, ida ma, na laho ma anggo ahu mulak tu bangsongku, dibahen i loas ma ahu manurirangkon hian tu ho taringot tu sibahenon ni bangso on tu bangsom on di ujung ni angka ari.

24:15 Dung i dipungka ma muse mandok tonggona: On ma pangungkapon sian si Bileam, anak ni si Beor, pangungkapon tahe sian baoa naung tonggor matana!

24:16 Pangungkapon sian jolma naung somal umbege angka hata ni Debata dohot na umboto parbinotoan di Natumimbul, naung marnida parmataon ni Nasunhinagogo, jolma naung tungkap jala tarbungka matana.

24:17 Sai na idaonku do Ibana, alai ndang dope anggo nuaeng; sai na tataponku do Ibana, alai ndang dope anggo tung jonok: Binsar do sogot sada bintang sian Jakkob jala hehe do sada tungkot harajaon sian Israel; papatuonna ma angka luat ni Moab jala patunduhonna sandok pinompar ni si Set.

24:18 Soluhonna ma ia Edom, jala gabe partalian ni musuna anggo Seir, alai lam marhuaso ma anggo Israel.

24:19 Marharoroan sian Jakkob ma Sipangarajai, jala siaphononna pasipasi sian huta i.

24:20 Jadi dung diida ibana halak Amalek, gabe dipungka ma tonggona mandok: Parmulaan ni angka bangso parbegu do nian Amalek, alai ujungna do tu hamagoan!

24:21 Jadi dung diida ibana halak Keni, gabe dipungka ma tonggona mandok: Gonting do nian ingananmu jala dipaojak ho asarmu di atas dolok batu:

24:22 Alai ingkon ro do sogot na mangulang Keni, paima ro muse Assur mamboan ho tu habuangan.

24:23 Dung i dipungka ibana muse tonggona mandok: Ue! Tung ise ma tarbahen mangolu, molo dipamasa Debata sisongon i?

24:24 Alai ro muse angka hopal sian pasir ni halak Kittim, patunduhonna ma Assur dohot Heber muse; alai ibana sandiri pe ingkon tu hamagoan do.

24:25 Dung i borhat ma si Bileam, laos mardalan asa mulak ibana tu ingananna hian: Si Balas pe ditulus do dalanna i.

4 Musa 25

25:1 Dung i maringan ma Israel di Sitim, alai dipungka halak situan na torop i ma marmainan tu boru ni halak Moab.

25:2 Angka na manggokkon bangso i uju mamele nasida tu debatanasida i, laos mangan juhut tibaltibal ma bangso i, huhut marsomba tu debatanasida i.

25:3 Jadi marsigantung ma Israel tu Baal-Peor, gabe marpiarpiar ma rimas ni Jahowa mida Israel.

25:4 Dung i ro ma hata ni Jahowa tu si Musa: Tangkup ma sude induk ni bangso i jala gantungkon nasida bahen pardengganan tu Jahowa di adopan ni mata ni ari, asa anggiat mombun parpiarpiar ni rimas ni Jahowa mida Israel.

25:5 Dung i ninna si Musa ma tu angka panguhum di Israel, ganup ma hamu mambunu halakna, angka na marsigantung tu Baal-Peor.

25:6 Dung i ida ma, ro sahalak sian halak Israel, laos diboan tu angka hahaanggina sada boru Midian di adopan ni si Musa dohot di adopan ni sandok huria ni halak Israel, tongon angka tumatangis nasida di jolo pintu ni undungundung parluhutan i.

25:7 Alai dung diida si Pinehas, anak ni si Eleasar, tubu ni malim Aron songon i, hehe ma ibana sian tongatonga ni huria i, huhut patioptiop sada hujur di bagasan tanganna.

25:8 Laos diihuthon ma halak Israel i masuk tu bagasan bilut podoman jala sahali ditullang nasida duansa, baoa Israel i dohot parompuan i torus na niabitanna be. Jadi tongkinnai mansohot ma begu masa i sian halak Israel.

25:9 Ia torop ni jolma angka na mate binahen ni begu masa i duapulu opat ribu halak do.

25:10 Dung i ro ma hata ni Jahowa tu si Musa songon on:

25:11 Ia si Pinehas, anak ni si Eleasar, tubu ni malim Aron, nunga dipaombun ibana rimashu mida halak Israel, di na hinamokmokkonna murukku di tongatonganasida, umbahen so sun siap hubahen halak Israel di bagasan murukku.

25:12 Dibahen i paboa ma tu ibana: Ida ma, Ahu marbasabasahon tu ibana padan hadameon na hubahen i.

25:13 Ingkon ibana do, ro di pinomparna dung salpu ibana, jujungan ni padan hamalimon ro di salelenglelengna, upana ala dihamurukkon ulaon ni Debatana, jala dibahen pardengganan tu halak Israel.

25:14 Alai anggo goar ni baoa sian Israel na mate binunu i rap dohot boru Midian, i ma si Simri, anak ni si Salu, sada induk ni marga Simeon marompuompu.

25:15 Jala goar ni boru Midian na mate binunu i, i ma si Kosbi, boru ni si Zur, sada ihutan ni angka marga marompuompu di Midian.

25:16 Dung i ro muse hata ni Jahowa tu si Musa songon on:

25:17 Ingkon marmusu hamu dompak halak Midian jala patunduk hamu nasida.

25:18 Ai nasida jumolo marmusu dompak hamu marhite sian angkalnasida, na niangkalannasida i hamu taringot tu Peor dohot taringot tu si Kosbi, ibotonasida i, boru ni sada induk di Midian, na binunu apala di ari hararagat ni begu masa i ala Peor.

4 Musa 26

26:1 Jadi dung mansohot begu masa i, ro muse hata ni Jahowa tu si Musa dohot si Eleasar, anak ni malim Aron, songon on:

26:2 Surathon ma bilangan ni sandok luhutan ni halak Israel, olat ni na marumur duapulu taon dohot lobi sian i marompuompu, nasa baoa sialo musu di Israel.

26:3 Dung i mangkatai ma si Musa dohot malim Eleasar tu nasida di adaran Moab di topi ni Jordan, tondong ni Jeriko, ninna ma:

26:4 Olat ni na marumur duapulu taon dohot lobi sian i, ingkon bilangan do, songon na tinonahon ni Jahowa tu si Musa dohot tu halak Israel, angka naung ruar sian tano Misir.

26:5 Si Ruben do anak buhabaju ni Israel; angka anak ni si Ruben i ma: Si Hanok, marharoroan sian ibana halak Hanok i; si Pallu haroroan ni halak Pallu i.

26:6 Si Hezron haroroan ni halak Hezron i; si Karmi haroroan ni halak Karmi.

26:7 I ma pinompar ni halak Ruben, jala bilangannasida opatpulu tolu ribu pitu ratus tolupulu halak toropna.

26:8 Ia anak ni si Pallu, i ma si Eliab.

26:9 Jala angka anak ni si Eliab, i ma: Si Nemuel, si Datan dohot si Abiram. I ma si Datan dohot si Abiram, angka na tarpio tu huria i, i ma angka na mambingkasi bada dompak si Musa dohot si Aron di tongatonga ni halak na saparbulanan dohot si Kora, uju manjahati nasida dompak Jahowa.

26:10 Jadi dipangangang tano i babana, laos dibondut nasida rap dohot si Kora di na mate halak sisaparbulanan i, uju suda dipangan api dua ratus limapulu halak toropna laos gabe panjoraannasida.

26:11 Alai ndang mate anggo angka anak ni si Kora.

26:12 Angka anak ni si Simeon marompuompu: Si Nemuel haroroan ni halak Nemuel i; si Jamin haroroan ni halak Jamin i; si Jakin haroroan ni halak Jakin i.

26:13 Si Zerah haroroan ni halak Zerah i; si Saulus haroroan ni halak Saul i.

26:14 I ma pinompar ni halak Simeon, duapulu dua ribu dua ratus halak toropna.

26:15 Angka anak ni si Gad marompuompu: Si Zepon haroroan ni halak Zepon i; si Haggi haroroan ni halak Haggi; si Suni haroroan ni halak Suni.

26:16 Si Osni haroroan ni halak Osni; si Eri haroroan ni halak Eri.

26:17 Si Arod haroroan ni halak Arodi; si Areli haroroan ni halak Areli.

26:18 I ma pinompar ni halak Gad, bilangannasida do opatpulu ribu lima ratus halak toropna.

26:19 Ia angka anak ni si Juda, i ma: Si Er dohot si Onan; alai mate do anggo si Er dohot si Onan di tano Kanaan.

26:20 Angka anak ni si Juda marompuompu: Si Sela haroroan ni halak Selani; si Peres haroroan ni halak Perisi; si Zerah haroroan ni halak Zerah i.

26:21 Ia angka anak ni si Peres: Si Hezron haroroan ni halak Hezron i; si Hamul haroroan ni halak Hamul i.

26:22 I ma pinompar ni halak Juda jala bilangannasida pitupulu onom ribu lima ratus halak toropna.

