Drost
Nen laanddrost of drossaert was nen Nederlandsen bestuursambtenoar den n gebeed bestuurden dat neet gemeentelek in-edaeld was.
Den drost van Muden bieveurbeeld wodden deur de börgemeisters van Amsterdam an-esteld en had as taak den toogang tot den Vecht en den weg noar Amsterdam vanuut Het Gooi te bewaken. Et was n eervol beroop, met völle tied veur leefhebberi-jen as skrieven, dichten en muziek maken. P.C. Hooft is den meest bekanden drost ewest.
Et drostambt bestoand al in de middeleeuwn in et Bisdom Utrecht. De drosten van Twente huusden eursprönkelek waoarschienlek te Goor, later mangsmoal op eigen kastelen of havezates. In de 18de eeuwe voerden drosten in Oaveriessel opni-j de middeleeuwse drostendeensten in, wat betekkenden dat boern tweemoal in et joar zunder vergoding hand- en spandiensten veur den drost mössen doon. Joan Derk van der Capellen tot den Pol maken ofschaffing van dizzen, in ziene euge unrechtvoardigen en unwettigen, toostaand ene van ziene speerpunten.
In et Könninkriek Holland (1806-1810) was den landdrost et heufd van et departement (previnsie).
Tussen 1949 en 1963 wödden de in-enommen Duutse gebeeden Elten en Selfkant deur nen landdrost bestuurd. Ok et Openboar Lichoam Zuudeleke Iesselmeerpolders wöd bestuurd deur nen landdrost; den bekandsten was Han Lammers. In 1996 wöd dit Openboar Lichoam op-ehaeven, woarmet ok den taak van landdroste vort is egoane.
Ok in de Nederlandse Kaapkolonie wöd den titel ebruukt. Zo steet in Graaff-Reinet nog altied n mooi Drostdi-je-huus uut dizze tied.