Taifa
En la istoria de la penisola iberian, un taifa (de arabi طائفة ṭā'ifa) ia es un prinsia autonom governada par muslimes. Pos la colasa final de la Califia Umaian de Cordoba en 1031, varia taifas ia es creada. La plu ia es amirias, an si ia un oligarcia ia esiste.
Asende
[edita | edita la fonte]La orijina de la taifas debe es xercada en la divide manejal de la Califia Umaian de Cordoba, como ance en la divide etnical de la elites de la stato, divideda entre arabis, la plu berberes, muslimes iberian (conoseda como muladis, un majoria grande) e la sclavos pasada de Europa este.
En la tarda de la sentenio 11, cuando la Crusada Prima ia es reganiante teritorios en Ieruxalim, la cristianes de la norde de Iberia ia deside concista la teritorios muslim. La Califia de Cordoba, alora entre la statos la plu rica e potiosa de Europa, ia sufri un gera interna, conoseda como fitna. Como resulta de esta, la Califia "ia divide en taifas, amirias peti e competosa, lutante contra lunlotra".
An tal, la declina politica e la caos no ia es direta segueda par un declina cultural. Un ativia intensa leteratural e inteletal ia continua en alga de la taifas la plu grande.
On ia ave un periodo du cuando la taifas ia apare denova, en la media de la sentenio 12, cuando la gidores almoravide ia es en declina.
En la apico de la taifas, en la sentenio 11 e denova en la media de la sentenio 12, sua amires (gidores) ia compete entre los per prestijia cultural. Los ia atenta enscrive la poesistes e artisanes la plu famosa.
Declina
[edita | edita la fonte]Reversante la tende de la periodo umaian, cuando la renas cristian de la norde ia debe frecuente paia tribuis a la califa, la desintegra de la Califia ia lasa la renas muslim enemi como multe plu debil ca sua corespondentes cristian, spesial la monarcia de Leon e Castilla, e los ia debe paia los tribuis nomida parias.
Par causa de sua debilia militar, la prinses de la taifas ia apela a gerores de Africa norde per luta contra la re cristian a du veses. La almoravides ia es invitada pos la cade de Toledo (1085) e la almohades pos la cade de Lisboa (1147). Esta gerores no ia aida la amires de la taifas ma ia ajunta sua teras a la imperos de Africa norde.
Frecuente la taifas ia emplea mersenarios de la statos cristian de la Pirineo (ambos cristian e muslim). La taifa la plu dinamical, cual ia concista la plu de sua visinas pos la invade almoravide, ia es Sevilla. Zaragoza ia es ance multe potiosa e estendosa, ma constrinjeda par sua statos cristian visina de la Pirineo. Zaragoza, Toledo e Badajoz ia es ante la fronteras de la Califia.