26:23 Ia angka anak ni si Isasar marompuompu: Si Tola haroroan ni halak Tolai; si Pua haroroan ni halak Pua.

26:24 Jahsub haroroan ni halak Jashub i; Simron haroroan ni halak Simron i.

26:25 I ma pinompar ni halak Isasar jala bilangannasida onompulu opat ribu tolu ratus halak toropna.

26:26 Ia angka anak ni si Zebulon marompuompu: Si Sered haroroan ni halak Sered i; si Elon haroroan ni halak Elon; si Jahlel haroroan ni halak Jahlel.

26:27 I ma pinompar ni halak Zebulon jala bilangannasida i onompulu ribu lima ratus halak toropna.

26:28 Ia angka anak ni si Josep marompuompu: Si Manasse dohot si Epraim.

26:29 Ia angka anak ni si Manasse: Si Mahir haroroan ni halak Mahir; si Mahir huhut manubuhon si Gilead haroroan ni halak Gilead i.

26:30 On do angka anak ni si Gilead. Si Ieser haroroan ni halak si Ieser i; Helek haroroan ni halak Helek i.

26:31 Si Asriel haroroan ni halak Asriel; si Sikem haroroan ni halak Sikem i.

26:32 Si Semida haroroan ni halak Semida i, si Heper haroroan ni halak Heper i.

26:33 Alai anggo si Zelapehat, anak ni si Heper ndang tubuan anak holan boru do, angka na margoar: Si Mala, si Noah, si Hoglah, si Milka dohot si Tirza.

26:34 I ma pinompar ni si Manasse jala bilangannasida i limapulu dua ribu pitu ratus halak toropna.

26:35 On do angka anak ni si Epraim marompuompu: Si Sutelah, haroroan ni halak Sutelah i; si Beker haroroan ni halak Beker i; si Tahan haroroan ni halak Tahan i.

26:36 On do angka anak si Sutelah: Si Eran haroroan ni halak Erani.

26:37 Jala on do pinompar ni halak Epraim jala bilangannasida i tolupulu dua ribu lima ratus halak toropna. I ma angka anak ni si Josep marompuompu.

26:38 Angka anak ni si Benjamin marompuompu: Si Bela haroroan ni halak Bela; si Asbel haroroan ni halak Asbel; si Ahiram haroroan ni halak Ahiram i.

26:39 Si Sheshupam haroroan ni halak Sheshupam i; si Hupham haroroan ni halak Hupham i.

26:40 Ia angka anak ni si Bela: Si Ared dohot si Naaman, haroroan ni halak Ared dohot Naaman i.

26:41 On do pinompar ni si Benjamin marompuompu jala bilangannasida i opatpulu lima ribu onom ratus halak toropna.

26:42 On do angka anak ni si Dan marompuompu: Si Suham haroroan ni halak Suham i. I ma angka pinompar ni Dan marompuompu.

26:43 Jala bilangan ni saluhut halak Suham i onompulu opat ribu opat ratus halak toropna.

26:44 Ia angka anak ni si Aser marompuompu: Si Innah haroroan ni halak Jimnai; si Isvi haroroan ni halak Isvi i; si Beria haroroan ni halak Beria.

26:45 Ia angka anak ni si Beria: Si Heber haroroan ni halak Heber i; si Malkiel haroroan ni halak Malkieli.

26:46 Ia goar ni boru ni si Aser, i ma si Zerah.

26:47 On do pinompar ni angka anak ni si Aser, jala bilangannasida i limapulu ribu opat ratus halak toropna.

26:48 Ia angka anak ni si Naptali marompuompu: Si Jahrel haroroan ni halak Jahrel; si Guni haroroan ni halak Guni.

26:49 Si Jeser haroroan ni halak Jeser i; si Shillem haroroan ni halak Shillem i.

26:50 I ma pinompar ni si Naptali marompuompu jala bilangannasida i opatpulu lima ribu opat ratus halak toropna.

26:51 I ma bilangan ni halak Israel sudena onom ratus sada ribu pitu ratus tolupulu halak toropna.

26:52 Dung i ro muse hata ni Jahowa tu si Musa songon on.

26:53 Ingkon tu halak on do bagion tano i bahen partalianna marguru tu bilangan ni goargoar.

26:54 Molo torop halak bilanganna, ingkon pagandaonmu partalianna, molo otik paotihonmu huhut partalianna; ganup tahe marguru tu bilanganna lehonon partalianna.

26:55 Alai tahe ingkon marhite sian rujiruji bagion tano i, ingkon marguru tu goargoar ni marga marompu ompu nasida maruli partalian.

26:56 Ingkon marguru tu rujiruji sagion partalianna be manang na torop bilanganna, manang na otik.

26:57 Jala on do bilangan ni halak Lepi marompuompu: Si Gerson haroroan ni halak Gerson i; si Kohat haroroan ni halak Kohat i; si Merari haroroan ni halak Merari.

26:58 Jala on do pinompar ni si Lepi: Pinompar ni halak Libni, pinompar ni halak Hebron i, pinompar ni halak Mahli, pinompar ni halak Musi, pinompar ni halak Kora i. Alai anggo si Kohat manubuhon si Amram.

26:59 Ia goar ni jolma ni si Amram, i ma si Jokhebed, boru ni si Lepi, na tinubuhon ni si Lepi di Misir. Si Jokhebed muse manubuhon di si Amram: Si Aron, si Musa dohot si Miryam, ibotonasida i.

26:60 Ia tabu ni si Aron muse: Si Nadab, si Abihu, si Eleasar dohot si Itamar.

26:61 Alai tibu do mate anggo si Nadab dohot si Abihu, uju na binoannasida i api sileban tu adopan ni Jahowa.

26:62 Ianggo toropnasida luhutna, duapulu tolu ribu halak sudena baoa, olat ni na marumur sabulan dohot lobi sian i; ndang dohot nasida tarbilang tu tongatonga ni halak Israel, ala so maruli partalian nasida di tongatonga ni halak Israel.

26:63 On do bilangan ni halak Israel, angka na binilang ni si Musa dohot malim Eleasar di adaran Moab, martopihon Jordan, tondong ni Jeriko.

26:64 Jala di tongatonga ni saluhutna i ndang adong nanggo sahalak sian angka na binilang ni si Musa dohot malim Aron na jolo, angka na mamilangi halak Israel uju di halongonan Sinai i.

26:65 Ai nunga dilumbahon Jahowa hian tu nasida: Ingkon mate nasida di halongonan! Jadi ndang adong teba sian nasida nanggo sahalak, nda holan si Kaleb, anak ni si Jepune dohot si Josua, anak ni si Nun.

4 Musa 27

27:1 Dung i ro ma jumonok angka boru ni si Zelapehat, anak ni si Heper, i ma anak ni si Gilead, i ma anak ni si Mahir, i ma anak ni si Manasse, sian marga Manasse, anak ni si Josep. Alai on do goargoar ni angka boruna: Si Mala, si Noah, si Hoglah, si Milka dohot si Tirza.

27:2 Laos jongjong ma nasida tu adopan ni si Musa dohot malim Eleasar dohot tu adopan ni angka induk dohot tu adopan ni sandok huria i di pintu ni undungundung parluhutan i, ninna ma:

27:3 Nunga mate anggo amanami di halongonan, alai ndang dohot ibana di tongatonga ni halak na saparbulanan, angka na manjahati dompak Jahowa, angka na paihuthon tahi ni si Kora, ala ni dosana sandiri do umbahen mate ibana, so martinading anak.

27:4 Boasa tagonan ingkon pidom goar ni amanami sian tongatonga ni bangsona, ala so martinading anak ibana? Ua lehon huhut di hami partalian di tongatonga ni hahaanggi ni amanami!

27:5 Dung i diboan si Musa ma hatanasida i tu adopan ni Jahowa.

27:6 Jadi ro ma hata ni Jahowa tu si Musa songon on:

27:7 Sintong do pangidoan ni angka boru ni si Zelapehat; ingkon lehononmu tu nasida teanteanan di tongatonga ni hahaanggi ni amanasida i, ingkon sahat tu nasida do lehononmu partalian ni amanasida i.

27:8 Ingkon dohononmu huhut tu halak Israel songon on: Tung sura mate manang ise so martinading anak, ingkon sahat teanteananna tu angka boruna lehononmuna.

27:9 Alai tung sura so adong boruna, ingkon lehononmuna do teanteananna tu hahaanggina.

27:10 Tung sura so adong nang hahaanggina, ingkon lehonon teanteananna tu hahaanggi ni amana.

27:11 Jala tung sura so adong hahaanggi ni amana, ingkon lehonon do teanteananna tu donganna sabutuha na sumolhot tu ibana, donganna samarga, asa nasida manean. Ingkon i ma gabe patik ni uhum di halak Israel, songon na tinonahon ni Jahowa hian tu si Musa.

