Golf (sport)
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Golf is 'ne percisiesport gespäöld op 'n ope veld, de zoegeneumde golfbaon, boebij 't de bedoeling is veur mèt e slaaghout, de zoegeneumde golfclub, 'ne bal mèt zoe wieneg meugelek sleeg in e leukske te kriege. 't Look (d'n hole) steit aongegeve mèt e veendelke, zoetot de golfer wèt boe heer op moot riechte. Um 't de speulers lesteger te make de bal drin te kriege, bevat de golfbaon (die op topniveau oet 18 holes besteit) es regel zandbunkers, ooneffenhede en waterpeul. De oetindeleke score weurt berekend op par, 't aontal sleeg wat de gemiddelde golfer nujeg heet veur alle holes te make. Wee de mieste sleeg oonder par zit, heet 'ne wèdstrijd gewonne.
Golf is in de Vreugmodernen Tied oonstande in Sjotland, en is oontwikkeld oet de Hollandse sport kolf. Allewijl is 't zier populair in 't Vereineg Keuninkriek en de Vereinegde Staote. In väöl aander len (beveurbeeld Nederland en 't Belsj) weurt 't gooddeils op amateurniveau gespäöld, veural door de rieke: oonder mie door de hoeg koste die de groete golfbaon vereis heet 't de status vaan elitesport. De belaankriekste toernoje zien de Grand Slamtoernoje ('t Masters Tournament, de U.S. Open, de British Open en 't PGA Championship) zoewie de Ryder Cup, dee um de twie jaor tösse de VS en Europa weurt gehawwe. Golf waor in 1900 en 1904 'nen Olympische sport, meh verdween daonao vaan 't program um pas in 2016 weer trök te kiere.