27:12 Dung i ro ma hata ni Jahowa mandok tu si Musa: Nangkok ma ho tu atas ni dolok Abarim on, jala tatap ma tano naung hulehon i tu halak Israel.

27:13 Ia dung diida ho tano i, ingkon papunguon ma dohot ho tu bangsom, suang songon si Aron hahami, dipapungu.

27:14 Ala na nilaosanmuna hatangku di halongonan Zin, uju na mambingkasi bada huria i, uju parbadiaanmuna nian Ahu marhite sian aek i di adopan ni matanasida i. I ma aek Meriba mardonokkon Kades di halongonan Zin.

27:15 Dung i ninna si Musa ma tu Jahowa songon on:

27:16 Ingkon pabangkiton ni Jahowa, Debata ni angka tondi ni nasa daging nian sada halak manguluhon huria i.

27:17 Ibana nian masuk dohot ruar di adopannasida, laos ibana manogihon nasida masuk dohot ruar, asa unang luhutan ni Jahowa, songon birubiru na so marparmahan.

27:18 Dung i ro muse hata ni Jahowa tu si Musa: Arahon ma bahen donganmu si Josua, anak ni si Nun, sahalak naung maruli Tondi tu bagasan rohana, jala ampehon ma tanganmu tu ibana.

27:19 Dung i pajongjong ma ibana di adopan ni malim Eleasar dohot di adopan ni sandok huria i, jala lehon parenta tu adopan ni matanasida i.

27:20 Ingkon lehononmu huhut sian sahalam tu ibana, asa sandok huria ni halak Israel tumangihon ibana.

27:21 Dung i ingkon jongjong ibana di adopan ni malim Eleasar, asa ibana manungkun Jahowa taringot tu ibana marhitehite uhum ni Urim di adopan ni Jahowa; ingkon marguru tu hatana nasida ruar dohot masuk, ibana tahe ro di sude halak Israel rap dohot sandok huria i.

27:22 Dung i dibahen si Musa ma, songon na tinonahon ni Jahowa tu ibana, diarahon ma si Josua, jala dipajongjong ibana di adopan ni malim Eleasar dohot di adopan ni sandok huria i.

27:23 Laos diampehon ma tanganna tu ibana jala ditonai ibana, hombar tu na pinaboa ni Jahowa marhite sian si Musa.

4 Musa 28

28:1 Dung i ro muse hata ni Jahowa tu si Musa songon on:

28:2 Pasahat ma tonangku tu halak Israel jala paboa tu nasida: Ia pelean tu Ahu hira sagusagungku bahen pelean api, uap na hushus di Ahu, ingkon radotanmuna do i laho mamboan jumonok tu Ahu di tingkina naung binuhul hian.

28:3 Jala dohononmu ma tu nasida: On do pelean api na patut sipelehononmuna tu Jahowa: Dua anak ni birubiru na marumur sataon, na so marlindang ganup ari bahen pelean situtungon na tongtong.

28:4 Birubiru na sada ingkon manogotna i pelehononmu, jala birubiru na sada ingkon marhira bodari pelehononmu.

28:5 Tole saparsampulu epah itak na lamot bahen pelean sipanganon, ingkon dogilon dohot miak na tinutu saparopat Hin.

28:6 I ma pelean situtungon na tongtong, naung pinelehon i di dolok Sinai, i ma pelean api bahen uap na hushus di Jahowa.

28:7 Tole muse peleanna siinumon saparopat Hin di ganup anak ni birubiru; ingkon di bagasan inganan na badia i do usehononhon pelean siinumon sian anggur di Jahowa.

28:8 Ianggo anak ni birubiru na sadanari, ingkon pelehononmu do i mareak bodari, suang songon pelean sipanganon manogotna i, jala suang songon peleanna siinumon i, i ma pelean api, uap na hushus di Jahowa.

28:9 Alai anggo di ari Sabbat ingkon dua anak ni birubiru na marumur sataon, jala na so marlindang dohot dua parsampulu itak na lamot, bahen pelean sipanganon na nidogil dohot miak rap dohot peleanna siinumon.

28:10 I ma pelean situtungon di ganup ari Sabbat, di balik ni pelean situtungon na tongtong i rap dohot peleanna siinumon.

28:11 Tole muse di artia ganup bulan ingkon pelehononmuna sada pelean situtungon di Jahowa: Dua anak ni lombu, sada birubiru tunggal, pitu anak ni birubiru na marumur sataon, angka na so martihas.

28:12 Jala tolu parsampulu itak na lamot bahen pelean sipanganon, nidogil dohot miak, dongan ni ganup anak ni lombu, jala dua parsampulu itak na lamot bahen pelean sipanganon nidogil dohot miak, dongan ni sada birubiru tunggal.

28:13 Jala saparsampulu itak na lamot bahen pelean sipanganon nidogil dohot miak, dongan ni ganup anak ni birubiru. I ma pelean situtungon bahen uap na hushus, sada pelean api di Jahowa.

28:14 Jala peleanna siinumon ingkon on do: Satonga Hin anggur dongan ni ganup anak ni lombu, sapartolu Hin dongan ni ganup birubiru tunggal, jala saparopat Hin dongan ni ganup birubiru. I ma pelean situtungon di ganup poltak ni bulan manipat taon.

28:15 Angkup ni pelehononhon do sada hambing tunggal bahen pelean pardosaon di Jahowa di balik ni pelean situtungon na tongtong i, rap dohot peleanna siinumon.

28:16 Alai di ari sampulu opat bulan sipaha sada, disi ma Paska di Jahowa.

28:17 Jala di ari sampulu lima bulan i masa ari raya; ingkon pitu ari lelengna panganon sagusagu na so niasoman.

28:18 Di ari parjolo ma pansangon luhutan na badia; ndang jadi bahenonmuna agia aha ulaon ariari disi.

28:19 Ingkon pelehononmuna huhut pelean api bahen pelean situtungon di Jahowa: Dua anak ni lombu, sada birubiru tunggal dohot pitu anak ni birubiru na marumur sataon, angka na so jadi martihas.

28:20 Rap dohot peleanna sipanganon sian itak na lamot nidogil dohot miak; tolu parpuluan dongan ni ganup anak ni lombu jala dua parpuluan dongan ni birubiru tunggal pelehononmuna.

28:21 Saparpuluan be pelehononmuna dongan ni ganup anak ni birubiru na pitu i.

28:22 Tole muse sada hambing tunggal bahen pelean pardosaon mambahen pardengganan di hamu.

28:23 Ingkon pelehononmuna do angka i di balik ni pelean situtungon manogotna i, naung gabe pelean situtungon manongtong do i.

28:24 Hombar tusi ingkon pelehononmuna ariari na pitu ari i sagusagu bahen pelean api, uap na hushus di Jahowa di balik ni pelean situtungon na tongtong i do i pelehononmuna rap dohot peleanna siinumon i.

28:25 Anggo di ari papituhon i, ingkon pansangonmuna ma luhutan na badia di hamu; ndang jadi ulahononmuna disi agia aha ulaon ariari.

28:26 Tole muse di ari patumonaan, molo dipelehon hamu pelean sipanganon na imbaru di Jahowa dung boho angka minggumuna i, ingkon pansangonmuna do sada luhutan na badia di hamu: Ndang jadi ulahononmuna disi agia aha ulaon ariari.

28:27 Ingkon pelehononmuna disi dua anak ni lombu, sada birubiru tunggal, pitu anak ni birubiru na marumur sataon bahen pelean situtungon, uap na hushus di Jahowa.

28:28 Rap dohot itak na lamot na nidogil dohot miak bahen pelean sipanganon: Tolu parpuluan di ganup anak ni lombu, dua parpuluan di ganup birubiru tunggal.

28:29 Jala sada parpuluan di ganup anak ni birubiru na pitu i.

28:30 Sada hambing tunggal bahen pardengganan di hamu.

28:31 Pelehononmuna do angka i di balik ni pelean situtungon na tongtong i rap dohot peleanna sipanganon; ingkon na so martihas do angka i di hamu rap dohot peleanna siinumon i.

4 Musa 29

29:1 Di artia di bulan sipaha pitu ingkon pansangon di hamu sada luhutan na badia, ndang jadi ulahononmuna disi agia aha ulaon ariari, ai ari raya parsaruneon do i di hamu.

29:2 Ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, uap na hushus di Jahowa.

29:3 Rap dohot itak na lamot na nidogil dohot miak bahen pelean sipanganon: Tolu parpuluan dongan ni anak ni lombu i, dua parpuluan dongan ni birubiru tunggal i.

29:4 Jala saparpuluan dongan ni ganup birubiru na pitu i.

29:5 Angkup ni muse hambing tunggal sada bahen pelean pardosaon, mambahen pardengganan di hamu.

29:6 Di balik ni pelean situtungon di poltak ni bulan rap dohot peleanna sipanganon ro di pelean situtungon na tongtong i rap dohot peleanna sipanganon ro di peleanna siinumon tahe hombar tu uhumna hian, bahen uap na hushus, pelean api tu Jahowa.

29:7 Tole di ari sampulu di bulan sipaha pitu i, ingkon pansangon di hamu sada luhutan na badia, ingkon paunduhonmuna rohamuna disi, nanggo sada ulaon, ndang jadi ulahononmuna disi.

29:8 Ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, uap na hushus di Jahowa.

29:9 Rap dohot itak na lamot na nidogil dohot miak bahen pelean sipanganon: Tolu parpuluan dongan ni lombu i, dua parpuluan dongan ni birubiru tunggal i.

29:10 Jala saparpuluan dongan ni ganup anak ni birubiru na pitu i.

29:11 Tole muse sada hambing tunggal bahen pelean pardosaon, di balik ni pelean pardosaon bahen pardengganan ro di pelean situtungon na tongtong i rap dohot peleanna sipanganon dohot peleanna siinumon.

29:12 Tole muse di ari sampulu lima bulan sipaha pitu i ingkon pansangonmuna di hamu sada luhutan na badia, nanggo sada ulaon ariari ndang jadi ulahononmuna disi, ingkon marari raya di Jahowa hamu pitu ari lelengna.

29:13 Ingkon pelehononmuna disi sampulu tolu anak ni lombu, dua birubiru tunggal, sampulu opat anak ni birubiru na marumur sataon, angka na so jadi martihas bahen pelean situtungon, sada pelean api, uap na hushus di Jahowa.

29:14 Rap dohot itak na lamot na nidogil dohot miak bahen pelean sipanganon: Tolu parpuluan di ganup anak ni lombu na sampulu tolu i, dua parpuluan di ganup birubiru tunggal na dua i.

29:15 Jala saparpuluan di ganup anak ni birubiru na sampulu opat i.

29:16 Tole muse sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:17 Tole muse di ari paduahon i sampulu dua anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

29:18 Rap dohot peleanna sipanganon dohot peleanna siinumon, dongan ni angka anak ni lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

29:19 Tole sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:20 Tole muse di ari patoluhon sampulu sada anak ni lombu, dua birubiru tunggal, sampulu opat anak ni birubiru, angka na so martihas.

29:21 Rap dohot peleanna sipanganon dohot peleanna siinumon, dongan ni angka lombu, angka hambing tunggal dohot angka anak ni birubiru, marguru tu bilanganna be, hombar tu uhumna hian.

29:22 Angkup ni muse sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot siinumon.

29:23 Tole muse di ari paopathon sampulu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

29:24 Rap dohot peleanna sipanganon dohot peleanna siinumon, dongan ni angka lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

29:25 Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:26 Tole muse di ari palimahon sia anak ni lombu, dua birubiru tunggal, sampulu opat anak ni birubiru, angka na so martihas.

29:27 Rap dohot peleanna sipanganon dohot peleanna siinumon, dongan ni angka anak ni lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

29:28 Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:29 Tole muse di ari paonomhon ualu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

29:30 Rap dohot peleanna sipanganon dohot peleanna siinumon dongan ni angka anak ni lombu, angka birubiru tunggal dohot angka anak ni birubiru, marguru tu bilanganna be, hombar tu uhumna hian.

29:31 Angkup ni sada hambing tunggal bahen pelean pardosaon di balik ni pelean situtungon na tongtong i rap dohot peleanna sipanganon dohot peleanna siinumon.

29:32 Tole muse di ari papituhon pitu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

29:33 Rap dohot peleanna sipanganon dohot peleanna siinumon, dongan ni angka anak ni lombu i, angka birubiru tunggal dohot angka anak ni birubiru, marguru tu bilanganna be, hombar tu uhumna hian.

29:34 Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:35 Tole muse di ari paualuhon, ingkon disi ma mata ni ari raya i, nanggo sada ulaon ariari, ndang jadi ulahononmuna disi.

29:36 Alai ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, pelean api uap na hushus di Jahowa.

29:37 Rap dohot peleanna sipanganon dohot peleanna siinumon, dongan ni anak ni lombu i, dongan ni birubiru tunggal i dohot dongan ni angka anak ni birubiru, marguru tu bilanganna be, hombar tu uhumna hian.

29:38 Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

29:39 I ma pelean angka sipelehononmuna tu Jahowa di angka ari rayamuna, di balik ni angka bagabagamuna dohot silehonlehonmuna sian lomo ni roha bahen angka pelean situtungon, angka pelean sipanganon, angka pelean siinumon dohot angka pelean hamauliateon di hamu.

4 Musa 30

30:1 Dung i dipatolhas si Musa ma tu halak Israel saluhut naung tinonahon ni Jahowa tu ibana.

30:2 Dung i ro ma hata ni Musa tu angka induk ni halak Israel marmargamarga, ninna ma: On do hata naung tinonahon ni Jahowa:

30:3 Tung sura naung marbagabaga sahalak tu Jahowa manang marjanji, pola naung manolon ibana ingkon oromon ni rohana manang aha, na so tupa ubaonna hatana, ingkon hombar tu saluhut na ruar sian pamanganna bahenonna.

30:4 Alai tung sura sada parompuan marbagabaga tu Jahowa, manang marjanji, ingkon oromon ni rohana manang aha tagan namarbaju dope di jabu ni amana.

30:5 Hape tarbege ma bagabagana manang janjina taringot tu sioromon ni rohana i tu amana, laos dihasiphon amana i, ingkon hot ingotonna nasa bagabagana dohot nasa janjina taringot tu sioromon ni rohana i.

30:6 Alai molo pintor mangunangi amana i di ari dung dibege nasa bagabagana manang janjina taringot tu sioromon ni rohana i, ndang jadi hot ingotonna; marpamuati dohot roha ni Jahowa di nasida, ala mangunangi amana i di nasida.

30:7 Alai tung sura naung mardongan saripe nasida, hape marutang bagabaga manang tarsor pamanganna marjanji taringot tu sioromon ni rohana i.

30:8 Jala dibege sinondukna i do nian, molo laos dihasiphon do i di ari uju binegena i, ingkon hot do ingotonna bagabagana dohot janjina taringot tu sioromon ni rohana i.

30:9 Alai molo mangunangi sinondukna i di nasida di ari dung dibege, gabe sinondukna i mansoadahon bagabagana hian manang janji naung tarsor sian pamanganna taringot tu sioromon ni rohana i, jadi marpangulahi ma roha ni Jahowa mida nasida.

30:10 Alai anggo bagabaga ni sada parompuan na mabalu manang naung binolongkon, nasa naung jinanjihonna taringot tu sioromon ni rohana, ingkon hot do ingotonna.

30:11 Alai tung sura di bagasan jabu ni sinondukna dope ibana marbagabaga manang marjanji, pola marsumpa taringot tu sioromon ni rohana i.

30:12 Jala dibege sinondukna do i nian, laos dihasiphon ndang diorai nasida, ingkon hot ingoton nasa bagabagana dohot nasa janji naung jinanjihonna taringot tu sioromon ni rohana.

30:13 Alai molo disoadahon sinondukna do i di ari dung binegena, nasa naung ruar sian pamanganna, nang bagabagana, nang janjina taringot tu sioromon ni rohana i, ndang jadi hot ingotonna, ala naung disoadahon sinondukna i do i, jala marpangulahi roha ni Jahowa mida nasida.

30:14 Nasa bagabaga tahe dohot nasa sumpa taringot tu sioromon laho paundukkon roha, tarbahen sinondukna do pahothon, tarbahen sinondukna huhut mansoadahon.

30:15 Alai molo tongtong sip sinondukna i sian na sadari tu ari muse, na pahothon do ibana di saluhut bagabagana dohot di saluhut janjina taringot tu sioromonnai; hot ma tutu ingoton angka i, ala na sipi ibana di ari dung binegena i.

30:16 Alai tung sura naeng soadahononna angka i dung binegena i, ingkon manginona tu ibana do hajahatonna i.

30:17 I ma angka uhum na tinonahon ni Jahowa tu si Musa taringot tu baoa martimbangkon jolma; taringot tu amaama martimbangkon boruna saleleng namarbaju dope di bagasan jabu ni amana.

4 Musa 31

31:1 Dung i ro muse ma hata ni Jahowa tu Musa songon on:

31:2 Ingkon martubol halak Israel bahenonmu tu halak Midian, dung salpu i ingkon papunguon ma ho tu bangsom.

31:3 Jadi ninna si Musa ma tu bangso i songon on: Pillit hamu ma sian hamu baoa angka na laho marporang mandopang halak Midian mangalaluhon partubolan ni Jahowa tu halak Midian.

31:4 Sasaribu halak sian ganup marga, sian sandok marga ni Israel tahe paborhatonmuna laho marporang.

31:5 Jadi tarpillit ma sian halak Israel na marriburibu, sasaribu halak sian ganup marga, gabe sampulu dua ribu halak angka na pinillit tu parporangan.

31:6 Jadi dipaborhat si Musa ma nasida saribu halak sian ganup marga tu parporangan, nasida dohot si Pinehas, anak ni malim Eleasar tu parporangan, huhut patioptiop angka ulaula na badia dohot angka sarune na marsoara toletole.

31:7 Jadi marporang ma nasida dompak halak Midian, songon na tinonahon ni Jahowa tu si Musa, jala diraserasehon nasida do nasa baoa.

31:8 Angkup ni halak angka na marragean i dibunu nasida huhut angka raja sian Midian, i ma: Si Evi dohot si Rekem dohot si Zur dohot si Hur dohot si Reba, na lima raja ni halak Midian, nang dohot si Bileam, anak ni si Beor dibunu nasida do marhitehite podang.

31:9 Laos dapot diboan halak Israel angka parompuan ni halak Midian dohot dakdanaknasida; ditaban duduk huhut sandok dorbianasida, ugasannasida dohot artanasida.

31:10 Jala saluhut hutanasida ro di sude ingananna dohot parbentenganna, suda do disurbu dohot api.

31:11 Laos diboan nasida do nasa tabantaban nasa rampasan sian jolma dohot pinahan.

31:12 Jala diboan nasida do tu si Musa dohot tu malim Eleasar dohot tu huria ni halak Israel angka na dapot tartangkup dohot ugasan rampasan ro di tabantaban tu parsaroan, tu adaran Moab martopihon Jordan, tondong ni Jeriko.

31:13 Dung i ruar ma si Musa dohot malim Eleasar dohot sude induk ni huria i manomunomu nasida tu balian ni parsaroan i.

31:14 Dung i tarrimas situtu ma si Musa mida partogi ni angka parangan i, mida angka induk ni sisaribu halak dohot sisaratus halak, angka na ro mulak sian parporangan.

31:15 Dung i ninna si Musa ma tu nasida: Boasa tung pangoluonmuna sude parompuannasida i?

31:16 Ida ma, angka nasida do gabe parbingkasan marbalik sian Jahowa mangihuthon tu Peor tinuturan ni si Bileam, gabe ro begu masa tu huria ni Jahowa.

31:17 Dibahen i bunu hamu ma nasa dakdanak baoa dohot nasa parompuan, naung dung sampur tu sada baoa bunu hamu.

31:18 Alai anggo nasa dakdanak boruboru, angka na so dung sampur tu sada baoa, pangolu hamu ma di hamu.

31:19 Alai anggo hamu, ingkon marsaro hamu di balian ni parsaroan pitu ari lelengna; manang ise naung mambunu jolma jala manang ise naung manjama jolma na binunu i, ingkon urasonmuna dirimuna sian dosa di ari patoluhon dohot di ari papituhon, nang hamu nang sude jolma na dapot binoanmuna i.

31:20 Jala nasa pangkean dohot nasa ulaula sian hulingkuling dohot nasa hapandean sian imput ni hambing dohot nasa ulaula hau, ingkon urasonmuna do.

31:21 Dung i ro ma hata ni malim Eleasar mandok tu halak parporang, angka naung mulak sian parporangan: On do patik ni uhum naung tinonahon ni Jahowa tu si Musa:

31:22 Ianggo sere, perak, tombaga, bosi, seng dohot simbora.

31:23 Ro di saluhut na manahan di bagasan api, ingkon pabolushononmuna sian bagasan api, asa pita, alai ingkon urusan do huhut sian ramunna marhite aek pangurasion; alai nasa na so manahan di bagasan api, ingkon pabolushononmuna do sian aek.

31:24 Ingkon sunsionmuna huhut pangkeanmuna di ari papituhon i, asa laos ias hamu, ipe asa jadi hamu masuk tu parsaroan i.

31:25 Dung i ro muse hata ni Jahowa tu si Musa songon on:

31:26 Surathon ma godang ni tabantaban dohot rampasan sian jolma dohot pinahan, ho dohot malim Eleasar ro di angka induk ni huria i marompuompu.

31:27 Dung i bagi dua ma bahenonmu tabantaban i, satonga di halak parporang, angka na borhat tu tongtangan, na satonganari di sandok huria i.

31:28 Dung i ingkon papulihonmu ma guguan di Jahowa sian halak parporang i, angka na borhat tu tongtangan, sada sian lima ratus nang sian jolma, lombu, halode dohot sian birubiru.

31:29 Ingkon sian na satonga di nasida buatonmu jala lehononmu tu malim Eleasar bahen pelean tatingan tu Jahowa.

31:30 Alai anggo sian na satonga na di halak Israel, ingkon buatonmu sada sian na limapulu, nang sian jolma, lombu, halode, dohot birubiru, sian sandok pinahan jala lehononmu tu halak Lepi, angka na mangaradoti ulaon di undungundung ni Jahowa.

31:31 Jadi dibahen si Musa dohot malim Eleasar ma, songon na tinonahon ni Jahowa tu si Musa.

31:32 Jadi godang ni tabantaban, so padohot tabantaban na so marhosa, angka na tinaban ni halak parporang i: Onom ratus pitupulu lima ribu birubiru.

31:33 Pitupulu dua ribu lombu.

31:34 Onompulu sada ribu halode.

31:35 Ia torop ni parompuan, angka na so dung sampur tu baoa tolupulu dua ribu halak toropna.

31:36 Jadi bilangan ni na satonga, jambar ni halak na borhat tu tongtangan, i ma tolu ratus tolupulu pitu ribu lima ratus birubiru.

31:37 Jadi guguanna di Jahowa sian angka birubiru onom ratus pitupulu lima birubiru.

31:38 Jala sian na tolupulu onom ribu lombu pitupulu dua guguanna tu Jahowa.

31:39 Jala sian na tolupulu ribu lima ratus halode, onompulu sada guguanna tu Jahowa.

31:40 Jala sian na sampulu onom ribu hosa ni jolma, tolupulu dua jolma guguanna tu Jahowa.

31:41 Dung i dipasahat si Musa ma guguan i bahen pelean tatingan, jambar ni Jahowa tu malim Eleasar, songon na tinonahon ni Jahowa tu si Musa.

31:42 Ia na satonganari na binuat ni si Musa sian halak parporang i, nilehonna tu halak Israel.

31:43 Na satonganari jambar ni huria i, laos tolu ratus pitupulu tolu ribu lima ratus birubiru.

31:44 Tolupulu onom ribu lombu.

31:45 Tolupulu ribu lima ratus halode.

31:46 Dohot sampulu onom ribu hosa ni jolma.

31:47 Dung i dibuat si Musa ma sian na satonga jambar ni halak Israel i sada sian limapulu, nang sian jolma, nang sian pinahan, jala dilehon do i tu halak Lepi, angka na mangaradoti ulaon di undungundung ni Jahowa, songon na tinonahon ni Jahowa hian tu si Musa.

31:48 Dung i ro ma jumonok tu si Musa angka partogi ni parangan marriburibu, angka induk ni sisaribu halak dohot sisaratus halak.

31:49 Jala didok nasida ma tu si Musa: Nunga dibilangi angka naposom torop ni halak parporang angka na marpandapotan tu hami, jala ndang mago nanggo sahalak.

31:50 Ala ni umbahen na huboan hami pelean tu Jahowa, ganup sian na dapot tanganna sian ulaula sere, leang di pat dohot di pargolangan, nang tintin dohot sibong dohot simata landus, asa mambahen pardengganan tu tondinami di adopan ni Jahowa.

31:51 Dung i dibuat si Musa dohot malim Eleasar ma sere i sian nasida, luhut ulaula na marhapandean marragamragam.

31:52 Jadi saluhut sere pelean tatingan, na binoannasida tu Jahowa sampulu onom ribu pitu ratus limapulu sekkel dokdokna, sian angka induk sisaribu halak dohot sisaratus halak.

31:53 Angka baoa parporang pe ganup marrintahan be do.

31:54 Dung i dibuat si Musa dohot malim Eleasar ma sere i sian induk ni sisaribu halak dohot sisaratus halak, jala diboan do i tu bagasan undungundung parluhutan i bahen parningotan di halak Israel di adopan ni Jahowa.

4 Musa 32

32:1 Alai anggo pinompar ni si Ruben dohot si Gad pardorbia na godang situtu do, gabe diida nasida ma tano Jaser dohot tano Gilead, jadi ida ma, inganan na denggan do i di halak parpinahan.

32:2 Dung i ro ma halak si Gad dohot Ruben mandok hatanasida tu si Musa dohot tu malim Eleasar dohot tu angka induk ni huria i, ninna ma:

32:3 Ia Atarot, Dibon, Jaser, Nimra, Hesbon, Eleale, Sebam, Nebo dohot Beon.

32:4 Tano naung pinapatu ni Jahowa di adopan ni huria Israel, tano na denggan do i di halak parpinahan, jala pardorbia do angka naposom.

32:5 Angkup ni didok nasida: Molo maruli asi ni roha hami di adopanmu, nilehon ma nian tano on tu angka naposom bahen partalianna, unang nian hami taripar tu bariba ni Jordan.

32:6 Alai ninna si Musa ma tu halak Gad dohot tu halak Ruben: Tung tama ma hahaanggimuna laho tu parporangan, ia hamu naeng tinggal dison marsonangsonang?

32:7 Boasa tung paganggugangguonmuna roha ni halak Israel, asa unang taripar nasida tu tano naung nilehon ni Jahowa tu nasida?

32:8 Suang songon i do na binahen ni amamuna, uju husuru nasida sian Kades-Barnea laho mangkahapi tano i.

32:9 Jadi dung nangkok nasida sahat tu rura Eskol jala dihahapi tano i, gabe dipagangguganggu nasida roha ni halak Israel, pola manjua nasida masuk tu tano, naung nilehon ni Jahowa tu nasida.

32:10 Pola marsigorgor rimas ni Jahowa di ari na sasada i, jala maruari ibana mandok:

32:11 Ndang jadi be baoa angka naung hutogihon nangkok sian tano Misir olat ni na marumur duapulu taon dohot lobi sian i marnida tano naung huuarihon tu si Abraham, si Isak dohot si Jakkob! Ala ndang marsihohot rohanasida mangihuthon Ahu.

32:12 Dungkon ni si Kaleb, anak ni si Jepune halak si Kenizi dohot si Josua, anak ni si Nun, ala marsihohot anggo rohanasida mangihuthon Jahowa.

32:13 Jadi marpiarpiar ma rimas ni Jahowa mida Israel, gabe maotaot nasida didokkon di halongonan opatpulu taon lelengna, paima sun siap na sansundut i na mangulahon hajahaton di adopan ni Jahowa.

32:14 Jala ida ma, hamu do nuaeng soluk singkat ni amamuna i, sada sundut halak pardosa, naeng manambai dope huroha, parpiarpiar ni rimas ni Jahowa dompak Israel.

32:15 Ai tung sura marbalik hamu sian Ibana, lumeleng dope pasombuonna bangso on di halongonan, jala mago do sandok bangso on bahenonmuna.

32:16 Dung i ro ma nasida jumonok mandapothon ibana huhut didok: Asal naeng paulihon angka pondokpondok di pinahannami hami dison dohot huta pungkaonnami di angka anakkonnami.

32:17 Alai hatop pe anggo hami mangkontas manguluhon halak Israel, paima sahat nasida huboan hami tu ingananna; ingkon angka anakkonnami tinggal di bagasan huta, angka na gonting i maradophon isi ni tano i hian.

32:18 Ndang naeng mulak anggo hami tu jabunami, nda jolo disoluk halak Israel ganup partalianna be.

32:19 Ai ndada naeng sapartalian hami dohot nasida di bariba ni Jordan adui, ia dung sahat partaliannami tu hami di bariba ni Jordan tungkan habinsaran.

32:20 Dung i ninna si Musa ma tu nasida: Molo dibahen hamu songon i, molo mangkontas hamu di adopan ni Jahowa laho tu parporangan.

32:21 Antong taripari hamu ma Jordan di adopan ni Jahowa, sude hamu angka na tang marsinjata, paima sun dipabali Ibana angka musuna sian adopanna.

32:22 Jala patu tano i di adopan ni Jahowa, dung salpu i jadi do hamu mulak, gabe lias hamu sian sala maradophon Jahowa dohot Israel, jala ingkon tano on gabe partalianmuna di adopan ni Jahowa.

32:23 Alai molo so dibahen hamu songon i, ida ma, mardosa ma hamu dompak Jahowa, jala boto hamu ma, ingkon manginona tu hamu dosamuna i.

32:24 Antong pungka hamu ma angka huta di anakkonmuna dohot pondokpondok di birubirumuna, alai patupa hamu huhut hata na ruar sian pamanganmunai.

32:25 Dung i ninna halak Gad dohot Ruben ma mandok si Musa: Ingkon bahenon ni angka naposom do hombar tu tona ni tuantai.

32:26 Anakkonnami, jolmanami, ugasannami ro di sandok pinahannami, ingkon tading dison di bagasan angka huta ni Gilead.

32:27 Alai anggo hami, angka naposomon, ingkon taripar sude tang marsinjata be tu parporangan di adopan ni Jahowa, songon naung nidok ni tuantai.

32:28 Jadi ro ma tona ni si Musa taringot tu nasida mandok tu malim Eleasar dohot tu si Josua, anak ni si Nun dohot tu sude induk ni halak Israel marmargamarga.

32:29 Ninna si Musa ma tahe tu nasida: Molo taripar halak Gad dohot Ruben rap dohot hamu tu bariba ni Jordan, sude halak angka na tang be tu parporangan di adopan ni Jahowa, jala naung patu tano i maradophon hamu, ingkon lehononmuna ma tu nasida tano Gilead bahen partalianna.

32:30 Alai tung sura ndang taripar halak angka na tang marsinjata rap dohot hamu, ingkon marpartalian nasida di tongatongamuna di tano Kanaan.

32:31 Jadi ro ma alus ni halak Gad dohot Ruben mandok: Manang aha naung nidok ni Jahowa tu angka naposomon, ingkon songon i bahenonnami.

32:32 Ingkon tang be hami marsinjata taripar di adopan ni Jahowa tu tano Kanaan jala hot di hami partaliannami di bariba ni Jordan.

32:33 Jadi dilehon si Musa ma tu halak Gad, tu halak Ruben dohot tu satonga marga Manasse, anak ni si Josep, harajaon ni si Sihon, raja ni halak Amori dohot harajaon ni si Og, raja ni Basan, tano i tahe ro di angka huta di sandok partalpahanna humaliang.

32:34 Dung i dipauli halak Gad ma huta Dibon, Atarot dohot Aroer.

32:35 Tole Atarot Sopan, Jaser dohot Jogbehat.

32:36 Tole Betnimra, dohot Betharan, angka huta na gonting dohot pondokpondok di birubiru.

32:37 Ro muse halak Ruben paulihon Hesbon, eleale, Kiriataim.

32:38 Ro muse Nebo dohot Baal Meon, angka na dipaimbar ia goarna, tole dohot Sibna, jala di paimbar do goar ni huta angka na pinaulina i.

32:39 Dung i laho ma angka anak ni si Mahir, anak ni si Manasse, tu Gilead, laos dipapatu do i jala dipabali halak Amori na disi.

32:40 Dung i dilehon si Musa ma Gilead tu si Mahir, anak ni si Manasse, laos maringan ibana disi.

32:41 Alai anggo si Jair, anak ni si Manasse, laho do i papatuhon angka sosor, laos dibahen goarna angka sosor ni si Jair.

32:42 Laho do nang si Nobah, jala dipapatu Kenat rap dohot angka sosorna, jala digoar do i Nobah mangihuthon goarna i.

4 Musa 33

33:1 On do angka pangulonan ni halak Israel, angka naung ruar sian tano Misir rap dohot parangannasidai, marpandapotan tu si Musa dohot si Aron.

33:2 Dung i disurathon si Musa ma haruruarnasida dohot pangulonannasida i hombar tu hata ni Jahowa, jala on do angka pangulonannasida i, dung ruar nasida.

33:3 Borhat do nasida sian Ramses di bulan sipaha sada, di ari sampulu lima bulan sipaha sadai, manogotna i dung salpu Paska borhat ma halak Israel marhite sian tangan na timbul di adopan ni sude halak Misir.

33:4 Tole anggo halak Misir mananom sude anak buhabaju, angka naung mate dibunu Jahowa tu tongatonganasida; mangonai uhum Jahowa huhut tu angka debatanasida i.

33:5 Jadi dung borhat halak Israel sian Ramses, marsaro ma nasida di Sukot.

33:6 Borhat muse nasida sian Sukot jala marsaro di Etham, na di partalpahan ni halongonan i.

33:7 Borhat muse nasida sian Etham jala mamedu dompak Pihakirot, tondong ni Baal Zephon jala marsaro nasida di adopan ni Migdol.

33:8 Borhat muse nasida sian Pihakirot jala taripar nasida di tongatonga ni laut tu halongonan jala mardalan nasida tolu ari daona di bagasan halongonan Etham jala marsaro nasida di Mara.

33:9 Borhat muse nasida sian Mara jala sahat tu Elim; di Elim do sampulu dua mual dohot pitupulu harambir, laos marsaro nasida disi.

33:10 Borhat muse nasida sian Elim jala marsaro martopihon laut arung.

33:11 Borhat muse nasida sian laut arung jala marsaro di halongonan Sin.

33:12 Borhat muse nasida sian halongonan Sin jala marsaro di Dopka.

33:13 Borhat muse nasida sian Dopka jala marsaro di Alus.

33:14 Borhat muse nasida sian Alus jala marsaro di Rapidim; hurangan aek siinumon bangso i disi.

33:15 Borhat muse nasida sian Rapidim jala marsaro di halongonan Sinai.

33:16 Borhat muse nasida sian halongonan Sinai jala marsaro di lambung tanoman ni halak angka na hisapan.

33:17 Borhat muse nasida sian tanoman ni halak angka na hisapan jala marsaro nasida di Hazerot.

33:18 Borhat muse nasida sian Hazerot jala marsaro di Ritma.

33:19 Borhat muse nasida sian Ritma jala marsaro di Rimmon Peres.

33:20 Borhat muse nasida sian Rimmon Peres jala marsaro di Libna.

33:21 Borhat muse nasida sian Libna jala marsaro di Resa.

33:22 Borhat muse nasida sian Resa jala marsaro di Kehelata.

33:23 Borhat muse nasida sian Kehelata jala marsaro mardonokkon Seper.

33:24 Borhat muse nasida sian Seper jala marsaro di Harada.

33:25 Borhat muse nasida sian Harada jala marsaro di Makelot.

33:26 Borhat muse nasida sian Makelot jala marsaro di Tahat.

33:27 Borhat muse nasida sian Tahat jala marsaro di Tara.

33:28 Borhat muse nasida sian Tara jala marsaro di Mitka.

33:29 Borhat muse nasida sian Mitka jala marsaro di Hasmona.

33:30 Borhat muse nasida sian Hasmona jala marsaro di Moserot.

33:31 Borhat muse nasida sian Moserot jala marsaro di Bene Jaakan.

33:32 Borhat muse nasida sian Bene Jaakan jala marsaro di Hor-Gidgad.

33:33 Borhat muse nasida sian Hor-Gidgad jala marsaro di Jobata.

33:34 Borhat muse nasida sian Jobata jala marsaro di Abrona.

33:35 Borhat muse nasida sian Abrona jala marsaro di Esion Geber.

33:36 Borhat muse nasida sian Esion Geber jala marsaro di halongonan Zin, i ma Kades.

33:37 Borhat muse nasida sian Kades jala marsaro marbonahon dolok Hor di partalpahan ni Edom.

33:38 Dung i nangkok ma malim Aron tu atas ni dolok Hor, nidokkon ni hata ni Jahowa, laos mate disi, di taon opatpulu dung ruar halak Israel sian Misir, di artia bulan sipaha lima.

33:39 Jala marumur saratus duapulu tolu taon si Aron, uju na mate ibana di dolok Hor.

33:40 Uju i ma tarbortik barita i tu halak Kanaan, tu raja Arad, na maringan di tano Kanaan tungkan dangsina, naung ro halak Israel.

33:41 Borhat muse nasida sian dolok Hor jala masaro di Salmona.

33:42 Borhat muse nasida sian si Salmona jala marsaro di Punon.

33:43 Borhat muse nasida sian Punon jala marsaro di Obet.

33:44 Borhat muse nasida sian Obet jala marsaro di dolok Abarim di partalpahan ni Moab.

33:45 Borhat muse nasida sian dolok Abarim jala marsaro di Dibon-Gad.

33:46 Borhat muse nasida sian Dibon-Gad jala marsaro di Almon Diblataim.

33:47 Borhat muse nasida sian Almon Diblataim jala marsaro di dolok Abarim di adopan ni Nebo.

33:48 Borhat muse nasida sian dolok Abarim jala marsaro di adaran Moab martopihon Jordan, tondong ni Jeriko.

33:49 Jala marsaro nasida martopihon Jordan olat ni Betjesimot sahat ro di Abel Sitim di adaran Moab.

33:50 Dung i ro ma hata ni Jahowa tu si Musa di adaran Moab martopihon Jordan, tondong ni Jeriko, ninna ma:

33:51 Pasahat ma tu halak Israel hatangkon: Ia dung ditaripari hamu Jordan masuk tu tano Kanaan.

33:52 Ingkon pabalionmuna sude isi ni tano i hian sian adopanmuna, jala ingkon bolaonmuna nasa ganaganaannasida sian batu; nang ganaganaannasida tuangan ingkon segaanmuna do, jala nasa tombaknasida ingkon lohaonmuna do.

33:53 Laos ingkon hamu manean tano i jala maringan disi; ai nunga hulehon tano i tu hamu, asa soluhonmuna i.

33:54 Jala ingkon bagionmuna tano i di hamu marmargamarga marhite sian rujiruji; molo torop halak bilanganna, ingkon pagandaonmu partalianna, molo otik, paotihonmuna huhut partalianna; manang dia tahe na tinudu ni rujiruji i di ganup, ingkon i do partalianna; marguru tu margamuna marompuompu, maruli partalian hamu.

33:55 Alai tung sura so dipabali hamu isi ni tano i hian sian adopanmuna, angka pasipasina sian nasida tinebahonmuna i, ingkon gabe basir di bagasan matamuna jala gabe turatura di bagasan gontingmuna, jala sosahannasida ma hamu di tano na niingananmuna i.

33:56 Jadi suman songon na sinangkap ni rohangku naeng bahenonku tu nasida, bahenonku do tu hamu.

4 Musa 34

34:1 Dung i ro muse hata ni Jahowa tu si Musa songon on:

34:2 Ingkon pasahatonmu ma hatangkon tu nasida: Molo dung masuk hamu tu tano Kanaan, on do tano i, na gabe partalianmuna, tano Kanaan i tahe ro di parbalohanna.

34:3 Hamu do nampuna tano sambariba tungkan dangsina tutu olat ni halongonan Zin mardonokkon Edom, asa parbalohanmuna tungkan dangsina olat ni ujung ni laut sira tungkan habinsaran.

34:4 Dung i mamedu ma parbalohan dangsina i sahat tu robean Akrabim jala taripar tu Zin jala nangkok tungkan dangsina ni Kades-Barnea, ruar sian i muse tu Hazar-Adar, jala taripar sian i muse tu Azmon.

34:5 Mamedu muse parbalohanna sian Azmon tu sunge Misir, jala partalpahanna marbalokkon laut.

34:6 Ia parbalohanna tungkan hasundutan (laut), ingkon laut na bolon i do parbalohanna di hamu; i ma parbalohan na tungkan hasundutan.

34:7 Ia parbalohanna tungkan utara, ingkon mangoriori sian laut na bolon sahat ro di dolok Hor.

34:8 Sian dolok Hor muse ingkon gistang sahat ro di Hamat, asa partalpahan ni tano i sahat tu Zedad.

34:9 Ruar muse parbalohan i sian i sahat tu Sipron, asa partalpahanna sahat tu Hazor-Enan. I ma parbalohanmuna tungkan utara.

34:10 Ia parbalohanmuna sambola tungkan habinsaran olat ni Hazor-Enan sahat ro di Sepam.

34:11 Tuat muse parbalohan i sian Sepam tu Ribla tungkan habinsaran sian Ain, tuat muse parbalohan i pola dolos tu pasir ni tano Kineret tungkan habinsaran.

34:12 Dohot muse parbalohan i sahat tu Jordan, jala partalpahanna martopihon laut sira. I ma gabe tanomuna mangihuthon parbalohanna humaliang.

34:13 Dung i ro ma hata ni si Musa mandok tu halak Israel: I ma tano i sibagionmuna marhite sian rujiruji, na tinonahon ni Jahowa lehononna tu na sia marga dohot tu na satonga marga Manasse.

34:14 Ai nunga maruli partalian be anggo marga ni halak Ruben marompuompu dohot marga ni halak Gad marompuompu ro di satonga marga Manasse.

34:15 Na dua marga dohot na satonga marga, nunga maruli partalian di baribaon di Jordan, tondong ni Jeriko tungkan habinsaran.

34:16 Dung i ro muse hata ni Jahowa tu si Musa songon on:

34:17 On do goargoar ni baoa angka na marbagi tano i tu hamu: malim Eleasar, dohot si Josua, anak ni si Nun.

34:18 Angkup ni ingkon buatonmuna do sada induk sian ganup marga laho marbagi tano i.

34:19 Jala on do goargoar ni angka baoa i: si Kaleb, anak ni si Jepune sian marga Juda.

34:20 Si Semuel, anak ni si Amihud, sian marga Simeon.

34:21 Si Elidad, anak ni si Kilson, sian marga Benjamin.

34:22 Si Bukki, anak ni si Jogal i, induk sian marga Dan.

34:23 Si Hanniel, anak ni si Epod, sian pinompar ni si Josep, induk sian marga Manasse.

34:24 Si Kemuel, anak ni si Siptan, induk sian marga Epraim.

34:25 Si Elizapan, anak ni si Parnak, induk sian marga Zebulon.

34:26 Si Paltiel, anak ni si Azan, induk sian marga Isasar.

34:27 Si Ahihud, anak ni si Selomi, induk sian marga Aser.

34:28 Si Pedahel, anak ni si Amihud, induk sian marga Naptali.

34:29 I ma baoa angka na tinonahon ni Jahowa, ingkon bagionna tano Kanaan i di halak Israel.

4 Musa 35

35:1 Dung i ro muse hata ni Jahowa tu si Musa di adaran Moab, martopihon Jordan, tondong ni Jeriko, ninna ma:

35:2 Dokkon ma halak Israel i, asa dilehon nasida angka huta sian partalian hapunjunganna be tu halak Lepi, bahen inganannasida.

35:3 Lehonon huhut tu halak Lepi tano upa parik humaliang hutanasida i bahen panjampalan; asa angka huta i gabe inganan di nasida jala angka panjampalan i di dorbianasida dohot di pinahannasida marragamragam.

35:4 Alai angka upa parik ni huta, angka silehononmuna tu halak Lepi, ingkon sian balian ni parik ni huta i suhatan saribu asta humaliang.

35:5 Ingkon suhatanmuna sian balian ni parik i sambariba tungkan habinsaran dua ribu asta dohot sambariba tungkan dangsina dua ribu asta dohot sambariba tungkan hasundutan dua ribu asta dohot sambariba tungkan utara dua ribu asta, asa huta i di porsitongaanna; ingkon i ma upa parik ni angka huta i.

35:6 Alai angkup ni huta angka silehononmuna tu halak Lepi, i ma na onom huta haporusan, angka silehononmuna, asa maporus tusi halak sibunu jolma, lehononmuna dope tu nasida opatpulu dua huta.

35:7 Jadi torop ni sude huta angka silehononmuna tu halak Lepi opatpulu ualu huta rap dohot upa parikna.

35:8 Ingkon sian partalian ni halak Israel do lehononmuna angka huta i, gumodang do sian halak na gumodang partalianna, jala ummotik sian halak na otik partalianna; ganup marguru tu partalianna na sinagihon tu ibana, lehononna sian angka hutana tu halak Lepi.

35:9 Dung i ro muse hata ni Jahowa tu si Musa songon on:

35:10 Patolhas ma hatangkon tu halak Israel: Ia dung ditaripari hamu Jordan masuk tu tano Kanaan.

35:11 Ingkon papulihonmuna di hamu angka huta na tau bahen huta haporusan di hamu, asa tarbahen maporus tusi halak sibunu jolma, so pangkirimanna.

35:12 Asa angka huta i bahen haporusan di hamu maradophon jolma parlulu, asa unang mate halak sibunu jolma i so jolo sanga jongjong ibana di adopan ni luhutan paruhuman.

35:13 Jala sian huta angka na pinatongonmuna, ingkon onom gabe huta haporusan di hamu.

35:14 Ingkon tolu huta patongononmuna di baribaon ni Jordan, jala tolu huta patongononmuna di tano Kanaan: Ingkon gabe huta haporusan do i.

35:15 Na onom huta i ingkon gabe haporusan nang di halak Israel, nang di halak dagang, nang di halak paisolat di tongatongamuna, asa tarbahen maporus tusi manang ise na mambunu jolma so pangkirimanna.

35:16 Tung sura manang ise mambunu jolma marhite sian ulaula bosi, pola mate, sibunu jolma ma ibana tutu, ingkon marutang hosa do halak pamunui.

35:17 Manang tung sura mate jolma i dibunu marhite sian batu na di tanganna tau pamunu hian, sibunu jolma ma ibana tutu, ingkon marutang hosa halak pamunui.

35:18 Manang tung sura mate jolma i dibunu marhite sian panggado hau na di bagasan tanganna, tau pamunu hian, sibunu jolma ma ibana tutu, ingkon marutang hosa halak pamunui.

35:19 Ingkon jolma parlulu hian mambunu halak pamunui, manang didia pe ibana dapotsa, jadi ma bunuonna ibana.

35:20 Manang tung sura ditenju jolma i sian hosom ni rohana, manang dituntun maninggangkon manang aha tu ibana pola mate.

35:21 Manang tung sura dipastap ibana ala naung musuna hian pola mate, ingkon marutang hosa jolma pamastapi, ai sibunu jolma do ibana; ingkon jolma parlulu hian mambunu halak pamunui, manang didia ibana dapotsa.

35:22 Alai tung sura ndada sian sangkapna hian jala ndada ala musuna hian umbahen ditenju ibana manang ditinggangkon tu ibana manang aha, ndada sian tuntunna hian.

35:23 Manang tung sura ditinggangkon batu tu ibana, tau pamunu hian, so botobotoanna, pola mate jolma i, alai ndada musuna hian, jala ndada disangkap hian hamagoanna.

35:24 Ingkon luhutan i manguhum jolma pamunui dohot jolma parlulu i, hombar tu angka uhumon.

35:25 Ingkon luhutan i paluahon jolma pamunui sian tangan ni jolma parlulu i, ingkon luhutan i manogihon ibana mulak tu huta haporusanna hian; ingkon disi do ibana maringan, paima mate sintua ni malim, naung miniahan marhite sian miak na badia.

35:26 Alai tung sura ruar jolma pamunui salpu sian parbalohan ni huta haporusanna hian.

35:27 Laos dapot jolma parlulu i ibana di ruar ni parbalohan ni huta haporusanna i, gabe dibunu parlulu i ma halak pamunui, ndang marutang mudar ibana.

35:28 Ai ingkon tinggal hian ibana di bagasan huta haporusanna i, paima mate sintua ni malim, alai dung mate sintua ni malim, jadi ma jolma pamunui mulak tu huta partalianna hian.

35:29 Luhutna i ingkon gabe patik ni uhum di hamu marsundutsundut di saluhut huta ingananmuna i.

35:30 Manang ise na mambunu jolma, ingkon bunuon ma pamunui, dung binege hata ni angka sitindangi; alai anggo holan sada do sitindangi ndang masuk maralus dompak jolma i pola marutang hosa uhumon.

35:31 Jala ndang jadi jaloonmuna hepeng partobus ni hosa ni halak sibunu jolma, na marutang hosa hian, ingkon saut do ibana bunuon.

35:32 Jala ndang jadi jaloonmuna hepeng partobus sian jolma naung maporus tu huta haporusanna, mangaloas ibana mulak maringan di tanona hian, jumolo sian na mate sintua ni malim i.

35:33 Unang tung ramuni hamu tano na niingananmuna i, ai mudar i do paramunhon tano i, jala ndang dapot padengganon tano i, ala ni mudar naung nidurushon disi, nda holan marhite sian mudar ni jolma na mandurushon.

35:34 Dibahen i unang ramuni hamu tano na niingananmuna i, pola dohot Ahu maringan di tongatongana; ai Ahu do Jahowa na maringan di tongatonga ni halak Israel.

4 Musa 36

36:1 Dung i ro ma jumonok angka induk marompuompu sian pinompar ni halak Gilead, anak ni si Mahir, anak ni si Manasse, sian pinompar ni si Josep, laos didok nasida ma hatana di adopan ni si Musa dohot di adopan ni angka induk, ihutan ni halak Israel marompuompu, ninna nasida ma:

36:2 Nunga martona Jahowa tu tuanku (Musa), ingkon lehononmuna tano i tu halak Israel bahen partalian marhite sian rujiruji; jala nunga ditonahon Jahowa hian tu tuanku, ingkon lehonon partalian ni si Zelapehat, dongannamii, tu angka boruna.

36:3 Tung sura muli nasida tu sada sian angka marga ni halak Israel, gabe bali partaliannasida i sian partalian ni ompunami, jala ditambahon tu partalian ni marga hamulianna i, gabe moru jambar partaliannami.

36:4 Tole muse taon parolopolopon di halak Israel jadi tambahononna ma partaliannasida tu partalian ni marga hamuliannasida i, jadi moru ma sian partalian ni marga ni ompunami partaliannasida i.

36:5 Dung i ro ma hata ni si Musa tu halak Israel, nidokkon ni Jahowa songon on: Sintong do hata ni marga ni halak Josep.

36:6 On do tahe hata na tinonahon ni Jahowa taringot tu angka boru ni si Zelapehat, ninna do: Guru lomo ni rohanasida do muli tu manang ise, alai ingkon muli nasida tu dongan samarga ni amanasida i.

36:7 Asa unang bali partalian ni halak Israel sian marga na sada tu marga na asing; ai ingkon ganup sian halak Israel mangihutihut partalian ni marga ni ompuna.

36:8 Asa ganup boru na manean partalian sian angka marga ni halak Israel, ingkon muli do nasida tu sada halak sian pinompar ni marga ni amanasida i, asa laos halak Israel manean ganup di partalian ni ompuna.

36:9 Asa unang bali partalian ni marga na sada tu marga na asing; ingkon ganup marga ni halak Israel mangihutihut partalianna be.

36:10 Hombar tu na tinonahon ni Jahowa tu si Musa, songon i ma dibahen angka boru ni si Zelapehat.

36:11 Ai muli do si Mala, si Tirza, si Hoglah, si Milka dohot si Noah, angka boru ni si Zelapehat tu angka anak ni amangudana.

36:12 Muli ma nasida tutu tu pinompar ni halak Manasse, anak ni si Josep, jadi hot ma partaliannasida i di marga ni pinompar ni amana.

36:13 I ma luhutna patik ni uhum, angka na tinonahon ni Jahowa marhite sian si Musa tu halak Israel di adaran Moab martopihon Jordan, tondong ni Jeriko.